دۇنيەجۇزى قازاقتارىنىڭ V قۇرىلتايىندا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازاربايەۆ قانداستارعا كومەك كورسەتۋ قاجەتتىگىن اتاپ وتكەن بولاتىن. سول نەگىزدە ەلباسىنىڭ تاپسىرماسىمەن وتانداستار قورى قۇرىلدى.
قازاقستان رەسپۋبليكاسى ۇكىمەتىنىڭ 2018 جىلى 18 مامىرداعى № 280 قاۋلىسىنا سايكەس «شەتەلدەگى ەتنيكالىق قازاقتاردى قولداۋ جونىندەگى 2018 - 2022 جىلدارعا ارنالعان ءىس-شارالار جوسپارى» بەكىتىلىپ، قوعامنىڭ اتقاراتىن جۇمىستارى ايقىندالدى.
بۇگىندە قوعام 4 باعىتتا جۇمىس اتقارادى. ءبىرىنشى، شەتەل قازاقتارىنىڭ ۇلتتىق بىرەگەيلىگىن ساقتاۋ ماقساتىندا مادەني-گۋمانيتارلىق شارالار ۇيىمداستىرۋ. ەكىنشى، شەتەلگە قونىس اۋدارعان قانداستارىمىزعا اقپاراتتىق-كونسۋلتاسيالىق قولداۋ جۇمىستارى ۇيىمداستىرىلىپ، ولاردىڭ قوعامعا ينتەگراسيالانۋىنا، وزەكتى ماسەلەلەردى شەشۋىنە ىقپال ەتۋ. ءۇشىنشى، شەتەلدەگى قازاقتاردى جانە ەلگە قونىس اۋدارعان قانداستاردىڭ ماسەلەلەرى بويىنشا تالدامالىق زەرتتەۋ جۇمىستارىن جۇرگىزۋ. ءتورتىنشى، شەتەلدەگى قازاق جاستارىمەن بايلانىس ورناتۋ.
قوعام ۇيىمداستىرۋىمەن 2019 جىلى الەمنىڭ 25 ەلىنەن كەلگەن وتانداستاردىڭ قاتىسۋىمەن 5000 ادامدى قامتىعان 20-عا جۋىق ءىس-شارا وتكىزىلسە، 2020 جىلى الەمدى جاۋلاعان پاندەمياعا وراي بارلىق جوبالار ونلاين فورماتقا كوشىرىلدى. وسى رەتتە الەمنىڭ 26 ەلىندەگى وتانداستاردىڭ قاتىسۋىمەن 5 800-دەن استام ادامدى قامتىعان 13 ونلاين ءىس-شارا جانە 6 ونلاين-جوبا ۇيىمداستىرىلدى.
2021 جىلى ZOOM باعدارلاماسى ارقىلى 20 ەلدى قامتىعان 20 ونلاين كەزدەسۋ وتكىزىلدى. بۇل شارالاردىڭ بارلىعىندا سىرتتاعى اعايىننىڭ كوشى-قون، ىسكەرلىك، مادەني-گۋمانيتارلىق ماسەلەلەر مەن جوبالارعا قاتىستى ۇسىنىستارى مەن وتىنىشتەرى تالقىلاندى.
شەتەلدە تۇراتىن وتانداستارىمىزدىڭ قازاق ءتىلى كۋرستارىن ۇيىمداستىرۋ ءۇشىن، قوعام 2019-2020 جىلدارى 12 ەلدە 31 ونلاين-سىنىپ اشتى. ونلاين-سىنىپتار تەلەديدار، نوۋتبۋك، كامەرا، تاعى باسقا قاجەتتى زاماناۋي تەحنيكالارمەن قامتىلدى.
سونىمەن قاتار شەتەلدە تۇراتىن ەتنيكالىق قازاق بالالارى قازاقستاندا ءارتۇرلى جازعى لاگەرلەرگە قاتىسا الادى. اتاپ ايتساق: نازاربايەۆ زياتكەرلىك مەكتەپتەرى ۇيىمداستىرۋىمەن وتكەن «ۇلى دالا ۇرپاعى» ءبىلىم لاگەرى، بالداۋرەن، «تۋعان ەلگە ساياحات» بالالار تۋريستىك پويىزى»، «ZEREN» رەسپۋبليكالىق جازعى لاگەرلەرىنە شەتەلدەن 600 بالا قاتىستى. 2020-2021 جىلدارى پاندەمياعا بايلانىستى جوبالار ۋاقىتشا توقتاتىلدى. دەگەنمەن الداعى ۋاقىتتا جالعاسىن تابادى.
