Abaı arqyly álemge tanylǵan Qunanbaı shańyraǵynyń bir murasy arǵy bette, dálirek aıtsaq, QHR Altaı aımaǵynda tur.
«Uljannyń úzeńgisi» dep atalatyn bul jádigerdi Altaı qalasy Shirikshı aýylynyń turǵyny Qajyahmet Tapaluly saqtap, búginge jetkizgen. Qajyahmet aqsaqaldyń aıtýynsha, syrtyna kúmis qaqtaǵan bul qostaban úzeńgi Shyńǵys taýynyń etegindegi Qunanbaı aýylynan arda Altaı tósindegi salqyn Saýyr alqabyna uzatylǵan qyzdyń jasaýymen birge kelipti.
– Meniń arǵy atam Kishtáı baı kezinde Qunanbaı aýylymen irgeles otyrǵan, qyz alysyp, qyz berisken quda eken. Uzaq jyl Uljan sheshemizdiń qyzmetinde bolǵan bir boıjetken kereı aýylyna uzatylǵanda, Uljan anamyz at mingizip attandyrypty. Myna úzeńgi – sol tórt turmany túgel kúmis erden qalǵan jurnaq. Erin jáne qalǵan turmanyn «Mádenıet zor tóńkerisi» kezinde belsendiler kózin qurtty. Al úzeńgisin Kamesh degen pysyq jeńgem tyǵyp alyp qalypty da, ógizge ertteıtin yńyrshaqqa taǵyp qoıypty. Ógizdiń qabyrǵasynda júrgen úzeńgini eshkim baıqamaı, «Tórt kóneni qurtqan dáýirden» aman qalyp, búginge jetti, – deıdi Qajyahmet aqsaqal.
200 jylǵa jýyq tarıhy bar jádigerdiń jaı qoldan shyqpaǵany kórinip tur. Syrtyna qaqtaǵan kúmistiń azdap ushqany bolmasa, «syrly aıaqtyń syry ketse de, syny ketpeıdi» degendeı, sheber qoldan shyqqan úzeńginiń jasalýynyń ózi kóz tartady. Qajyahmet aqsaqal alǵashynda bul úzeńgini Abaı urpaqtarynyń ózine tabys etsem dep te oılapty. Alaıda Altaı qalalyq murajaı bul úzeńgini Qajyahmet aqsaqaldyń qolynan áldeqashan alyp ketken. Qazir sol murajaıda saqtaýly.
6alash usynady
