Azamatyn kinálideı tergegen
Áıeldi men buryn-sońdy kórmegem.
Júrekpenen ustamasań jigitti,
Júgendeýiń múmkin emes mórmenen!
Qulaǵyńdy túre berme ósekke!
Syrǵalynyń bári birdeı tósek pe?!
Súıgenińe sený kerek!
Al senseń,
Ár qadamyn nege alasyń esepke!?
Saǵat saıyn izdeý salar erińe,
Ol bir sondaı jyn-saıtan ba?
Peri me?
Álde ol sorly momaqan bir toqty da,
Áıel bitken shetterinen bóri me?!
Nar jigitke ár ýaqytta kóp serik.
Ne bolady azamattan ketse erik?
Al sen bolsań,
Shyldyrlatyp telefon,
Saǵat saıyn otyrasyń tekserip.
Dúnıede ne ǵajaıyp joq deısiń!
Kúz bop solyp,
Kóktem bolyp kókteısiń.
Mahabbatty shektemegen
Jer men Kók
Ot basymen qalaı ǵana shekteısiń?!
Taýsylsań da,
Taýyssań da taǵatty,
Túımegen jón, shytpaǵan jón qabaqty.
Birin-biri súıgen adam
Eshqashan
Bir-birine bolmaý kerek abaqty!
