Túsimde Ospan batyr
Túnde meniń túsime Ospan kirdi,
Oıatty kókirekte jatqan jyrdy.
Marqasqa mańdaıyna jazyp qoıǵan,
Tolarsaqtan qan keshken toqsan jyldy.
Aıdaharmen alysqan alyp, myqtym,
Jalǵandy naızaǵaıdaı jaryp shyqtyń.
Qabaǵy qatýlandy qart Altaıdaı,
Janary jalyn shashyp jaryqtyqtyń.
Biraq ta aımadet er úndemeıdi,
(Taǵdyry bolmaǵan ǵoı tym mereıli).
Duǵaly aýyr dene jer qushqanmen,
Rýhyn has batyrdyń kim bógeıdi?
Qudaıdyń nury túsken bahadúrdiń,
Árýaǵy alty Alashyn shyn jebeıdi.
Sálden soń batyr eles boldy ǵaıyp,
Men únsiz duǵa qyldym qoldy jaıyp.
Janarymnan eriksiz jas domalap,
Tulǵasyn kórsem deımin taýǵa laıyq.
Oıanyp, bas kóterdim jastyǵymnan,
Kóńilim jar sekildi tasqyn urǵan.
Altaıdyń qasıetti has suńqary,
Sekildi qapylysta tasqa urylǵan.
İbilispen shaıqasyp, satylmastan,
Jekpe - jekke dushpandy shaqyrdy Ospan.
Sáýirdiń jırma toǵyz jańasy eken,
Qyzyl qytaı eńsegeı batyrdy atqan.
Oıhoı, ǵajap, túsime Ospan kirdi,
Oıatty shyndyq jaıly dastan jyrdy.
Arysy jer jastanǵan ańqaý qazaq,
Alpys alty kóktemdi attandyrdy...
Jaıdan-jaı túske enetin jan emes qoı,
Qyzylǵa jutylma dep saqtandyrdy.
Ádilet Ahmetuly
6alash usyndy
