قانات ەرەجەپ ۇلى
جۇڭگو تەلە ونەرپازدار قوعامىنىڭ جوراسى، جۇڭگو ديكتور-جۇرگىزۋشىلەر قوعامىنىڭ جوراسى، شينجياڭ ۇيعۇر اۆتونوميالى رايونى تەلە ونەرپازدار قوعامى ءتوراعاسىنىڭ ورىنباسارى، شينجياڭ ۇيعۇر اۆتونوميالى ديكتور-جۇرگىزۋشىلەر قوعامىنىڭ تۇراقتى ورىنباسار، مەملەكەتتىك ۇزدىك اقپارات قىزمەتكەرى، مەملەكەتتىك 3 – كەزەكتى 100 تاڭداۋلى تەلە ونەرپازىنىڭ يەگەرى قانات ەرەجەپ ۇلى 1958 جىلى بۋىرشىن اۋدانىندا دۇنيەگە كەلگەن. اعا ديكتور، جۇرگىزۋشى، تەليەۆيزيا باستىعىنىڭ ورىنباسارى. شينجياڭ ۋنيۆەرسيتەتىنىڭ 1978 جىلعى تۇلەگى.
1978-1985 جىلعا دەيىن شينجياڭ حالىق راديو ستانسياسىندا ديكتور، 1985 جىلى شينجياڭ تەليەۆيزياسىندا قازاق تىلىندەگى ارنانى اشۋعا ات سالىسىپ، ديكتورلار گرۋپپاسىنىڭ باستىعى، كوركەم فيلم اۋدارىپ جاساۋ ورتالىعى باستىعىنىڭ ورىنباسارى جانە رەجيسسەر؛ 1993 جىلى شينجياڭ سىمدى تەليەۆيزياسىندا قازاق تىلىندەگى ارنانى اشۋدى ۇستىنە الادى ءارى ستانسيا باستىعىنىڭ ورىنباسارى مىندەتىن 2000 جىلعا دەيىن وتەپ، سودان 2017 جىلعا دەيىن شينجياڭ تەليەۆيزياسى باستىعىنىڭ ورىنباسارى جانە اعا ديكتورلىق مىندەتىن اتقارىپ دەمالىسقا شىقتى.
قوعامدىق قىزمەتتەرى
1985 جىلى شينجياڭ تەليەۆيزياسىندا قازاق ارناسىنىڭ ۋىعىن شانشۋدان باستاپ، 1993 جىلى شينجياڭ سىمدى تەليەۆيزياسى قازاق تىلىندەگى كەرەگەسىن جايىپ، شاڭىراعىن كوتەرگەنگە دەيىن قازاق تىلىندەگى تەلە ارنالارى ءۇشىن ەرەن ەڭبەكتەر ءسىڭىردى. جۇيەدەن شينجياڭ سىمدى تەليەۆيزياسىندا قازاق ارناسىن 7 اداممەن قۇرۋدان باستاپ، فيلم قاينارىن مولايتۋ ءۇشىن ءوز ورتامىزداعى ازاماتتارىمىزدى ۇيىمداستىرىپ، اۋدارما فيلم قاينارىن مولايتۋ، سونداي-اق قازاقستان تەليەۆيزياسىمەن فيلم اۋىس-كۇيىس ورناتۋ جانە ولاردىڭ ونەرپازدارىن ۇسىنىس ەتىپ، كونسەرتتىك باعدارلاما الۋ جۇمىستارىنا بەل شەشە ارالاستى. سونداي-اق جاس تەليەۆيزيا قوسىنىن سومداۋ ءۇشىن جاستاردى تاربيەلەۋ جولىندا جالىقپاي قۇلشىنىس جاساپ كەلەدى. سونىمەن قازىرگى قازاق تەلە ارنالارى باسقارلاردىڭ الدىندا ۇيالمايتىن ورەگە جەتتى.
نەگىزگى تۋىندىلارى جايلى
ول ءوزىنىڭ كۇندەلىكتى كاسىپتىك جانە اكىمشىلىك جۇمىستارىنان تىس، تەلە فيلم «جۋساندى دالا» (1991 جىلى تۇسىرىلگەن، سەناريست)، «مارعابىلدىڭ قارا قاسقا اتى» (1995 جىلى تۇسىرىلگەن، رەجيسسەر)؛ ءتول تۋىندىسى «توننان تۋعان وي» مەملەكەتتىك ۇزدىك تۋىندى، ۇزدىك جۇرگىزۋشى سىيىلىقتارىن ەنشىلەگەن؛ «فونەتيكانىڭ ديكتورلىق قىزمەتتەگى قولدانىلىمى» قاتارلى دەسارتاسيالارىى؛ «ينديا ەرتەگىلەرى»، «ايەل قىزمەتشى» قاتارلى اۋدارما ەڭبەكتەرى جانە «ەكىنشى اكەم» اتتى اڭگىمەسى جارىق كورگەن. راديوداعى كەزىندە «بۇگەلەك»، «بوكە باتىر»، «زۋقا باتىر»، «قاسىم باتىر»، «پەتحوۆين» قاتارلى ءبىرقانشا رومان جانە راديو تەاترلارىنا دىبىس بەرگەن جانە وقىعان. تەليەۆيزيادا «كاپيتان گرانتتى ىزدەۋ»، «گەرتسەن جاۋ جۇرەكتەرى» قاتارلى فيلمدەرگە دىبىس بەرگەن جانە رەجيسسەرلىك ىستەگەن. ال، جۇڭگو قازاقتارىنىڭ تۇڭعىش تەلە ديكتورى بولۋ سالاۋاتىمەن، ول وقىعان حابارلار، جۇرگىزگەن كونسەرتتىك جانە قوعامدىق باعدارلامالار، اسىرەسە، ونىڭ ناشىنا ءتۇسىرىپ وقىعان «حايۋاناتتار دۇنيەسى» ءوز الدىنا ءبىر توبە. سوندىقتان دا كورەرمەندەر ونى: قازاقتىڭ جاۋ جۇڭشياڭى (CCTV دىڭ ايگىلى ديكتورى) دەسەتىن.
6الاش ۇسىنادى
