سادەن ءانۋار ۇلى 1942 جىلى جۇڭگو، شىڭجاڭ التاي ايماعى، جەمەنەي اۋدانىندا دۇنيەگە كەلگەن. 1960 جىلى شىڭجاڭ ينيستيتۋتىنىڭ تىل-ادەبيەت ماماندىعىن بىتىرگەن. مەكتەپ بىتىرىسىمەن جەمەنەي اۋداندىق 1-ورتا مەكتەپتە 20 جىل وقىتۋشىلىق قىزمەتىن اتقارعان. كەيىن جەمەنەي اۋداندىق مادەنيەت مەكەمەسىندە قىزمەت ىستەپ زەينەتكە شىققان. ول سوناۋ 1950 جىلداردان باستاپ ادەبيەت شەبىنە ارالاسىپ، كوپتەگەن ولەڭ، داستان، تولعاۋلارى ارقىلى وقىرمانداردىڭ جاقسى باعاسىن الىپ جۇرگەن اقىندارىمىزدىڭ ءبىرى بولاتىن. سادەن ءانۋار ۇلى 1993 جىلى قايتىس بولعان.
قارلىعاش
قارلىعاش! بارماقتاي قۇس بولساڭداعى،
جاتىر عوي ءون بويىڭدا وي سالماعى.
ريزامىن كىر شالماعان اق توسىڭمەن
ولەڭ – جىر ساباعىنا قونساڭ ماڭگى!
قارلىعاش! سۇيىكتى ەدىڭ سونشا نەتكەن،
قالىقتاپ ماسايرايسىڭ بولسا كوكتەم.
سەزىمتال جاس سۇلۋ دا سەكەم الماس،
بۇلقىنعان بۇرىمىنا قونساڭ ەپپەن.
ەن دالا! تارتتىم شالعاي قارا كەرمەن،
اتانعام اۋىلىما بالا مەرگەن.
قارلىعاش! ات كەكىلىن جاناپ ۇشساڭ
وزىڭدەي جانعا جۋىق جازام ولەڭ!
اش ءبورى الا بەرسە جۇرت تىنىشىن،
مەن دەرەۋ جالعىز وقپەن قۇرتتىم مىسىن.
سەن سوندا تاۋەتىڭدى كوتەرىپ كەپ
جەڭىپ ەڭ ابجىلاندى مىقتى قۇسىم.
وسىناۋ تاڭعاجايىپ قىزىق الەم،
كەلەم ۇعىپ كيەلى سىرىن ارەڭ.
قارلىعاش! ۇيىمە كەپ سالساڭ ۇيا،
«قارلىعاش» دەپ ات قويدىم قىزىما مەن.
قوس قارىلعاش، قاناتىن قاقسا جىلدام،
جانىم شالقىپ كوزىمنەن جاس تامىزعام.
«قارلىعاش» بوپ جىرىمنىڭ تاقىرىبى
قارلىعاشتى قاستەرلەپ ايتقامىن ءان.
جاڭا جۇرت
شوگەرگەن تۇيە تابىلماس،
ۇيىرىلگەن قالىڭ شالعىنعا،
اۋىلىڭ قوندى قارىنداس،
كەرەگە كوگىن جايدىڭ با؟
تىماعىڭ تۇسسە تابىلماس،
ورالعان قالىڭ شالعىنعا،
اۋىلىڭ قوندى قارىنداس،
ۋىقتار قارنىن تاڭدىڭ با؟
اۋىلىڭ قونىپ، اۋىلىڭ
ءۇي تىگىلدى ال مۇندا،
جالت قاراپ جىگىت جۇزىنە
شاڭىراق كوزىن تايدىرما.
سىبانىپ ەكى كەڭ جەڭىن،
باقان اپ جىگىت كەلەدى،
شاڭىراق ءۇنسىز شەڭبەرىن
توبەسىندە ونىڭ كەرەدى.
ىسقىلاپ ۋىق ارقاسىن،
تۋىردىق جايار قاناتىن.
دالانىڭ سۇرعىلت جار تاسىن،
قۇشاقتار ءۇنسىز قارا ءتۇن.
تەكەمەت استى قالىڭ ءشوپ،
ەتەدى گۇرىپ– گۇرىپ وتىرساڭ،
قازاننىڭ استى جالىن شوق،
قالپىنا كەپتى-اۋ اشۋشاڭ.
كوبىگى شىعىپ كوش اتتىڭ،
تاڭ اسار تەرەڭ تۇبىندە،
جىلتىرار وتى وشاقتىڭ،
جاڭا جۇرت سەنىڭ تۇنىڭدە.
كۇن
كۇن دەگەن – ءبىر سۇراپىل قىزۋلى نۇر،
عالىمدار كەۋدەسىندە سىزۋلى بۇل.
ول ءبىراق ورتەمەيدى دۇنيەڭدى،
جاراتار ادامزاتقا ۇزىن عۇمىر.
جاۋىزدىق كۇن داڭقىنا كىر جۇقتىرعان،
سان رەت سان عۇمىردى تۇنشىقتىرعان.
وسىلاي كۇننىڭ ءورىم شۇعىلاسىن،
باقىتتى باسقا ۇراتىن بيشىك قىلعان!
6alash ۇسىنادى
