Dúnıejúzi qazaqtarynyń V Quryltaıynda Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaev qandastarǵa kómek kórsetý qajettigin atap ótken bolatyn. Sol negizde Elbasynyń tapsyrmasymen Otandastar Qory quryldy.
Qazaqstan Respýblıkasy Úkimetiniń 2018 jyly 18 mamyrdaǵy № 280 qaýlysyna sáıkes «Sheteldegi etnıkalyq qazaqtardy qoldaý jónindegi 2018 - 2022 jyldarǵa arnalǵan is-sharalar jospary» bekitilip, Qoǵamnyń atqaratyn jumystary aıqyndaldy.
Búginde Qoǵam 4 baǵytta jumys atqarady. Birinshi, shetel qazaqtarynyń ulttyq biregeıligin saqtaý maqsatynda mádenı-gýmanıtarlyq sharalar uıymdastyrý. Ekinshi, shetelge qonys aýdarǵan qandastarymyzǵa aqparattyq-konsýltasıalyq qoldaý jumystary uıymdastyrylyp, olardyń qoǵamǵa ıntegrasıalanýyna, ózekti máselelerdi sheshýine yqpal etý. Úshinshi, sheteldegi qazaqtardy jáne elge qonys aýdarǵan qandastardyń máseleleri boıynsha taldamalyq zertteý jumystaryn júrgizý. Tórtinshi, sheteldegi qazaq jastarymen baılanys ornatý.
Qoǵam uıymdastyrýymen 2019 jyly álemniń 25 elinen kelgen otandastardyń qatysýymen 5000 adamdy qamtyǵan 20-ǵa jýyq is-shara ótkizilse, 2020 jyly álemdi jaýlaǵan pandemıaǵa oraı barlyq jobalar onlaın formatqa kóshirildi. Osy rette álemniń 26 elindegi otandastardyń qatysýymen 5 800-den astam adamdy qamtyǵan 13 onlaın is-shara jáne 6 onlaın-joba uıymdastyryldy.
2021 jyly ZOOM baǵdarlamasy arqyly 20 eldi qamtyǵan 20 onlaın kezdesý ótkizildi. Bul sharalardyń barlyǵynda syrttaǵy aǵaıynnyń kóshi-qon, iskerlik, mádenı-gýmanıtarlyq máseleler men jobalarǵa qatysty usynystary men ótinishteri talqylandy.
Shetelde turatyn otandastarymyzdyń qazaq tili kýrstaryn uıymdastyrý úshin, Qoǵam 2019-2020 jyldary 12 elde 31 onlaın-synyp ashty. Onlaın-synyptar teledıdar, noýtbýk, kamera, taǵy basqa qajetti zamanaýı tehnıkalarmen qamtyldy.
Sonymen qatar shetelde turatyn etnıkalyq qazaq balalary Qazaqstanda ártúrli jazǵy lagerlerge qatysa alady. Atap aıtsaq: Nazarbaev zıatkerlik mektepteri uıymdastyrýymen ótken «Uly dala urpaǵy» bilim lageri, Baldáýren, «Týǵan elge saıahat» balalar týrısik poıyzy», «ZEREN» respýblıkalyq jazǵy lagerlerine shetelden 600 bala qatysty. 2020-2021 jyldary pandemıaǵa baılanysty jobalar ýaqytsha toqtatyldy. Degenmen aldaǵy ýaqytta jalǵasyn tabady.
