İŃİRDİŃ İRGESİNDE
Qanatyn tańda jáıip qarshyǵa arman,
Erlik kún keýdesinen án shyǵarǵan.
Kúmis bult – táp– tátti bir saǵynyshtar,
Ernine gúl ǵumyrdyń tamshylaǵan.
Aı appaq, dala marǵaý, tún yzǵarly,
Taýlardyń syńǵyrlaıdy qyz bulaǵy.
Ashyǵan alpys eki tamyrymda,
Qymyz jyr qyz júregin qyzdyrady.
Qosylyp qanyma qan, demge demiń,
Aýyrsam, sol demińmen emdelemin.
Kinásiz sezimderden jaratylǵan,
Aı músin, nur dıdarly sen be óleńim.
Syr shertken ińir qyzdyń irgesinde,
Taýsylmas tátti armandar bir nesibe.
Maýjyrap keshpen birge bozala tal,
Qybyrsyz japyraqtar tildesýde.
Sybyrlap japyraqtar syrlasýda,
Taý besigi – saılardyń jylǵasynda.
Bitpeı tur bir ǵumyrdyń qupıasy,
Bir mınoty teń bolyp bir ǵasyrǵa.
MEN – DOMBYRA
Muńaımashy, sulý júz, muńly músin,
Syrlasaıyq júrekten muń jýylsyn.
Shanaǵymdy toltyrǵan saǵynyshqa,
Men – dombyra, sen – sonyń kúmbirisiń.
Jalynyshym – jylama, úıte kórme,
Sol dombyra sen úshin kúı tógerde!
Shanaǵyna sımaıtyn asaý tolqyn,
Seni ǵana súıedi, súıse eger de.
Zar jeldirip sardala sary atanyn,
Oıataıyn bebeýlep dala tańyn,
Jabyrqaǵan qaısy bir pendelerdiń,
Kúńirengen qaıǵysyn tarataıyn.
Tamyljyǵan tátti kúı – súıiktiler,
Sender joqta, keýdeme kúıik kirer.
Qos ishekten túlegen qyran shabyt,
Jer taǵysy jelshe esken kıikti iler.
Tyńda meniń sen ǵashyq tátti únimdi,
Tyńda meniń zarymdy, shattyǵymdy.
Tyńda meniń daýyldan jaratylyp,
Kúıge aınalǵan kúmbirli jastyǵymdy!!!
BÁRİN SAǴAN...
Óziń úshin keteıinshi joq qarap,
júregimdi lapyldaǵan otqa orap,
Aq júzińe juqqan kirdi jýýǵa,
Teńizderdi ákeleıin noqtalap.
Kún qýratyp, tońdyrsa da tún meıli,
Áýireńe bolaıynshy bir beıim.
Salqyn tańnyń samaly bop tap– taza,
Kirpigińe qonǵan shańdy úrleıin.
Tazalansyn keýdeńdegi buqqan muń,
Duǵasymen alastaıyn Luqpannyń.
Shólde qalsań, saǵan bastap jeteıin,
Órkeshine minip alyp bulttardyń.
Kele jatsa, kerdeń ósek jylystap,
Jyr tulparmen otyraıyn qýyp sap,
Qaltyrasań qatal qystyń ótinde,
Kúnniń shoǵyn ákeleıin ýystap.
Nurlantýǵa baqytyńdy qansha ýaq,
Aı betinen sáýle tóksin san shyraq.
Kóktem bolyp kólbirep kelip súıgizshi,
Gúl ernińnen kúmis kúlkiń tamshylap.
QARA BURYM
Qara burym – qara orman
ný alabym,
Kúrsinem de, qaıtadan qýanamyn.
Qýanǵanym, Qazaqtyń qyzy ekensiń,
Kúrsingenim, jaıyńdy suramadym.
Mazaq etip salǵandaı bulaq ánin,
Ony oılasam, tuńǵıyq, tuman aldym.
Sol kún áli esimde kúl bop janyp,
Erlik ólip, ez bolyp jylaǵanym.
Elesińdi tek ǵana, saqtar udaı,
Qańǵyrtpa dep tileımin jatqa, Qudaı!
Qos darǵydaı qos burym býyndyryp,
Qos jylandaı qos tildi, shaqqanyń – aı.
Sodan beri san sulý, san alypqa,
Jolyqtyq ta... tez jettik aǵalyqqa.
Túp– túp bolǵan kúzdegi quba taldaı,
Ketken shyǵar qos burym aǵaryp ta...
MEN SAǴAN SÓILESKENDE
Men saǵan sóıleskende;
Qarynym joq edi, darynym bar,
Jırma bestiń laýlaǵan jalyny bar,
Juregińde shapshyǵan taýdyń qany,
Taý sýyndaı ózińnen salymym bar.
Men saǵan sóıleskende ;
Jalpyldaǵan sham emes, jasyn edim,
Aq tamaq qyz sen ediń, asyl órim.
Otqa oraǵan júrekten lapyldap kep,
Ot bop tıgen ernime ǵashyq erniń.
Men saǵan sóıleskende ;
Mop– momaqan bıazi, súıkimdi ediń,
Jas qozydaı janyńdy túrtingemin.
Tirligimdi arbaǵan tilsim kúsh– aı,
Júregimdi jaýlaǵan kúlkiń, demiń.
Men saǵan sóıleskende ;
Men – Tólegen, sen – zerek, Jibekpe ediń ?
Qosobaǵa qaltyrǵan júrekterin.
Tasjarǵandaı aramyzdan tamyr alǵan,
Mahabbatymyzdy júdetpediń.
Men saǵan sóıleskende ;
Ósekter de sadaǵyn saılaǵan – dy,
Qala, dala, ańyrap saıǵa bardy.
Shyndyqtardyń aldynda julym – julym,
Bilesiń ǵoı, ósekter qaıda qaldy ?!
Men saǵan sóıleskende ;
Jyr da jazdym ózińe, saırap kórim,
Qyz aldynda qyrpýly, aıbatty edim .
Almas dúzdi qanjardaı jastyǵym – aı,
Budan da asaý, budan da qaıratty edim .
Men saǵan sóıleskende ;
Eńiretpeýge erteńdi serttesip em,
Sol úshin órt keship em.
Zulymdardyń oǵynan qıyn kúnde,
Sol asyl ar baqytty ,
Qolyna alyp jetkizdi ókpesimen!!
AQ TAŃYM
Aq tańym, araıly aspan, beıish nurym,
Óleńime senen tabam óristi uǵym.
Maǵan ǵana baǵyshtap jatqandaısyń,
Baılyǵyn, bar baqytyn jer ústiniń.
Sáýlesiń tún jamylsam, túnek bolyp,
Marqaıdym, tek ózińnen júdep kelip.
Jylasaq, qýansaq ta birge bolyp,
Ár sekontty kelemiz birge ótkerip.
Jylynar shuǵylańa qýat – kúshim,
Jaryq nur, kóktemgi ánim, shýaq músin.
Janar taý júregimdi aralaǵan,
Quzdan aqqan sap– salqyn bulaqbysyń?
Shomylyp janaryńnyń tereńine,
Basqa muń, basqa ýaıym... keregi ne!
Jalǵyz tal shashyńmenen baıla meni ,
Kóńildiń kók japyraq teregine.
Aq tańym, raýanym, kún – aıymsyń,
Qýanysh magan bergen Qudaıym shyn.
Sen – baqytym, shattyǵym, raıysym,
Sen adal da, sen taza, shynaıysyń!
Muratbek Mýsauly
6alash usynady
