Jetim ósken qyz edińiz panasyz,
Endi búgin jatqan baıtaq dalasyz.
El anasy boldyńyz siz,
Bolmaı she!
On azamat,
On balaǵa anasyz!
Adam jany órilmegen taspadan,
Adam – adam,
Uǵama ony tas nadan,
On balasy bar anany búgin de,
On ese artyq syılaý kerek basqadan!
Qyzyl shaqa sábı úshin egeste,
Kórmesti de kórdińiz-aý,
Kóbi este.
Bir on jylǵa qartaıtqanmen,
Ár qaısysy
On-on jyldan jasartty da emes pe?!
Ómir kóshi baqytqa bet burarda,
Ýaqyt shirkin bir orynda turarma?!
Nemereńiz bir komanda búgin de,
Jıenińiz, az degende, bir arıa!
Bilmesek dep dúnıeniń qysymyn,
Shotqa qaǵyp tabysy men túsimin.
Jaıalyqtan qashqan jandar bir kezde,
Júr qazirde ermek qylyp mysyǵyn!
Besiktegi nemereni «Kúnim!» dep,
Otyrsańyz siz terektiń túbinde,
Qıynynan qashqan jandar sábıdiń,
It jetektep qydyrady búgin de!
Qydyryńyz, kúı shertińiz, án salyp,
Qaıǵy sizdi qýmaıdy endi qamshy alyp.
Qansha kelin, qansha kúıeý balańyz,
Qudalar men qudaǵılar qanshalyq!
Arasynda oshaq penen besiktiń,
Aıdaı kezder ótipti, ras, esittim.
Sany qansha endi mine kún saıyn,
Sizdi kútip saǵynatyn esiktiń.
Bolashaqty bolmaıdy eken esh bilip,
Bar ǵumyryn ótkizem dep hosh qylyp.
Bóbek úshin qımaǵandar keshterin,
Baspanaǵa sımaıdy endi keshkilik!
Jortqanmenen qalmaıdy ǵoı iz qumda,
Júrmegen soń ulyń onda, qyz munda.
Qaltasynda júz myń qalmaq bireýdiń,
Bir murager joq biraq sol júz myńǵa!
Besik jyry ashady adam minezin,
Besik jyry – eń súıikti áýezim.
On balaǵa ana bolǵan adamǵa,
On birinshi bala bolam men ózim!
