Almatyda "Sybyzǵy sazy" atty jańa jyr jınaq jaryq kórdi. Jınaq avtory Samarıa Dáýitqyzy. Qazaqstanǵa Arǵy Bet Shynjańnan kelip kitaptaryn shyǵaryp qazaq ádebıetiniń qazynasyna qosyp jatqan qandas qalamgerler jeterlik. Alaıda Qytaı eliniń ishki ólkelerinde, qazaq sırek qonystanǵan aýdandarynda turatyn azdy-kópti qalamgerleri Qazaqstan oqyrmandaryna tanys dep aıtý qıyn. Mılıardtaǵan halyq ishinde birneshe myń ǵana qazaqtan quralǵan aýdandarda turatyn qandastarymyz bar ekenin bireý bilse, bireý bilmeıdi. Al sol shaǵyn qaýymnyń qazaqtyń salty men mádenıetiniń qunaryn saqtap otyrǵanyn da bireýge aıtyp sendirý neǵaıbyl nárse.
"Sybyzǵy Sazy" Almatydaǵy "Bilge" baspasynan jaryqqa shyqty.
Samarıa Dáýitqyzy Qytaı Halyq Respýblıkasynyń Gansý ólkesi Aqsaı aýdanynda dúnıege kelgen. Shynjańnyń Altaı aımaǵynan ótken ǵasyr basynda aýyp ketken el sol Gansý ólkesine ornalasyp qalǵan. Shynjańmen salystyrǵanda mıllıardtaǵan qytaı jurtshylyǵynyń ishinde otyrǵan Aqsaı aýdanyndaǵy qazaqtar soǵan qaramastan salt-dástúrin berik ustanǵan. Elimiz táýelsizdik alǵanda Aqsaı qazaqtarynan da kóptegen adamdar elge kelip qosyldy. Búgingi tańda Egemen elinde zeınetti ómir keship jatqan aqyn Samarıa Dáýitqyzy san alýan taqyrypta jazǵan óleńderiniń jınaǵyn táýelsiz elinde oqyrman qaýymmen júzdestirip otyr.
Kitap jalpy kópshilik oqyrmanǵa arnalǵan.
Súıinshili jańalyǵymyzdy avtordyń Atajurtyna arnaǵan bir óleńimen túıindelik:
QAZAQIA – OTANYM
Estilmeıdi elime,
Erte salǵan tańǵy ánim.
Qıyr jáılap, shet qondym,
Alash bolyp armanym.
Elge keldim ultan bop,
Baba jolyn jalǵadym.
Sultan bolý ne kerek,
Qazaq jerin tańdadym.
Qıynshylyq kórsem de,
Kózsizdikke barmadym.
Ultty súıý ımannan,
Ultqa ómir arnadym.
Qanymda bar namysym,
Ózge jurttan qalmadym.
Qazaqıa – otanym,
Qazaq bolý – armanym!
Otanym dep ot bastym,
Kókbaıraǵym qolymda.
Qazaǵym dep qan keshem,
Beıbitshilik jolynda.
Urpaǵym dep, ultym dep,
Kelgen jerim Alataý.
Basy kenish, baýyry qut,
Jetisýym jannat-aý!
Elge ákeldim salt-sana,
Dástúr menen tilimdi.
Imanym men tegimdi,
Qanǵa sińgen jyrymdy.
Berik endi bosaǵam,
Shańyraǵym qos aman.
Qabyl etti tilekti,
Meıirimdi Jasaǵan.
Sherik ǵasyr – shejirem,
Etek-jeńim túgel-di.
Basqan adal qadamnan,
Nesibemnen gúl óndi.
Ańsaǵanym – ádildik,
Alla joly – aqıqat.
Seni ǵana jyrlaımyn,
Qazaqıa – óz elim!
Oǵyz oıdan ot uran,
Aldaspandaı aqynmyn.
El bastaǵan Elisqan,
Urpaǵymyn batyrdyń.
Keýdemde bir aǵys bar,
Júrek únin tyńdaǵyn.
Men aqyny – qazaqtyń,
Qazaǵymdy jyrlaǵan.
2021 jyly, 28 shilde,
Shýdyń boıynda.
