ەسىڭدى الار، ەسسىز مىنا قوعامدا،
ارسىزدىققا، وتىنەمىن تونالما.
ادام بولىپ كەلسەڭ ەگەر ومىرگە،
ادام بولىپ عۇمىرىڭدى ءتامامدا.
جۇرەك دەيتىن جۇدىرىقتاي كوك ەتىڭ،
مەيرىمنىڭ نۇرىن بولسىن توگەتىن.
ساقتا قۇداي تەكسىزدەردەن تەبىنگەن،
دۇنيەگە قۇل بولۋمەن ولەتىن.
تۇتاستىعىم - بەرەكەم مەن بىرلىگىم،
سوندا مەنىڭ تاقۋالى تىرلىگىم.
ەلدەسكەننىڭ كۇندەستەرى يمانسىز،
جۇرەگىمە جارا سالىپ ءجۇر بۇگىن.
ءبىرىڭ قازاق، باۋىر بولماي بىرىڭە،
جەڭىلدىك جوق ارقالاعان جۇگىڭە.
الاۋىزدىق، بىلىمسىزدىك، ماڭگۇرتتىك،
دوسىڭ ەمەس، جەتەدى عوي تۇبىڭە.
** **
كۇننىڭ تۇسكەن ساۋلەسىنە ماجاۋراپ،
ماعانداعى جەتكەن سىندى عازال ب ا ق.
جۇرەگىمە جاسىرىنعان سۇلۋ مۇڭ،
سۇلۋ كوكتەم سانىمەنەن تازارماق.
اينالامدا ءبارى وزگەشە، بولەك تىم،
كوڭىلىمدى ءوزىڭ يە، ءتور ەتتىڭ،
جانىم جىلى ءجۇرۋ ءۇشىن جالعاندا،
ءوزىڭ عانا، ءوزىڭ عانا كەرەكسىڭ.
ءجۇرمىن نەگە ماحابباتقا مۇڭ ارتىپ،
سەزىنەيىن سەزىمىڭە قۇمارىپ،
قۇلا تاڭدا كۇن شۋاعىن قۇشاقتاپ،
ويانايىن ءوزىمدى- ءوزىم جۇباتىپ...
** **
سەنى كورسەم كەلەدى ەركەلەگىم.
ەلىتەدى وزىنە ەرتەگى ءومىر.
الاشتىڭ ازاماتىن اڭساپ جۇرگەن،
سەزىمىم سەن نەدەگەن كوركەم ەدىڭ.
ۇنىنە قۇلاق اسىپ جۇرەگىمنىڭ،
قامىتىن شەشىپ تاستاپ تۇنەرۋدىڭ.
تاڭىردەن ماحابباتتى سۇراعاندا،
تاعدىرىن بەرگەنىڭ-اي، جىبەگىڭنىڭ.
اينالدىڭ ماحاببات ءان ماقامىنا،
قوسىلىپ تاسپالاردىڭ قاتارىنا.
مەنى قويشى باقىتتى بولا بەرەم،
سەن كۇلىپ كىر قىمباتتىم، وتاۋىڭا.
مەنى قويشى باقىتتى بولا بەرەم...
** **
سەزدىڭىز بە ءسىز سالعان ءاننىڭ اۋەنى،
مەنىڭ ساعىنىشىم.
تارماقتارىڭىز جىرداعى ادەمى،
سياقتى ءدارۋىشىم.
ءسىز سالعان سۋرەتتەردىڭ الۋان بوياۋى دا
تاعدىر تۇسىمدەي.
مەنى دە بوياعان باياعىدا،
كوركەم مۇسىندەي...
سىزدەگى اسقاق رۋحتىڭ ادەمى ورنەگى،
سانامدى ساندەگەن.
قۋات تا، كۇش تە ماحابباتتا مەندەگى،
ءومىرىمدى ارىلەگەن.
كۇي بولىپ توگىلگەن اسىل دومبىراڭىزدا،
كەربەز سۇلۋمىن.
وڭ بۇراۋ، سول بۇراۋىڭىزدا،
ءومىر سازىمدى ۇعىندىم.
