ماعاز رازدان ۇلى (1924-1998) جۇڭگو شىڭجاڭ ولكەسى التاي ايماعى بۋىرشىن اۋدانى دۋلايتى اۋىلىندا تۋعان.
شىعارمالارى: "التايدىڭ اقيىقتارى"، "سارى بەل"، "ۋاقىتقا جاۋاپ"، "اتا زامان سويلەيدى"، "ەرتەڭ"، "اسۋلار تولعاۋى" قاتارلى كىتاپتار.
ەرتەڭ
«ەرتەڭ» كەرەك پەندەگە، «ەرتەڭ» كەرەك،
بەرمەگەنىن بۇگىننىڭ «ەرتەڭ» بەرەد.
كەشە ءسابي،
بۇگىن ءسال ەستيارلاۋ،
ۇلى اقىلدان «ەرتەڭدە» جاتىر دەرەك.
«ەرتەڭ» دەگەن جالعاسى بۇل عۇمىردىڭ،
ەرتەڭ ءۇشىن ءبىر تۇرىپ، ءبىر جىعلدىم.
مۇردەلەردەن وسى «ەرتەڭ» بىزگە قالعان-
قاجەتى ءۇشىن ەرتەڭگى ءبىر ءدۇبىردىڭ.
قالار «ەرتەڭ» ۇرپاققا تاعى بىزدەن،
ءتىرى بار ما «ەرتەڭنەن» كۇدەر ۇزگەن؟!
سالسىن ۇرپاق ءبىر ساراي ەرتەڭ ءوزى-
ىرگەتاسقا بۇگىن ءبىز قولمەن تىزگەن.
ءوز ەڭبەگىڭ ەمەس تەك ءوز كەرەگىڭ،
باقىتى ءۇشىن ستەي ءبىل وزگەلەردىڭ.
كەيىنگىلەر «ەرتەڭنىڭ» سەنەن قالعان،
السىن تاڭداپ ىشىنەن ءوز كەرەگىن.
ءبىز كەتكەندە قاراماي ءدام مەن تۇزعا،
«ەرتەڭ» قالار ارتتاعى ۇل مەن قىزعا-
ءبىر امانات تاپسىرۋ كەرەك بولسا،
دەپ ايتامىز الدىمەن «ۇيا بۇزبا!..»
شاڭىراق
قىزعا تۇلىم، ايدار سىيلاپ ۇلدارعا،
رازىمىز جىلجىپ وتكەن جىلدارعا.
سەكسەن باستى كەرەگەنىڭ ۇيتقىسى-
سەكسەن كوزدى شاڭىراقتا ءمىن بار ما؟!
ەرتە تۇرىپ كەلىن تۇندىك تۇرەدى،
سول كۇنگى كۇن شاڭىراقتان كىرەدى.
قازاق سوندا ءبىر اۋنايدى شالقالاپ،
كەۋدەسىنە سيماي تۇكتى جۇرەگى.
وسى كۇنگى تىرشىلىكتىڭ نىشانى-
تاڭعى اسىمىز اشىق وتتا پىسادى.
سوندا ءبىزدىڭ ءتۇتىنىمىز ءتۇپ-تۇزۋ
تاعى دا سول شاڭىراقتان ۇشادى.
شاڭىراقتان قالاي عانا كەشەمىز؟
جاتىر وندا «ەنشى» دەيتىن ەسەمىز.
اكەمىز دە سودان مويىن تاستاعان،
وتقا ماي ساپ سالەم ەتكەن شەشەمىز.
شاڭىراقتان تۋعان تالاي اۋىر وي،
سول شاڭىراق بەرگەن تالاي ابىروي.
قان مايداندا شاڭىراقپەن تىگىلگەن
قارا قوسقا سىيعان كەشە ابىلاي.
ەر قابانباي تاسقا قىلىش جانىعان،
جانىبەكتى جاۋى تۇگەل تانىعان.
سامەنبەتتىڭ تۇسىنە ەنگەن سارى ۇكى
تاڭعا تاياۋ شاڭىراقتان دارىعان.
ۇزاتقاندا قىزعا تىيەر تىيەسى-
ءۇش توعىزدان جاساۋى دا، تۇيەسى.
كورىسسە دە بوساعاسىن قيماي ول،
ەرتەڭ بولماق ءبىر شاڭىراق يەسى.
قىز وسسە-ورىس، قىز-قازاقتىڭ قيماسى،
بىزگە قىمبات قىز-كەلىننڭ يباسى.
بولادى ءالى-اق وسى ارۋدىڭ قولىندا
شاڭىراقتى قارا ناردىڭ بۇيداسى.
شاڭىراقتىڭ تاريحى تىم ارىدان،
مارتەبەسى بىزگە قىمبات بارىنەن.
ايلىق جولدان اتتانامىز سالەمگە،
شاڭىراقتىڭ قورقامىزدا كارىنەن.
شاڭىراق قوي قازاقتى قاز تۇرعىزعان،
شاڭىراق قوي بىزگە مويىن بۇرعىزعان.
قاسيەتتەپ شاڭىراقتان باتا العان
اينالايىن شاڭىراقتى ۇل، قىزدان…
قادىرلەيىك شاڭىراقتى اتاندى،
شاڭىراقتى تىك كوتەرگەن باقاندى.
سەكسەن كوزدى شاڭىراققا قۇت بولعان
سيلا، قازاق سەكسەندەگى اپاڭدى!
6الاش ۇسىنادى
