الماتىدا "سىبىزعى سازى" اتتى جاڭا جىر جيناق جارىق كوردى. جيناق اۆتورى ساماريا ءداۋىت قىزى. قازاقستانعا ارعى بەت شىنجاڭنان كەلىپ كىتاپتارىن شىعارىپ قازاق ادەبيەتىنىڭ قازىناسىنا قوسىپ جاتقان قانداس قالامگەرلەر جەتەرلىك. الايدا جۇڭگو ەلىنىڭ ىشكى ولكەلەرىندە، قازاق سيرەك قونىستانعان اۋداندارىندا تۇراتىن ازدى-كوپتى قالامگەرلەرى قازاقستان وقىرماندارىنا تانىس دەپ ايتۋ قيىن. ميلياردتاعان حالىق ىشىندە بىرنەشە مىڭ عانا قازاقتان قۇرالعان اۋدانداردا تۇراتىن قانداستارىمىز بار ەكەنىن بىرەۋ بىلسە، بىرەۋ بىلمەيدى. ال سول شاعىن قاۋىمنىڭ قازاقتىڭ سالتى مەن مادەنيەتىنىڭ قۇنارىن ساقتاپ وتىرعانىن دا بىرەۋگە ايتىپ سەندىرۋ نەعايبىل نارسە.
"سىبىزعى سازى" الماتىداعى "Bilge" باسپاسىنان جارىققا شىقتى.
ساماريا ءداۋىت قىزى جۇڭگو حالىق رەسپۋبليكاسىنىڭ گانسۋ ولكەسى اقساي اۋدانىندا دۇنيەگە كەلگەن. شىنجاڭنىڭ التاي ايماعىنان وتكەن عاسىر باسىندا اۋىپ كەتكەن ەل سول گانسۋ ولكەسىنە ورنالاسىپ قالعان. شىنجاڭمەن سالىستىرعاندا ميللياردتاعان جۇڭگو جۇرتشىلىعىنىڭ ىشىندە وتىرعان اقساي اۋدانىنداعى قازاقتار سوعان قاراماستان ءسالت-داستۇرىن بەرىك ۇستانعان. ەلىمىز تاۋەلسىزدىك العاندا اقساي قازاقتارىنان دا كوپتەگەن ادامدار ەلگە كەلىپ قوسىلدى. بۇگىنگى تاڭدا ەگەمەن ەلىندە زەينەتتى ءومىر كەشىپ جاتقان اقىن ساماريا ءداۋىت قىزى سان الۋان تاقىرىپتا جازعان ولەڭدەرىنىڭ جيناعىن تاۋەلسىز ەلىندە وقىرمان قاۋىممەن جۇزدەستىرىپ وتىر.
كىتاپ جالپى كوپشىلىك وقىرمانعا ارنالعان.
ءسۇيىنشىلى جاڭالىعىمىزدى اۆتوردىڭ اتاجۇرتىنا ارناعان ءبىر ولەڭىمەن تۇيىندەلىك:
قازاقيا – وتانىم
ەستىلمەيدى ەلىمە،
ەرتە سالعان تاڭعى ءانىم.
قيىر ءجايلاپ، شەت قوندىم،
الاش بولىپ ارمانىم.
ەلگە كەلدىم ۇلتان بوپ،
بابا جولىن جالعادىم.
سۇلتان بولۋ نە كەرەك،
قازاق جەرىن تاڭدادىم.
قيىنشىلىق كورسەم دە،
كوزسىزدىككە بارمادىم.
ۇلتتى ءسۇيۋ يماننان،
ۇلتقا ءومىر ارنادىم.
قانىمدا بار نامىسىم،
وزگە جۇرتتان قالمادىم.
قازاقيا – وتانىم،
قازاق بولۋ – ارمانىم!
وتانىم دەپ وت باستىم،
كوكبايراعىم قولىمدا.
قازاعىم دەپ قان كەشەم،
بەيبىتشىلىك جولىندا.
ۇرپاعىم دەپ، ۇلتىم دەپ،
كەلگەن جەرىم الاتاۋ.
باسى كەنىش، باۋىرى قۇت،
جەتىسۋىم جاننات-اۋ!
ەلگە اكەلدىم سالت-سانا،
ءداستۇر مەنەن ءتىلىمدى.
يمانىم مەن تەگىمدى،
قانعا سىڭگەن جىرىمدى.
بەرىك ەندى بوساعام،
شاڭىراعىم قوس امان.
قابىل ەتتى تىلەكتى،
مەيىرىمدى جاساعان.
شەرىك عاسىر – شەجىرەم،
ەتەك-جەڭىم تۇگەل-دى.
باسقان ادال قادامنان،
نەسىبەمنەن گۇل ءوندى.
اڭساعانىم – ادىلدىك،
اللا جولى – اقيقات.
سەنى عانا جىرلايمىن،
قازاقيا – ءوز ەلىم!
وعىز ويدان وت ۇران،
الداسپانداي اقىنمىن.
ەل باستاعان ەلىسحان،
ۇرپاعىمىن باتىردىڭ.
كەۋدەمدە ءبىر اعىس بار،
جۇرەك ءۇنىن تىڭداعىن.
مەن اقىنى – قازاقتىڭ،
قازاعىمدى جىرلاعان.
2021 جىلى، 28 شىلدە،
شۋدىڭ بويىندا.
