تاۋەلسىزدىك، بورىشتارمىن مەن ساعان،
قۇشاعىڭا شاقىرعانىڭ ءۇشىن دە.
ارالايتىن التى قۇرلىق الابىن،
ەسىك بولىپ اشىلعانىڭ ءۇشىن دە.
تاۋەلسىزدىك، رازىمىن مەن ساعان،
التى الاشپەن قاۋىشقانىم ءۇشىن دە.
«وگەي اعا» كورسەتكەندە شەت قاقپاي،
ءوز اعاممەن تابىسقانىم ءۇشىن دە.
تاۋەلسىزدىك، جيعىزدىڭ-اۋ ەسىمدى،
بۇلدىر تارتا باستاعاندا ەرتەڭىم.
قونىسىمدى، ءورىسىمدى قايتادان،
نىق باسىپ ءوز قادامىممەن ولشەدىم.
تاۋەلسىزدىك، بەردىڭ ماعان قۇدىرەت،
ەي دۇنيە، تىڭدا دارا داۋىسىمدى.
ەل اتىنان العا تاستاپ سويلەيتىن،
تاۋىپ الدىم قامشىمدى.
تاۋەلسىزدىك، سەنى جىرلاپ وتەمىن،
ءوز تىلىممەن،ءوز مۇڭىممەن، دىلىممەن.
ءوز-وزىمدى كوركەيتەمىن مەن ەندى،
ياسساۋيلىق، ۇلى ابايلىق ىلىممەن.
تاۋەلسىزدىك، سەنى قورعاۋ پارىزىم،
بوستاندىعىم، ار-ۇجدانىم ول مەنىڭ.
مولدىرەگەن جانارىنداي بابامنىڭ،
مولدىرەيدى وزەندەرىڭ، كولدەرىڭ.
مەن تىلەيمىن، جەلتوقساننىڭ ىزعارى،
جۇرەگىمدى قارىماسىن قايتادان.
ەتىگىمەن سۋ كەشىپ ەر ازامات،
ءارۋاقتاي ارىماسىن قايتادان!
مەن تىلەيمىن، بۇل مەكەندە ماڭگىلىك،
وت قارۋلار جارىلماسا ەكەن دەپ.
الاكوز بوپ ارازداسىپ اعايىن،
كەڭ دالامىز تارىلماسا ەكەن دەپ!
قانشا جانار قادالدى ەكەن قيىردان،
كوك تۋىمىز جەلبىرەگەن اسپانعا.
تاۋەلسىزدىك، ەرتەڭىمە سەنەم مەن،
سەنەمىن مەن ماعجان سەنگەن جاستارعا!
2021 جىلى جەلتوقسان
