Eki jyldyń aldynda sheteldegi qazaq dıasporasy úshin eleń eterlik erekshe oqıǵa oryn aldy. Máseleniń mánisin ashalap aıtar bolsaq: Ulan-batyr qalasyndaǵy bir qazaq otbasynyń qyzdary, apaly-sińili Jeńisgúl men Anargúl áskerı saladaǵy úzdik qyzmetteri úshin polkovnık shenine ıe boldy. «Bir shańyraq astynda ósip-ónip, bildeı shenge birdeı qol jetkizgen aǵaıyndy qyzdar Shyńǵys han jurtynyń tarıhynda buryn-sońdy bolmaǵan» dep, jazyp jatyr mońǵolıalyq aqparat quraldary.
Polkovnıkterdiń ákesi Musabaıuly Qaýsylǵazy pedogogıka ǵylymdarynyń doktory, ǵalym adam. Jazǵan eńbekteri dál qazir qurlyq asyp, sonaý Amerıka mektepterinde oqytylyp júr. Anasynyń esimi – Qaıyrnısa Jálelqyzy. Otbasynda – tórt ul, eki qyz.
Úıdiń úlkeni – Anargúl Qaýsylqazyqyzy 70-jyldardyń sońynda Peterbordaǵy S.M. Kırov atyndaǵy áskerı-medısına akademıasyn bitirgen eken. Mamandyǵy áskerı dáriger. Uzaq jyl áskerı medısına salasynda qyzmet atqaryp, 1987 jyly ózi oqyǵan akademıada kandıdattyq dısertasıasyn qorǵap, sońynan Ulan-batyrdaǵy Qorǵanys ýnıversıtetinde medısına ǵylymdarynyń doktory ǵylymı ataǵyn alypty. Sonymen qatar ótken jyly qaryndasymyzǵa «Eńbek sińirgen dáriger» ataǵy da berilgen eken.
Al, ekinshi polkovnık Anargúldiń týǵan sińilisi Jeńisgúl 1966 jyly 10 sáýirde týǵan. Ulan-batyrda Keńes Odaǵy ofıserleriniń balalary oqıtyn №8 orys orta mektebin bitirgen. Jıyrma jasynda Mońǵolıa İshki ister mınıstrliginiń qatardaǵy bólimine hatshylyq qyzmetke tuıaǵy ilikken qyz úsh jyl ishinde ofıserlik quramǵa ótip, «hatshylyqtan bastap polkovnıkke jetken» ańyz adam retinde tarıhta aty qaldy.
Jeńisgúl 1998 jyly Reseı Federasıasynyń baıyrǵy oqý oryndarynyń biri – Reseı İshki ister mınıstrligine qarasty Peterbor ýnıversıtetinde doktorlyq dısertasıa qorǵapty. J.Qaýsylǵazyqyzy ózi qyzmet etken salanyń jedel tergeý-tekserý isi boıynsha uzaq jyl abyroıly eńbek etip, sońǵy jyldary qazaqtar shoǵyr qonystanǵan Baı-ólke aımaqtyq ishki ister basqarmasyn basqardy. Qazir zeınet demalysynda.
Beken QAIRAULY
