Babamnyń basy qalǵan qula qyrda,
Bozdaıdy sekseýilder quba qumda.
Qorqyttyń qobyzynyń muń men zary,
Quıylǵan ujdan bolyp, qulaǵyma
Taýyndaı Jıdeliniń týǵan arman,
Qazaqtyń dombyrasyn tyńda ǵalam!
Sorǵalap qos ishekten «Serper», «Adaı»,
Jetkizdi bozsholaqtar jyldan aman.
Dombyra abyzdardyń amanaty,
Júzinde aldaspannyń zar jylaǵan.
«Aqtaban shubyryndy, Alqakól sulamadan»
Óshken ot, kóshken jurttan án quraǵan.
Balbaldar, ǵundar jatqan dalasynda,
Baýyryna basqan baıtaq, bar asyldy.
Kisinep kúreńindeı Kúlteginniń,
Taýysar «Balbyraýyn» taǵatyńdy.
Qan tamsa Mahambettiń sadaǵynan,
Tebinip er Isataı salar uran.
Julqynyp «Kisen ashqan», «Túrmeden qashqan»
Tógiler dombyramnyń shanaǵynan.
Sýsyǵan súleı dúnıe saýsaǵymnan,
Dúldildeı kermedegi taý saǵynǵan.
Tórkindep «Tóremurat» ketti áne endi,
Buıyrǵan mańdaı baǵym balshaǵymnan.
Esimde er Kóksheniń bal bulaǵy,
Bal bulaǵy shólimdi qandyrady.
Qanymda týlap jatyr tolaǵaı kúı,
«Saryarqa» jalǵan dúnıe qaldy bári.
Kúı qalyqtap qustardyń qanatynda,
Qanatynda qamalyp qalatyn án.
Kúı aqıqat, namystyń kók baıraǵy,
Qazaq degen dombyra, dara tulǵa.
Kúı halyqtyń tarıhy, arttaǵyǵa,
Úrkip ketken juldyzdaı aspanyńa.
Daýǵa sheshim, jaýyna keshirimdi,
Tóbe bıi sekildi qaqpaǵylda.
Rýhyma ulylyqty quıady aq tań,
Kókiregime kúı bolyp sıady aspan.
Qarapaıym qazaqtyń dombyrasy,
On segiz myń ǵalamdy uıalatqan.
Kóńilinen ushyrsa kúıshi úmit,
Bóri turar beldeýde, uıqyly ulyp.
Qulagerdeı zymyrap quba túzde,
Tórt qubyla án jutsyn, kúı simirip.
Ǵalamat daýyl soǵar, qanymdy alyp,
Janartaýdaı lapyldap janyp-janyp.
Qulyndaı oınaqtaǵan mamyrdaǵy,
Tym sıqyr «Álqısa» kúı arymdaǵyp.
Hám saǵynysh dombyra, sende saýǵam,
Sende saýǵam sarpaldań terbe sarman.
Saqtaǵan saq babamnyń san tarıhyn,
Teńdeýsiz, tálimdermen teńdese alǵam.
Osyndaı qasıet bar shanaǵyńda,
Shabyt qýǵan jyraýlar jalǵasýda.
Qıa bassam atanyń soqpaǵynan,
Pendelikten perishtem ar basýda.
O, dombyram! Baıraǵym kóteretin,
Kúı bolyp kúmbirlese kósheli tún.
Ónerdiń kir keltirsem ózegine,
Áz elim, kári jandy keshirersiń.
Qajydym, týǵan jerden kúı keshemin,
Kúı keshemin, taýlarmen tildesemin.
Qazaqtaı qońyr minez dombyramdy,
Qajymas qaırat jatyr, kúıde senim.
O meniń Oǵyz áýen, O Turanym!
Shyrqyrap shyndyqty aıtam, shoshymaǵyn.
Týǵan jer topyraǵyń qymbat maǵan,
Basyǵut, baýyry Balqash shoqylarym.
Qudiretin tanytqan ǵumyry ulttyń,
Ýyz emgen urpaǵy ulylyqtyń.
Jan júregim dombyra úzbes úmit,
Kúı deıtin qudyretke qunyǵyppyn.
Aqyn,zertteýshi Saǵatbek Ahmetqajıuly 1974 jyly maýsym aıynda Shyǵys Túrkistannyń Altaı aımaǵynda dúnıege kelgen. 2010 jyly mamyrda Qazaqstanǵa oralǵan.
Qytaıdan jáne elimizde shyǵatyn gazet,jýrnaldarda 300-den asa shyǵarmalary jaryq kórgen. «Kókjal tún» , «O, Aǵajaı» atty jeke jyr jınaqtarynyń avtory. «Sezim tamshylary», «Qanas merýertteri», «Qylburaý» degen almanaqtarda shyǵarmalary shyqqan.Osy tustan «Amanat», «Muzbalaq», «Baba joly», «Qylburaý», «Sáýir bulty», «Jyr-shejire», «Sybyzǵy sazy», «Kókjıekti kún sáýle» , «Qulan ıek» qatarly kitaptardy qurastyrǵan.Qazir Aqmola obylysy Ereımentaý aýdany Taıbaı aýylynda turady
