سەرىك قاپشىقبايەۆ 1935 جىلى تولى اۋدانى بارلىق تاۋى باۋرايىندا ومىرگە كەلگەن. 1953 جىلدان باستاپ قولىنا قالام العان ول «ءومىر ويلارى»، «ەرىكتى ءسوز»، «جىلدار اراسىندا»، «جىلقى ىشىندە الا ءجۇر»، «كۇن شىعىس» قاتارلى ولەڭ داستاندار جيناعىن، «زارداپ» اتتى اڭگىمە پيەسسالار جيناعىن، «جوق» اتتى رومانىن باسپادان شىعاردى. ول جۋڭگو جازۋشىلار قوعامىنىڭ فولكولورشىلار قوعامىنىڭ مۇشەسى، جۋڭگو از ۇلت جازۋشىلار عىلىمي قوعامىنىڭ مۇشەسى، مەملەكەتتىك، رايوندىق سىيلىقتاردىڭ يەگەرى. جۋڭگو قازاق ادەبيەتىنىڭ پوەزيا جانىرىندا تاماشا جاڭالىق اشقان الۋەتتى قالامگەر. سەرىك قاپشىقبايەۆ 2018 جىلى قاڭتاردا ومىردەن وزدى.
اي
كەشتىم تۇندە پىشەندىكتى،
سۋىقسىراپ سانىمنان مەن.
كوك پىشەننىڭ ءنىلى جۇقتى،
سىبدىرلاتقان قاعىپ تىزەم.
ۇيىقتاپ ساۋلە قۇشاعىندا،
اق تۇمانعا تاۋ ورانىپ.
قالىڭ جۇلدىز ۇقساپ قۇمعا،
شەمىرشەكتەي تۇردى اعارىپ.
كەرىپ قۇجىر بۇلت اراسىن،
جول تۇسپەگەن شىڭ سەكىلدى.
ءوتىپ تاعى جارقىلدايسىڭ،
جاس ۇمىتكە جانداي مۇڭلى.
ەكەۋ بولىپ جۇرسەك كورىم،
قاسىڭا ەپتەپ شىقسام مەن دە.
باقىتىم بار ءبىراق مەنىڭ،
سورىم دا بار جەر بەتىندە.
تيانشان
قارا كوزىم تالىقتى،
ءتىلىم-تىلىم جالىڭا،
سويلەتكىم كەلدى تاريحتى
وزىڭىزدەي شالىما.
سوكپە بالاڭ سۇراعىش،
سويلەتىپ تاريح قاشانعى.
تارتقان پاتەس شىلاۋىش،
وزىڭىزدەي اپامدى.
جەردىڭ كۇمىس كىلتىسىڭ،
اشقان كوكتىڭ قۇلىبىن،
جۇلدىز بەن ايدىڭ بۇرىشىن،
جامىلعان توبە، يىعىڭ.
سەبەبى كەلگەن جوعالماي،
ۇستىڭدە سالعان ۇياسى.
تارىم مەنەن جوڭعارداي،
الىپتىڭ جاعىراپياسى.
انشەيىن ءبىر تىيانشان،
تاۋ ەمەسسىڭ اۋكەلى.
كەرەمەتكە ۇمتىلعان
جەتپەسەدە داۋلەتى.
كەشكە جاقىن تۇر شالىپ،
جارتى الەمدى كولەڭكەڭ.
قۇزدارىڭدى اينالىپ،
كۇن شىعادى تاڭەرتەڭ.
كۇن اپارىپ قاسىنا،
ەرىتە الماي مۇزىڭدى.
اپپاق اياز باسىڭا،
سونىڭ كوڭىلى بۇزىلدى.
قانداي بولسا ۇلى اسپان،
سونداي سەنىڭ ٴتوسىڭ دە.
اۋمايدى سىرتىڭ جۋاستان،
ايبارىڭ بار-اۋ ىشىڭدە.
بولسا دا بويىم قىسقالتاڭ،
قول سوزاتىن اداممىن.
سەنى عانا ۇقساتام
ويىنا ۇلكەن زاماننىڭ.
ۇستىندە تۋ جەلبىرەپ،
گرانيتتى جوتانىڭ،
ءبىر كول جاتتى مولدىرەپ،
كوزىندەي كۇڭگىرت بوتانىڭ.
كوردىم سىمىرە تارتۋىن،
بەس مىڭ جىلقى سۋاتتان.
تاۋدىڭ مەشەۋ اق نۋىن،
مالشىلار قولى قۇلاتقان.
6alash ۇسىندى
