Kógimnen sen kórin, juldyzym...
(Óleńder)
Dárıǵa Azatqyzy
Nap-názik beınemmen tal shybyq,
Ár tańan saǵynysh ańqydy, uq !
Mezgilder qoınynda búrleımin,
Tańdaıǵa tátti eles qaltyryp.
Kórdiń be, súıdiń be qyr qyzyn?
Qyrynda qaltyrǵan qyrmyzy ún.
Kóktemniń samaly jelpıdi,
Kógala kóılegim tym uzyn.
Kókpeńbek sekildi aspanym,
Tolqyndaı tolqıdy shashtarym.
Kókpeńbek kóktemniń kózinen,
Saǵynysh saparyn bastadym.
Kóz salyp qaýashaq gúlderge,
Taýsylmas saǵynysh júr mende.
Aqymaq qyzbyn-aý kúndi izdep,
Aı bolyp tyǵylǵan túnderge.
Súıdiń be, kórdiń be, qyr qyzyn,
Kók shalǵyn qondyrǵan gúlge izin.
Tún bolyp túnere qalaıyn,
Kógimnen sen kórin, juldyzym!
Qos ishegi teńshelmegen dúnıe-aı!
Meniń mynaý muńly beınem syńaıly,
Kóktem bulty kók júzinde jylaıdy.
Kóp elesiń kókirekten Gúl ashyp,
Seni únsiz saǵynǵanym unaıdy.
Kóktem gúlden, men kóktemnen suraımyn,
Taǵdyrymyz taǵdyryndaı kún aıdyń.
Saǵyntqanym sabyryńdy saryqqanymen,
Men de saǵan saǵyntýmen unaımyn.
Tandyr-tandyr bult kózinen jaýsyn án,
Jyr oqıyn oralǵan qus daýysynan.
Saǵynshpen sarǵaıady-aý sándi ólkem,
Jana-jana men de bir kún taýsylam.
Kók júzinde qaraǵanmen kúlip aı,
Júregim júr únsizdikten jylymaı.
Qonbaı ketken baqytymsyń tuǵyrǵa,
Qos ishegi teńshelmegen dúnıe-aı!
Saǵynysh
Yntyzar júregimnen óshpegende ot,
Mezgilsiz seni kúttim keshke eleńdep.
Saǵynǵan júregimdi jubatady,
Ermen dámdi dalamnyń eskegi emdep.
Eı, mezgil men súıetin ǵashyq kóktem,
Jupar dámdi saǵynsh shashyp kep pe eń? !
Júregimde búr jarǵan bir saǵynsh,
Men biraq, aıyqpaımyn ǵashyq dertten.
Jaýhazyndar Gúl ashqan janarda ónip,
Sarǵaıtyqan saǵynshtan janam neǵyp? !
Sarala qaz sańqyldap oralar ma? !
Sen júrgen mekenińnen habar berip.
Qıqýyna qustardyń qulaq túrgen,
Seniń balǵyn kúlkińdi unattym men.
Kóńil baqsham Gúl ashpaı tunjyraıdy,
Oransa da órkesh taý, qyrat Gúlmen.
Jiıeginde kúmis kún kúlkiń erip,
Kóz saldyń ba taýlarǵa bulty bórik.
Joq álde maǵan kele jatyrsyń ba?
Buıra-Buıra sáýirdiń bultyna erip.
Terbemeıdi takappar tańymdy úmit,
Bulyt kóshedi kógimnen aýyr kúlip.
Sáýir jeli sap-salqyn júzimdi ópken,
Taǵy seni qoıǵany-aı saǵyndyryp.
Jańbyrly tún
Bozamyq anaý sińirip dala tań nuryn,
Qasqaldaq taǵdyr tańdaıynda qalǵydy ún.
Sekildi meniń jylaýyq mynaý júregim,
Taǵy da kórdim dalanyń sońǵy jańbyryn.
Taǵdyr ma anaý sezdirmeı syılar tamshy baq,
Qaraımyn soǵan jaraly júrek qansyrap.
Móldir de móldir bulttardyń sulý monshaǵy,
Jatady únsiz júregime meniń tamshylap.
Aq jańbyr arman japyraqtarǵa jazyp muń,
Unynen sulý ham ókinshti naz uqtym.
Japyraq jalǵan janaryna sińgen jazymysh,
Tamyshydaı mende móldirmin ári názikpin.
Aq jańbyr jaýsyn mıllıon merýert sebelep,
Sebezgisinde mazdaıdy mendegi óleń-ot.
Toǵsyp turǵan aspan men jerde taǵdyr-bul,
Sezbediń sen, ne kerek!
Jańbyrdyń jasy aspannyń sheksiz tilsmy,
Jaýasyń jyr bop, túsindi eken kim tilyn?
Bulttaǵan aspan qabaǵyń seniń túnergen,
Naıraǵaı oty júrektiń yntyq dúrsili.
Naızaǵaı óshti, aspannan anaý sóndi lep,
Kók shalǵyn jaıdy kóılegin jelge kólbirep.
Japyraq júregiń jaıyldy sulý janyma,
Alaqanyńa qondym, tap-taza muńmen móldirep.
Japyraq sonda maısyp turdy kótermeı,
Kótermese, ǵaıyp bop máńgi ketem ǵoı.
Janyńnyń japyraǵyna, qalǵyǵan sulý sezimim,
Sol jańbyrdan soń,
Saǵynyshqa aılanyp,
Ushyp ketken eken ǵoı!
Dárıǵa Azatqyzy QHR Sanjy dúgen oblysy Shonjy aýdanynda dúnıege kelgen. Otbasylyq jaǵdaıǵa baılanysty joǵarylap oqı almasa da, qarshadaıynan óleńge aýestenen ol, búl kúnde ásem jyrlarymen óz oqyrmandaryn tánti etip júr. Ata-jurtqa jete almaı, alystan ańsap júrgen jas aqynnyń talabyna demeý bolsyn degen maqsatpen birqansha óleńderin oqyrman nazaryna usynyp otyrmyz.
