اقىن، ۇلاعاتتى ۇستاز ءشامشابانۋ قامزا قىزى 1940 جىلى شاۋەشەك قالاسىنىڭ اقسۋ اۋىلىندا دۇنيەگە كەلگەن. 1955 جىلى شينجياڭ ينيستيتۋتى ادەبيەت ماماندىعىنا وقۋعا ءتۇسىپ، 1959 جىلى ءۇرىمجى ونەركاسىپ – قاتىناس تەحنيكۋمىندا وقىتۋشىلىق ساپارىن باستايدى. ءبىر مەزگىل شينجياڭ جاستار ورەندەر باسپاسىندا قىزمەت ىستەگەن ول 1970 جىلدان 1978 جىلعا دەيىن بوراتالا وبىلىسى جىڭ اۋدانى داحيانزى اۋىلى ورتا مەكتەبىندە ءتىل–ادەبيەت مۇعالىمى بولادى. 1978 جىلدان 1984 جىلعا دەيىن ءۇرىمجى قالالىق 14 ورتا مەكتەپتە مۇعالىم، 1984 جىلدان باستاپ شينجياڭ وقۋ اعارتۋ ينيستيتۋتىندا ادەبيەت مۇعالىمى بولىپ، 1998 جىلى دوتسەنت اتاعىمەن زەينەتكە شىعادى.
1956 جىلى «تاۋ بۇلاعى» اتتى ولەڭىمەن ادەبيەت الابىنا اياق باسقان ول سونان بەرى كوپتەگەن جىر جيناقتارى مەن پروزالىق شىعارمالىن جيناق ەتىپ جاريالادى. كەيبىر تانىمدىق ەڭبەكتەرى حالقارلىق سىيلىق ەنشىلەگەن. شامشابانۋ مەملەكەتتىك جازۋشىلار وداعىنىڭ مۇشەسى، مەملەكەتتىك قالامگەرلەر قوعامىنىڭ تۇراقتى جوراسى، شينجياڭ قالامگەرلەر قوعامى ءتوراعاسىنىڭ ورىنباسارى، ءۇرىمجى قالالىق ساياسي ءماسليحات كەڭەسى 5-6 كەزەكتى قۇرىلتايىنىڭ ەكى كەزەك مۇشەسى بولعان. ەسىمى ەلىمىزدەگى كوپتەگەن تومدارعا ەنگىزىلگەن.
كوكتەم كەلدى
تابىستىڭ باسى كوكتەم دە كەلدى،
قۇلپىرار دالا كىلەمدەي تۇسپەن،
تاسىعان شابىت كەۋدەمدى كەردى،
تاماشا مەنىڭ جەرىمدە وسكەن.
ارناعا سيماي الكۇرەڭ تاسقىن،
قۇزداردان قۇلاپ، بەلدەردى اسقان.
كوك ءجۇزىن شارلاپ، تامىلجىپ جاقسى ءۇن،
كۇلىمدەپ كوكتەم قۇشاعىن اشقان.
اعىزدىق سۋدى، توعاندى جوندەپ،
ديحان دوس جۇرگەن وڭىرگە قارا.
جابدىعىڭدى الىپ ەڭبەككە كەل دەپ،
كۇلەدى اتىز بۋسانىپ قانا.
پوەزدە
وت اربا-مەنىڭ كولىگىم،
ويقاستاتىپ باسا بەر.
مەيىرى ىستىق وتانىم،
قۇشاعىڭدى اشا بەر.
تەرەزەدەن سىرت جاققا،
قاراپ كەلەم قىزىعىپ.
ءساندى قالا، سارى دالا،
قالىپ جاتىر ءتىزىلىپ.
كەڭ بايتاق ءوڭىر كەرىلىپ،
كورىنەدى كوسىلىپ.
كوگەندەۋلى كوپ ۆاگون،
كەلەدى ەلدى كوشىرىپ.
جۇرگەن سايىن اپتىعىپ،
سوعادى جۇرەك ەكپىنمەن.
سوعۋىن جۇرەك وتانعا،
ماحابباتى دەپ بىلگەم.
قىزىعىڭدى وتانىم،
تاماشالاپ كەلەمىن.
اڭساعان ارمان لەبىزى،
قاعادى كوڭىل ەلەگىن.
جۇيتكيدى پويەز كۇركىرەپ،
تاۋلاردىڭ سەسىن تىڭداماي.
اۋزىنان اق بۋ شاشادى،
كومىردى قىلعىپ تۋراماي.
جۇرگەن سايىن ارىندى،
تىنار ەمەس سولعىنداپ.
اقباس تاۋ بوعدا ارتىمدا،
قالا بەردى قول بۇلعاپ.
قالىپ جاتىر قاز – قاتار،
تارلان بەلدەر تالپيعان.
قۇلا تۇزدە كەشەگى،
شارىقتاپ بۇگىن شالقيدى ءان.
جاتقان جەر بار ءالى دە،
قۇلا قۇمى ەسىلىپ.
قۇم قۇشاقتاپ قۇتىرا،
سوعادى جەلى ەسىرىپ.
جول جاعالاي ديحاندار،
جۇرسە ەگىنىن ءوسىرىپ.
جاراسار ەدى كورىكتى،
كوك ورمان جاتسا كوسىلىپ.
6alash ۇسىندى
