Sáden Ánýaruly 1942 jyly Qytaı, Shyńjań Altaı aımaǵy, Jemeneı aýdanynda dúnıege kelgen. 1960 jyly Shyńjań ınıstıtýtynyń til-ádebıet mamandyǵyn bitirgen. Mektep bitirisimen Jemeneı aýdandyq 1-orta mektepte 20 jyl oqytýshylyq qyzmetin atqarǵan. Keıin Jemeneı aýdandyq mádenıet mekemesinde qyzmet istep zeınetke shyqqan. Ol sonaý 1950 jyldardan bastap ádebıet shebine aralasyp, kóptegen óleń, dastan, tolǵaýlary arqyly oqyrmandardyń jaqsy baǵasyn alyp júrgen aqyndarymyzdyń biri bolatyn. Sáden Ánýaruly 1993 jyly qaıtys bolǵan.
Qarlyǵash
Qarlyǵash! Barmaqtaı qus bolsańdaǵy,
Jatyr ǵoı ón boıyńda oı salmaǵy.
Rızamyn kir shalmaǵan aq tósińmen
Óleń – jyr sabaǵyna qonsań máńgi!
Qarlyǵash! Súıikti ediń sonsha netken,
Qalyqtap masaıraısyń bolsa kóktem.
Sezimtal jas sulý da sekem almas,
Bulqynǵan burymyna qonsań eppen.
En dala! Tarttym shalǵaı qara kermen,
Atanǵam aýylyma bala mergen.
Qarlyǵash! At kekilin janap ushsań
Ózińdeı janǵa jýyq jazam óleń!
Ash bóri ala berse jurt tynyshyn,
Men dereý jalǵyz oqpen qurttym mysyn.
Sen sonda táýetińdi kóterip kep
Jeńip eń abjylandy myqty qusym.
Osynaý tańǵajaıyp qyzyq álem,
Kelem uǵyp kıeli syryn áreń.
Qarlyǵash! Úıime kep salsań uıa,
«Qarlyǵash» dep at qoıdym qyzyma men.
Qos qarylǵash, qanatyn qaqsa jyldam,
Janym shalqyp kózimnen jas tamyzǵam.
«Qarlyǵash» bop jyrymnyń taqyryby
Qarlyǵashty qasterlep aıtqamyn án.
Jańa jurt
Shógergen túıe tabylmas,
Úıirilgen qalyń shalǵynǵa,
Aýylyń qondy qaryndas,
Kerege kógin jaıdyń ba?
Tymaǵyń tússe tabylmas,
Oralǵan qalyń shalǵynǵa,
Aýylyń qondy qaryndas,
Ýyqtar qarnyn tańdyń ba?
Aýylyń qonyp, aýylyń
úı tigildi al munda,
Jalt qarap jigit júzine
Shańyraq kózin taıdyrma.
Sybanyp eki keń jeńin,
Baqan ap jigit keledi,
Shańyraq únsiz sheńberin
Tóbesinde onyń keredi.
Ysqylap ýyq arqasyn,
Týyrdyq jaıar qanatyn.
Dalanyń surǵylt jar tasyn,
Qushaqtar únsiz qara tún.
Tekemet asty qalyń shóp,
Etedi gúrip– gúrip otyrsań,
Qazannyń asty jalyn shoq,
Qalpyna kepti-aý ashýshań.
Kóbigi shyǵyp kósh attyń,
Tań asar tereń túbinde,
Jyltyrar oty oshaqtyń,
Jańa jurt seniń túnińde.
Kún
Kún degen – bir surapyl qyzýly nur,
Ǵalymdar keýdesinde syzýly bul.
Ol biraq órtemeıdi dúnıeńdi,
Jaratar adamzatqa uzyn ǵumyr.
Jaýyzdyq kún dańqyna kir juqtyrǵan,
San ret san ǵumyrdy tunshyqtyrǵan.
Osylaı kúnniń órim shuǵylasyn,
Baqytty basqa uratyn bıshik qylǵan!
6alash usynady
