Almaty oblysyna qarasty Shoqan Ýálıhanovtyń «Altynemel» memlekettik memorıaldy mýzeıi qorynda saqtalýly turǵan qundy buıymnyń biri – Shoqannyń parsha belbeýi. Bul jádiger jaıly atalmysh mýzeı basshysy Sáýle Ábishevanyń aıtýyna qaraǵanda, belbeý 1985 jylǵa deıin Almatydaǵy Memlekettik Ortalyq mýzeı qorynda saqtalyp kelgen. Oǵan qalaı keldi, ol jaǵy beımálim.
Keıin QazSSR Mádenıet mınıstriniń nómiri 63-shi buıryǵymen akt jasalyp (Akt № 165) belbeý Memlekettik Ortalyq mýzeı qorynan alynyp, «Altynemel» memlekettik memıoraldy mýzeıine tabystalǵan.
Jádigerdiń qujattamasynda bul dúnıeni saıahatshy-ǵalym 1858-1859 jyldary Qashǵarıaǵa barǵan saparynda býynyp kelgen delingen. Belbeý óte sapaly, taza qytaı jibeginen jasalǵan. Buıymǵa ber jaǵy 150 jyldan astam ýaqyt ótse de, syny buzylmaı jaqsy saqtalǵan. Eki ushyna birdeı tógilgen sándi shashaǵy men jıekteı kestelengen órneginiń bir jibi de setinemepti.
Bul zat ótken shilde aıynyń basynda Astanada ótken Almaty oblysy mádenı kúnderi kezinde elordadaǵy Qarýly kúshterdiń áskerı-tarıhı mýzeıinde kórmege qoıylyp, kópshilik nazaryna usynylǵan bolatyn.
Beken QAIRATULY,
Sýretti túsirgen Orynbaı BALMURAT
