1920 jyldyń 26 tamyzynda V.I.Lenın qol qoıǵan «Qyrǵyz (Qazaq) Avtonomıaly Keńestik Sosıalısik Respýblıkasyn qurý týraly» dekret qabyldanǵan. Osy oqıǵaǵa bıyl týra 100 jyl tolady. Bul – aıtýly tarıhı data. Osynaý qazaq qoǵamy úshin aıtýly, mańyzy zor, taǵdyrsheshti oqıǵaǵa oraı, biz oqyrmandarymyzdyń nazaryna tómendegi maqalany usynyp otyrmyz.
Abylaı han qaza tapqannan keıin-aq qazaq jerleri «ustaǵannyń aýzynda, tistegenniń qolynda ketkeni» tarıhtan málim. «Qaıran jerlerdi» túgendeý týraly 20-ǵasyrda memlekettik qujat túrinde alǵash ret 1919 jyly 10 sáýirde sóz boldy. Sol oqıǵanyń 100 jyldyǵy bıyl atalmaı ketti.
Alashordanyń joly qıylyp, úmit úzildi-aý degen shaqta, Keńestik eń joǵarǵy bılik – Búkilreseılik Ortalyq Atqarý Komıtetiniń jáne Halyq Komısarlar Keńesiniń «Qyrǵyz Avtonomıaly Keńestik Sosıalısik Respýblıkasy týraly» dekreti jaryq kórdi. Sóz joq, bul da Alash qaıratkerleriniń tabandy eńbeginiń jemisi edi. Qujattyń negizgi qaǵıdalary:
«I. RKFSR-nyń bóligi retinde Qyrǵyz Avtonomıaly Keńestik Sosıalısik Respýblıkasyn qurý jáne ákimshilik shekaralaryn belgileý:
a) Semeı oblysy: Pavlodar, Semeı, Óskemen, Zaısan jáne Qarqaraly ýezeri.
á) Aqmola oblysy: Atbasar, Aqmola, Kókshetaý, Petropavl ýezeri jáne Omby ýezeriniń bir bóligi.
- Qyrǵyz Avtonomıaly Respýblıkasynyń ortalyq organdaryn uıymdastyrý tolyq aıaqtalǵanǵa deıin ýaqytsha Aqmola jáne Semeı gýbernıalaryna baǵynsyn.
Sibir jáne Túrkistan quramynda ýaqytsha qalǵan Qazaq oblystarynda biryńǵaı saıasat júrgizý úshin, Sibir revolúsıalyq komıtetiniń jáne Túrkistan Ortalyq Atqarý Komıteti Prezıdıýmynyń quramyna Qazaq revolúsıalyq komıteti músheleri engizilsin;
Eskertpe: Bir jaǵynan Qazaq revolúsıalyq komıteti men ekinshi jaǵynan Túrkistan Ortalyq Atqarý Komıteti jáne Sibir revolúsıalyq komıteti arasynda Qazaq avtonomıaly respýblıkasyna qatysty aýmaq shekaralary týraly qaıshylyqtar týyndaǵan jaǵdaıda, bul máseleler RSFSR ortalyq mekemeleriniń qaraýyna jiberilsin».
Osydan keıingi ilgerili-keıindi, sátti-sátsiz oqıǵalar tizbegi búgingi táýelsizdik dáýirine kelip ulasty. 1919 jyly 27 tamyzda Reseıdiń Sibir ólkesin basqarý úshin, Ombyda Sibir tóńkeris komıteti ortalyǵy Petropavl bolǵan Aqmola jáne ortalyǵy Semeı bolǵan Semeı gýbernıalaryn bıledi. Osynaý ulan-baıtaq aımaqta 1916 jyly júrgizilgen sanaq boıynsha, beri qoıǵanda bir jarym mıllıonnan asatyn qazaq, keıin qurylǵan Kazrevkomnyń quzyretinen tys Reseıde qalyp qoıdy. Qazaq ASSR-nyń qurylýyna daıyndyq bastaldy.
Keńes ókimeti týraly jańa qurylmaq Qazaq keńestik avtonomıasy jaıly úgit-túsinik jumystaryn júrgizý úshin 1920 jylǵy 22 aqpanda Ombydaǵy Kazrevkom ókildigi janynan «Kedeı sózi» gazeti shyǵa bastady. Gazet betinde búkilqazaq quryltaıyn shaqyrýǵa daıyndyq jumystary júrdi. Redaksıa alqasyndaǵy M.Jumabaev, Ǵ.Toǵjanov, B.Serkebaev sıaqty qalamgerler Qazaq jumhurıaty jaıynda túsinikti ári áserli nasıhat júrgizdi.
Qazaq áskerı-revolúsıalyq komıtetiniń múshesi ári bolashaq Qazaqstan bıliginiń Búkilreseılik Ortalyq atqarý komıtetindegi ókildigi alqasynyń tóraǵasy retinde Álimhan Ermekov 1920 jylǵy 18 mamyrda Máskeýge baryp, Qazaq respýblıkasynyń shekara jigin anyqtaý, naqtylaý, daýly máselelerdi odaqtyq mekemeler arqyly sheshýmen aınalysty. «Máskeýge kelgen bette men V.Lenınniń tóraǵalyǵymen ótken keńeske qatysyp, Qazaqstandaǵy jaǵdaıdy baıandadym. Stolypın reformasy kezinde qazaqtardyń jeri jappaı tartyp alynǵanyn, Ertistiń sol jaǵasyndaǵy onshaqyrymdyq jolaq 1904 jyly kazaktarǵa berilip, qazaq halqynyń qýylǵanyn, Kaspııdiń soltústik jaǵasyna qazaqtardyń jolaı almaı otyrǵanyn aıttym» dep eske alady Á.Ermekov.
1920 jyly 20 shildede Qyzyljarda, 21-27 shilde aralyǵynda Kókshetaýda, 23-26 shildede Aqmolada, 2-5 tamyzda Atbasarda Keńesterdiń birinshi sezi bolyp ótti. Bul kezde Petropavl Omby ýezine qaraıtyn. 1920 jyly 9-10 tamyzda BOAK janynda V.Lenınniń tóraǵalyq etýimen Qazaq avtonomıasynyń Sibirmen shekarasy, onyń Reseımen ózara qatysy týraly máselelerdi talqylaýǵa arnalǵan keńes bastalardyń aldynda Petropavl ýeziniń qazaqtary jınalyp, Máskeýge mynadaı jedelhat joldady: «1920 jylǵy 4 tamyz. Biz, Omby gýbernıasy Petropavl ýezi 15 bolysynyń qazaqtary Qazaq respýblıkasynyń shekarasyn anyqtaýǵa arnalǵan komısıanyń qurylýyn qoldaımyz jáne etnografıalyq, tarıhı jáne ekonomıkalyq jaǵynan tyǵyz baılanysty Petropavl ýezi Qazaq ólkesiniń quramyna enýi kerektigine senim bildiremiz [SGAOR SSSR, 1318-qor, 1-tizbe, 141-is, 59-bet; «Obrazovanıe Kaz. ASSR», str. 244]. Osy qujatqa berilgen túsiniktemede jedelhatqa qol qoıǵan bolystardyń ókilderi týraly hattamanyń muraǵatta saqtalǵany kórsetilgen. Olar Keltesor, Saraıǵyr, Taıynsha, Jamantuz, Emenáli, Taýzar, Smaıyl, Aqqýsaq jáne Anastasev bolysynyń qazaqtary eken.
Shekara anyqtaý jónindegi Máskeýdegi keńeske Sibirrevkom da daıyndalyp, Reseı múddesin qorǵap, qazaq ólkesine Petropavl, Pavlodar, Semeı, Óskemen jáne basqa Qazaqstannyń soltústik jáne soltústik-shyǵys aýdandaryn bermeý týraly usynyspen bardy. Keńesti basqarýshy Sovnarkom tóraǵasy Lenın Sibirrevkom men Á.Ermekov bastaǵan qazaq delegasıasynyń ókilderiniń pikirimen tanysyp, Sibirrevkom usynysynyń «halyqtar arasyndaǵy arazdyqty kúsheıtetinin» aıtyp synady. Ol «burynǵy Qyr ólkesiniń batysy men shyǵysyndaǵy daýly aımaqty bólshektemeı, jańadan qurylmaq Qazaq avtonomıaly respýblıkasyna tutas qalpynda berýge» nusqaý berdi.
1920 jyly 26 tamyzda V.Lenın qol qoıǵan «Qyrǵyz (Qazaq) Avtonomıaly Keńestik Sosıalısik Respýblıkasyn qurý» týraly dekret jarıalandy. Dekretti júzege asyrý úshin qabyldanǵan qaýly boıynsha Qazaq Avtonomıasynyń quramyna: Semeı, Aqmola, Torǵaı, Oral oblystary; Zakaspıı oblysynyń Mańǵystaý ýezi; sol oblystyń Krasnovodsk ýezindegi 4 jáne 5 adaı bolystary; Astrahan gýbernıasynan: Sınemore bolysy, Bókeı ordasy, 1-shi jáne 2-shi Prımore okrýgine japsarlas jatqan bolystar. Qujattyń bir osal jeri – «Qazaq respýblıkasynyń Aqmola jáne Semeı gýbernıalarynyń basshylyǵyn qabyldaı alatyn ortalyq organdary túpkilikti uıymdastyrylǵanǵa deıin sońǵylary ýaqytsha Sibirrevkomynyń qaramaǵynda qala beretindigi» aıtylǵan .
1920 jyly 4-12 qazanda Orynborda Qazaqstan Keńesteriniń birinshi Quryltaı sezi ótip, onda Qazaq AKSR-nyń qurylǵany resmı túrde jarıalandy. Qazaq Ortalyq Atqarý komıteti Prezıdıýmynyń quramyna: S.Meńdeshev (tóraǵa), V.Radýs-Zenkovıch, Á.Jangeldın, S.Seıfýllın, B.Almanov, J.Sádýaqasov, Ǵ.Bókeıhanov, Á.Dosov t.b. kirdi. Erekshe nazar aýdaratyn bir jaı, S.Seıfýllınniń qatysýymen «Qazaq AKSR-nyń terıtorıasynda otarlaýdyń kez-kelgen túrine tyıym salý týraly» dekrettiń jasalýy edi. Qujattyń kóshirmesi S.Seıfýllın basqarǵan Jer komısıasynyń sheshimimen 30 qarashada RKFSR Jer halyq komısarıatyna jiberilgen. Bul – qazaq jerlerin otarlaýǵa zańdy túrde shek qoıǵan eń alǵashqy qujat bolatyn.
Degenmen qazaq jerlerin túgendeý ońaı bolǵan joq. Aqmola jáne Semeı oblystaryn Qazaqstan quramyna engizýde Ombydaǵy Sibir revolúsıalyq komıtetiniń (Sibirrevkom) músheleri ashyq qarsylyq kórsetkenin aıttyq. 1920 jyldyń ekinshi jartysynda olar Qazaqstanmen shekarany belgileý máselesin bes ret qarady. Tipti Qazaq AKSR-nyń qurylǵany jarıalanǵannan keıin de Aqmola jáne Semeı oblystaryn qaıtarý keıinge qaldyryla berdi. Osynaý uly tartysta Sáken Seıfýllınniń atalǵan eki oblysty Qazaq avtonomıasyna qaıtarýda erekshe tabandylyqpen ult múddesi úshin kúresken qaıratker ekendigin tarıhı qujattar dáleldep otyr.
1920 jyly 19 qazanda Sibir búrosynyń májilisinde Sibirrevkom ókili E.Polúdov Aqmola jáne Semeı gýbernıalaryn 1921 jyldyń 1 qańtaryna deıin Qazaq AKSR-yna qosý týraly sıeze qabyldanǵan qaýlyǵa qarsylyq bildirdi. Onyń oıynsha, «Sıez qazaq shovınızmi basym bolǵan jaǵdaıda ótken. Aqmola, Semeı oblystaryn qazaq ólkesine berý múmkin emes, bul Ortalyq Reseı úshin Sibirdegi astyq daıyndaý jumysyna kedergi keltiredi, azyq-túlik daıyndaý tapsyrysy negizinen osy eki oblysqa júktelgen. Jáne Qazaq AKSR-nyń ortalyq apparaty eki oblysty qabyldap alýǵa, basqarýǵa daıyn emes».
Sibirdegi komýnıs basshylardyń qarsylyǵyna Qazaq Úkimet músheleri qatty qınaldy. Ortalyq bılikke júginý ǵana qalǵan edi. Máseleni talqylaı kele, Qazaq Ortalyq Atqarý Komıteti Máskeýge Sáken Seıfýllındi jiberýge uıǵardy. «Mandat № 715. 11.Hİİ.1920. Qazaq OAK-i Prezıdıýmynyń múshesi S.Seıfýllın joldas Aqmola jáne Semeı oblystarynyń is-jaǵdaıymen tanys bolǵandyqtan, sol oblystyń ókili retinde 10. Hİİ. kúngi № 21 qaýlymen Máskeýge arnaıy jiberilsin jáne Qazaq AKSR-nyń ókilderimen atalǵan oblystardy Qazaq respýblıkasyna qosýdy tıanaqtasyn».
Máskeýdegi basshylarmen sheshetin asa qıyn, jaýapty tapsyrma Sákenge nege júkteldi degen suraqqa jaýap izdeý artyq bolmas. 1920 jyly 22 jeltoqsanda S.Seıfýllın Keńesterdiń Vİİİ sezine qatysyp, BOAK tóraǵasy M.Kalınınmen kezdesti. Aqmola jáne Semeı oblystarynyń qazaq halqyna tán ekendigin tarıhı-etnıkalyq dálelderge súıene otyryp sheshý úshin Tótenshe komısıa qurý kerektigi jóninde keńes aldy. Osylaısha, 1921 jyly 16 aqpanda Qazaq OAK-niń sheshimimen Aqmola jáne Semeı oblystaryn Qazaqstanǵa qosatyn jáne olardyń basqarý apparatyn jasaqtaıtyn Tótenshe ókildigi bar komısıa quryldy. Komısıanyń tóraǵalyǵyna S.Meńdeshev, músheligine S.Seıfýllın, Á.Dosov, Ǵ.Álibekov, P.Zaromskıı kirdi. Tótenshe komısıa jaıynda Ereje bekitildi. Bul jóninde S.Seıfýllınge berilgen № 654 mandatta: «Qazaq OAK-i Prezıdıýmynyń múshesi S.Seıfýllın Aqmola jáne Semeı oblystaryn qabyldap alatyn jáne olardy basqarý apparatyn quratyn Tótenshe – Ókiletti komısıanyń múshesi. S.Seıfýllınniń quqy men ókilettiligi Qazaq OAK-niń İ-sessıasynda qabyldanǵan komısıa týraly Erejege sáıkes belgilendi» delingen. S.Seıfýllınniń mundaı asa jaýapty memleketaralyq másele sheshetin komısıaǵa múshe bolýy kezdeısoq emes. Sebebi Qazaq respýblıkasy aýmaǵynyń tutastyǵyn qalpyna keltirýdegi kókeıkesti máseleni sheshýde S.Seıfýllın buǵan de-ıin respýblıkalyq Ákimshilik komısıasynyń quramynda istegen jáne Jer komısıasyn basqaryp, tájirıbeden ótken. Aqmola jáne Semeı oblystarynyń tarıhı-etnıkalyq jáne geografıalyq jaǵdaıyn jaqsy biletin, munyń aldynda osy másele jóninde Ortalyqtaǵy basshylarmen tildesken, moınyna alǵan isti aıaǵyna deıin jetkize alatyn tabandy qaıratker bolatyn (1920 jylǵy 11 jeltoqsandaǵy № 715 mandatqa qarańyz).
Quryltaı seziniń sheshimderine qaramastan, jańadan qurylǵan Qazaq respýblıkasynyń shyǵys shekaralaryna qatysty túıtkil máseleler 1921 jyldyń basynda da sheshile qoımady. Osyǵan baılanysty 17 naýryzda Á.Áıtıevtiń qolymen Máskeýdegi joǵary bılik organdaryna Sibirrevkomnyń is-áreketine narazylyq hat joldandy. Sol kezde qazaqtyń bir súıem jeri úshin jan sala kúresken qaıratkerlerdiń eńbegin kózge elestetý úshin myna qupıa qujatqa kóz salaıyq. KazSIK tóraǵasy ári Qazaqstan shekarasyn retteý týraly tótenshe komısıanyń basshysy Seıitqalı Meńdeshevtiń 1921 jyly 19 naýryzda Petropavldan Máskeýge joldaǵan shuǵyl jedelhatynda bylaı delingen: «SQOMM, 43-qor, 1-t Qupıa. Máskeý. Qazaqstan ókildigine. BOAK múshesi Myrzaǵalıevke. Shekara jónindegi pikirim mynadaı: Semeı gýbernıasy, Ertis jáne Pavlodar aýdandaryn qaldyrý týraly tabandy bolyńyz. Al, Omby qalasyn Qazaqstanǵa qosý jóninde másele asqynatyn bolsa, kúshtemeı-aq qoıyńyz. Bizdiń ókilimizdiń Ertiske shyǵýy (ıaǵnı, Ertiske qol jetkizý ) týraly usynysymyzdy ótkizý qajet. Eń bolmasa, Omby ýeziniń qazaǵy basym bóligin alyp, Ertiske qol jetkizýmen shektelýge bolar. Esińizde bolsyn, bul máseleni federaldyq bıliktiń aldyna qoıǵanda, bul qazaqtar Omby ýezinde qalsa, sózsiz qyrǵynǵa ushyraıdy, biz olardy aman saqtap qalýǵa kúsh salyp otyrǵanymyzdy jetkizińiz»
Sol kúni Tótenshe komısıa músheleri Petropavldan Ombyǵa kelip, Sibirrevkommen eki jaqtyń 10 adamynan birikken komısıa qurylyp, 26 kún jumys istedi. «Jumys istedi» degen eki sózdiń astarynda qansha aıtys-tartys, ult múddesi, jer daýy, saıası kúres jatqandyǵy saqtalǵan qujattarǵa qarap otyryp, mynadaı birneshe oqıǵamen sıpattaýǵa bolar: 1921 jyldyń 12 mamyryna deıingi aralyqta komısıa 6 ret, búro májilisi 15 ret jınaldy. Bastapqyda uıymdyq máselelerde kelisimge kelgenimen, memleketaralyq shekaraǵa baılanysty máselede Sibirrevkomynyń ókilderi shovınısik, ultshyldyq pıǵyldaryn aıqyn kórsetti.
Óte tartysty jaǵdaıda ótken 1921 jylǵy 7 sáýirdegi birikken komısıa májilisinde eki jaqtyń múddeleri qaıshy keldi. Májiliske Sibirrevkom jaǵynan Chýskaev, Mıheev, Dýbrovskıı, Temkın, Shısha, qazaqtardan: Meńdeshev, Seıfýllın, Zaromskıı, Dosov, Álibekov, Sergeev, Áıtıev, Popov qatysty. Sibirrevkom jobasyn qorǵaǵan Chýskaev: «Sibir men Qazaq respýblıkasynyń shekarasy degenimiz tek shartty túrdegi túsinik, ekeýiniń arasyna qalqan qoıý qajet emes. Sibir jerinde qalatyn qazaqtardyń múddesi orys turǵyndarmen birdeı qorǵalady. Pavlodar ýeziniń soltústik bóligi Sibirge qaraýy kerek, óıtkeni bul aýdannyń tuzdy kólderi Sibir úshin óte mańyzdy» degendi kóldeneń tartty. Bul pikirdi qazaq ókilderi keri serpip tastady. Olar: «Qazaq respýblıkasyn qurǵan ýaqytta onyń negizine etnostyq prınsıpter alynǵanyn, al ekonomıkalyq prınsıptiń tek qosalqy ǵana máni bar» dep Sibirrevkom múshelerine mynadaı talaptar qoıdy:
– Semeı gýbernıasynan Pavlodar ýeziniń bólinýi sharýashylyq damýyna nuqsan keltiretindikten, bul talap oryndalmaıdy;
– Qazaq ókildiginiń shekara jónindegi nusqasy qabyldanýy qajet. Omby ýeziniń qazaqtar mekendeıtin bóligi tolyǵymen Qazaq respýblıkasyna qosylady. Temirjol qatynasy Esilkól stansıasy arqyly júrgiziletin bolady;
– Esil ýeziniń 13 bolysy Qazaq respýblıkasyna qosylýy kerek;
– Buqtyrma ýezi Semeı gýbernıasynyń aýmaǵynda, sondyqtan Qazaq respýblıkasyna sózsiz berilýi kerek.
Qazaq qaıratkerleri Sibirrevkom daıyndap, usynǵan joba Qazaq memleketiniń ulttyq tutastyǵyn bólshekteýge ákeletinin túsindi. Sondyqtan eki jaqtyń birikken komısıasy «Shekara máselesi jóninde kelisimge kele almaǵandyqtan, aqtyq sheshim shyǵarý BOAK-niń qaraýyna berilsin» degen qaýlymen taraýǵa tıis edi. Degenmen qazaq ókilderiniń ózindik kózqarastaryn berik ustaýy men tabandylyǵy arqasynda májilis sońyna qaraı birikken Sibir qazaq komısıasy bir sheshimge toqtady. S.Seıfýllın, Á.Dosov, S.Meńdeshev jáne P.Zaromskıı qol qoıǵan qaýlyda: «Semeı gýbernıasy 20 sáýirden bastap Qazaq ólkesine beriledi» delingen.
9 sáýirde E.Polúdovtyń jetekshiligimen ótken kezekti búro májilisinde ortalyǵy Petropavl qalasy bolatyn Aqmola gýbernıasynyń 7 adamnan quralǵan jetekshi tobyn qurý máselesi qaraldy. Tóraǵasy Á.Áıtıev bolyp, Korotkov, Barleben, Asylbekov, Sháripovterden quralǵan revolúsıalyq komıtet bılikti qolǵa aldy. Tótenshe komısıanyń uıǵarymymen «Seıfýllın joldasqa jańadan qurylǵan Aqmola gýbernıalyq revkomynyń jumysyna járdemdesý tapsyryldy» degen qujat saqtalǵan. S.Seıfýllınniń ult múddesin qorǵaý jolyndaǵy qaıratkerligi komısıa jáne búro májilisterinde talas týdyrǵan máselelerdi sheshýdegi belsendiliginen aıqyn kórinedi. 22 sáýir kúni ótken májiliste Aqmola gýbernıasynyń halqyn azyq-túlikpen qamtamasyz etý jaıy qaralǵan. Eki jaqty komısıa belgilegen sharalardyń oryndalýyna kóz jetkizý úshin S.Seıfýllınniń usynysymen atalǵan másele 30 sáýir kúngi májiliste qaıta qaralyp, Aqmola gýbernıasy ýezerin astyqpen qamtamasyz etý, memleketke astyq jáne mal ónimderin daıyndaýdy toqtatý máseleleri oń sheshimin tapqan.
1921 jyly 10 mamyrdaǵy májiliste «Aqmola jáne Semeı oblystary ákimshilik jaǵdaıynda 10 mamyrdan bastap, Qazaq respýblıkasyna qaraıdy» degen qaýlyǵa S.Seıfýllın de qol qoıdy. Osy kúni asa mańyzdy birneshe máseleler óz sheshimin tapty. Atap aıtsaq, munyń aldynda 18 sáýir kúni qaralǵanymen, aıaqsyz qalǵan Omby qalasyndaǵy joǵarǵy oqý oryndarynda Aqmola jáne Semeı gýbernıalary jastaryna oryn berý týraly Sibir halyq aǵartý bólimine usynys jasaý máselesi de Seıfýllınniń talap etýimen tıanaq tapty.
Komısıanyń Máskeýge júgingen talaptary qazaq paıdasyna sheshilgeni týraly habar jetti. Eki jaq kelisimge kelip, 11 mamyrda Sibirrevkom jáne Qazrevkom ókilderi májilisiniń sheshimimen Aqmola jáne Semeı gýbernıalary Qazaq AKSR-yna qaıtaryldy. 1921 jyly 12 mamyrda S.Meńdeshev pen RK(b)P OK Sibir búrosynyń hatshysy V.Iakovlev barlyq partıa organdarynyń Sibir qaramaǵynan Qazaq AKSR-yna berilgendigi, Semeı jáne Aqmola gýbernıalyq komıtetterine Sibir búrosymen qatynas jasaýdy toqtatý, Orynborǵa sózsiz baǵyný jónindegi aktige qol qoıdy.
Komısıanyń uıǵarýymen taıaýda qosylatyn eki oblysta keńester saılaýyna daıyndyq jumystaryn júrgizý qaraldy. S.Seıfýllınge eńbekshi qazaq halqyna keńester saılaýyna baılanysty úndeý daıyndap, ony gazet betine jarıalaý jáne jemqorlyq pen paraqorlyqtyń jolyn kesý keńes organdarynyń baqylaýynda ekenin atap kórsetý tapsyryldy. Qazaqstan men Reseı arasyndaǵy jer daýy osylaı sheshilgen. «Kırrespýblıkanyń shekarasy týraly» Búkilodaqtyq Atqarý komıtetiniń 1922 jyly 26 qańtardaǵy qaýlysymen birjola hattalyp, soltústik-shyǵystaǵy aýmaqtar Qazaqstan qaramaǵyna berilip, qazaqtyń baıyrǵy jerleri múmkindiginshe birtutas qalpynda saqtalyp qaldy.
Zarqyn TAISHYBAI,
Qazaqstannyń eńbek sińirgen qaıratkeri
"Astana aqshamy"
6alash usynady
