بابامنىڭ باسى قالعان قۇلا قىردا،
بوزدايدى سەكسەۋىلدەر قۇبا قۇمدا.
قورقىتتىڭ قوبىزىنىڭ مۇڭ مەن زارى،
قۇيىلعان ۇجدان بولىپ، قۇلاعىما
تاۋىنداي جيدەلىنىڭ تۋعان ارمان،
قازاقتىڭ دومبىراسىن تىڭدا عالام!
سورعالاپ قوس ىشەكتەن «سەرپەر»، «اداي»،
جەتكىزدى بوزشولاقتار جىلدان امان.
دومبىرا ابىزداردىڭ اماناتى،
جۇزىندە الداسپاننىڭ زار جىلاعان.
«اقتابان شۇبىرىندى، القاكول سۇلامادان»
وشكەن وت، كوشكەن جۇرتتان ءان قۇراعان.
بالبالدار، عۇندار جاتقان دالاسىندا،
باۋىرىنا باسقان بايتاق، بار اسىلدى.
كىسىنەپ كۇرەڭىندەي كۇلتەگىننىڭ،
تاۋىسار «بالبىراۋىن» تاعاتىڭدى.
قان تامسا ماحامبەتتىڭ ساداعىنان،
تەبىنىپ ەر يساتاي سالار ۇران.
جۇلقىنىپ «كىسەن اشقان»، «تۇرمەدەن قاشقان»
توگىلەر دومبىرامنىڭ شاناعىنان.
سۋسىعان سۇلەي دۇنيە ساۋساعىمنان،
دۇلدىلدەي كەرمەدەگى تاۋ ساعىنعان.
توركىندەپ «تورەمۇرات» كەتتى انە ەندى،
بۇيىرعان ماڭداي باعىم بالشاعىمنان.
ەسىمدە ەر كوكشەنىڭ بال بۇلاعى،
بال بۇلاعى ءشولىمدى قاندىرادى.
قانىمدا تۋلاپ جاتىر تولاعاي كۇي،
«سارىارقا» جالعان دۇنيە قالدى ءبارى.
كۇي قالىقتاپ قۇستاردىڭ قاناتىندا،
قاناتىندا قامالىپ قالاتىن ءان.
كۇي اقيقات، نامىستىڭ كوك بايراعى،
قازاق دەگەن دومبىرا، دارا تۇلعا.
كۇي حالىقتىڭ تاريحى، ارتتاعىعا،
ۇركىپ كەتكەن جۇلدىزداي اسپانىڭا.
داۋعا شەشىم، جاۋىنا كەشىرىمدى،
توبە ءبيى سەكىلدى قاقپاعىلدا.
رۋحىما ۇلىلىقتى قۇيادى اق تاڭ،
كوكىرەگىمە كۇي بولىپ سيادى اسپان.
قاراپايىم قازاقتىڭ دومبىراسى،
ون سەگىز مىڭ عالامدى ۇيالاتقان.
كوڭىلىنەن ۇشىرسا كۇيشى ءۇمىت،
ءبورى تۇرار بەلدەۋدە، ۇيقىلى ۇلىپ.
قۇلاگەردەي زىمىراپ قۇبا تۇزدە،
ءتورت قۇبىلا ءان جۇتسىن، كۇي ءسىمىرىپ.
عالامات داۋىل سوعار، قانىمدى الىپ،
جانارتاۋداي لاپىلداپ جانىپ-جانىپ.
قۇلىنداي ويناقتاعان مامىرداعى،
تىم سيقىر «ءالقيسا» كۇي ارىمداعىپ.
ءھام ساعىنىش دومبىرا، سەندە ساۋعام،
سەندە ساۋعام سارپالداڭ تەربە سارمان.
ساقتاعان ساق بابامنىڭ سان تاريحىن،
تەڭدەۋسىز، تالىمدەرمەن تەڭدەسە العام.
وسىنداي قاسيەت بار شاناعىڭدا،
شابىت قۋعان جىراۋلار جالعاسۋدا.
قيا باسسام اتانىڭ سوقپاعىنان،
پەندەلىكتەن پەرىشتەم ار باسۋدا.
و، دومبىرام! بايراعىم كوتەرەتىن،
كۇي بولىپ كۇمبىرلەسە كوشەلى ءتۇن.
ونەردىڭ كىر كەلتىرسەم وزەگىنە،
ءاز ەلىم، كارى جاندى كەشىرەرسىڭ.
قاجىدىم، تۋعان جەردەن كۇي كەشەمىن،
كۇي كەشەمىن، تاۋلارمەن تىلدەسەمىن.
قازاقتاي قوڭىر مىنەز دومبىرامدى،
قاجىماس قايرات جاتىر، كۇيدە سەنىم.
و مەنىڭ وعىز اۋەن، و تۇرانىم!
شىرقىراپ شىندىقتى ايتام، شوشىماعىن.
تۋعان جەر توپىراعىڭ قىمبات ماعان،
باسىعۇت، باۋىرى بالقاش شوقىلارىم.
قۇدىرەتىن تانىتقان عۇمىرى ۇلتتىڭ،
ۋىز ەمگەن ۇرپاعى ۇلىلىقتىڭ.
جان جۇرەگىم دومبىرا ۇزبەس ءۇمىت،
كۇي دەيتىن قۇدىرەتكە قۇنىعىپپىن.
اقىن،زەرتتەۋشى ساعاتبەك احمەتقاجي ۇلى 1974 جىلى ماۋسىم ايىندا شىعىس تۇركىستاننىڭ التاي ايماعىندا دۇنيەگە كەلگەن. 2010 جىلى مامىردا قازاقستانعا ورالعان.
قىتايدان جانە ەلىمىزدە شىعاتىن گازەت،جۋرنالداردا 300-دەن اسا شىعارمالارى جارىق كورگەن. «كوكجال ءتۇن» ، «و، اعاجاي» اتتى جەكە جىر جيناقتارىنىڭ اۆتورى. «سەزىم تامشىلارى»، «قاناس مەرۋەرتتەرى»، «قىلبۇراۋ» دەگەن الماناقتاردا شىعارمالارى شىققان.وسى تۇستان «امانات»، «مۇزبالاق»، «بابا جولى»، «قىلبۇراۋ»، «ءساۋىر بۇلتى»، «جىر-شەجىرە»، «سىبىزعى سازى»، «كوكجيەكتى كۇن ساۋلە» ، «قۇلان يەك» قاتارلى كىتاپتاردى قۇراستىرعان.ءقازىر اقمولا وبىلىسى ەرەيمەنتاۋ اۋدانى تايباي اۋىلىندا تۇرادى
