بۇيرەك – ادام اعزاسىنداعى ەڭ ماڭىزدى مۇشەنىڭ ءبىرى. اسىرەسە ايەلدەر قاۋىمى ءۇشىن ماڭىزدىلىعى وتە زور. سەبەبى ايەل ادامنىڭ دەنساۋلىعى، سۇلۋلىعى مەن سىمباتتىلىعىنىڭ باستى كەپىلى. سوندىقتان دا بۇيرەك جۇمىسىنىڭ ناشارلاۋى، ونىڭ السىزدىگى ايەل اعزاسىنداعى ءتۇرلى دەرتتەردەن حابار بەرەدى. وسىعان بايلانىستى اۋرۋدىڭ الدىن الۋعا مۇمكىنشىلىك تە تۋادى. نازارلارىڭىزعا اۋرۋدىڭ التى بەلگىسىن ۇسىنامىز.
- بۇيرەك السىزدىگىنەن بەت، اياق-قول، كوزدىڭ اينالاسى ءىسىپ كەتەدى. بۇيرەك اعزاداعى سۋدى رەتتەيتىندىكتەن، ونىڭ جۇمىسى بۇزىلسا، قان اينالىمى ناشارلايدى. مۇنى رەتكە كەلتىرۋدىڭ وڭاي شەشىمى ۇيقى الدىندا سۋدى از مولشەردە ءىشىپ، بەلگە ارنالعان جاتتىعۋ جاساۋ.
- ايەلدەردىڭ تەز توڭۋ سەبەبى بۇيرەك السىزدىگىنەن بولادى. مۇنداي قۇبىلىستى جەڭۋ ءۇشىن تاماقتانۋ راسيونىن قاداعالاپ، قوي ەتى، سيىر ەتى، اششى بۇرىش، پياز، ءزىمبىر سەكىلدى ازىقتاردى كوبىرەك پايدالانعان ءجون.
- بۇيرەك السىزدىگى ايەلدىڭ جىنىستىق قارىم-قاتىناسقا قىزىعۋشىلىعىن تومەندەتىپ، سەبەپسىز اشۋلانىپ كليماكس تىم ەرتە باستالۋىنا اسەر ەتەدى. سونىمەن قاتار بۇيرەگى ءالسىز ادامدار تەز قارتايادى. ال مۇنىڭ الىن الۋ ءۇشىن ءتۇرلى ەمدىك شارالاردى پايدالانىپ، جەڭىل جاتتىعۋ تۇرلەرىن جاساعان دۇرىس.
- باستىڭ اۋرۋى، ۇيقىنىڭ بۇزىلۋى، ميدىڭ شارشاۋى، ويدىڭ ۇنەمى ءبولىنىپ كەتۋى دە بۇيرەك السىزدىگىنەن بولادى. اعزاداعى مۇنداي وزگەرىستەردى جەڭۋ ءۇشىن قازدىڭ ەتىن، ساڭىراۋقۇلاق، ءجۇزىمدى ۇنەمى پايدالانۋ كەرەك.
- بۇيرەك السىزدىگىنەن ايەلدەردىڭ ىشكى سەكرەسيا جۇيەسى السىرەپ، بۇيرەك ءۇستى بەزىنەن ادرەنالين ءبولىنۋى ازايىپ، دەنەدەگى زات الماسۋ پروسەسى بۇزىلادى. ول ارتىق ماي جينالۋىنا سەبەپ بولادى. وعان قارسى تۇرۋ ءۇشىن الاقاندى بىر-بىرىنە ىسقىلاپ، جىلى كۇيىندە بۇيرەككە باسۋ. مۇنى كۇىنە بىرنەشە رەت قايتالاعان ءجون. سونىمەن قوسا قاز، قويان، بالىق ەتى سەكىلدى ازىقتاردى كوپ تۇتىنعان دۇرىس.
- بۇيرەك السىزدىگىنەن قان قىسىمى ارتادى. مۇنداي بەلگىلەر بايقالىسىمەن، اۋرۋدىڭ الدىن الىپ، دارىگەرگە كورىنىپ، ەمدىك شارالار قولدانباسا، بۇيرەك ىستەن شىعىپ، ومىرگە ءقاۋىپ ءتوندىرۋى مۇمكىن.
ەرلەر بۇيرەگىنىڭ السىرەۋى دە وسىنىڭ ىشىندە. اسىرەسە تومەندەگى بىرنەشە ۇنامسىز تۇرمىس ادەتتەرى مەن سەلقوستىعى ەرلەردىڭ بۇيرەگىنە زاقىم جەتكىزەتىن ەڭ نەگىزگى سەبەپ بولماق.
- اۋرۋدى باساتىن دارىلەردى كوپ تۇتىنۋ. كەيبىر قابىنۋدى قايتارىپ، اۋرۋدى باساتىن دارىلەردى ۇزاق ۋاقىت تۇتىنۋ نەمەسە كوپ مولشەردە تۇتىنۋدىڭ بۇيرەككە زالالى اسا اۋر. مىسالى، باس اۋرۋدى باساتىن ءدارى، قابىنۋدى قايتاراتىن ءدارى قاتارلىلار. بۇلار بۇيرەكتىڭ ءسۇزۋ قىزمەتىنە اۋىرتپالىق ءتۇسىرىپ، بۇيرەككە زاقىم جەتكىزەدى.
- ءشوپ دارىلەردى قالىپتان تىس كوپ تۇتىنۋ. كلينيكالىق زەرتتەۋلەر كوكنار ساۋىتى، ەلشى ءشوپ قاتارلى ءشوپ دارىلەردىڭ بۇيرەكتى وڭاي زاقىمدايتىندىعىن بايقاعان. بۇلاردىڭ ىشىندەگى كوكنار ساۋىتى قاتارلىلاردىڭ بۇيرەككە زاقىمى تىم اۋر.
- سۋىق ىشىمدىكتەردى كوپ مولشەردە تۇتىنۋ. جەڭىل ىشىمدىكتەر مەن سپيرتتىك ىشىمدىكتەردى ارتىق مولشەردە ءىشۋ بۇيرەكتى جانامالاي زاقىمدايدى. ادام دەنەسىنىڭ قىشقىل-نەگىزدىك دارەجەسى 7.2 بولاتىنى بەلگىلى. ال جەڭىل ىشىمدىكتەر مەن سپيرتتىك ىشىمدىكتەر جالپى بەتتىك جوعارى قىشقىلدىق سيپاتتا بولاتىندىقتان، تۇتىنعاننان كەيىن دەنەدەگى قىشقىلدىق تەپە-تەڭدىك كورنەكتى تۇردە وزگەرىسكە جولىعادى. بۇل بۇيرەكتىڭ قالىپتى قىزمەتىنە اۋىر دارەجەدە زاقىم جەتكىزەتىن جاعداي.
- بالكۇلشە سەكىلدى تاعامداردا بروم قىشقىلدى كاليي اتالاتىن قوسپا بولاتىندىقتان، جەگەندە تىسكە جۇمساق كەلەدى. مۇنداي تاعامداردى ۇزاق ۋاقىت تۇتىنعاندا ورتالىق جۇيكە جۇيەسى، قان جاساۋ جۇيەلەرىنىڭ قىزمەتى، بۇيرەكتىڭ قاندى سۇزۋ-رەتتەۋ قىزمەتىنە ىقپال ەتۋدەن، بۇيرەكتىڭ السىزدىگىنە اكەلىپ سوعادى.
- قالىپتان تىس تويىنا تاماقتانۋ. قازىرگى قوعامدا ادامدار اراسىندا بارىس-كەلىستىڭ جيىلەۋى مەن قوعام دامۋىنا ىلەسە ادامداردىڭ قوناقاسىعا بارۋ ورايى كوبەيىپ، ۇنەمى ءدامدى تاعامدارعا سىرەپ تويۋ ادەتكە اينالىپ بارادى. بۇل ورگانيزمنىڭ اس قورىتۋ قىزمەتىن اۋىرلاتىپ، ادام اعزاسىنىڭ قالىپتى قىزمەتىنە شامادان تىس جۇك تۇسىرەدى. بارا-بارا دەنە سالماعى ارتىپ، ارورگانداردىڭ قىزمەت قۋاتىنىڭ ارتىق سارپ بولۋىن تۋدىرادى. ادام دەنەسىندەگى كەرەكسىز زاتتاردىڭ كوپ ساندىسى بۇيرەك ارقىلى ىعىستىرىلاتىندىقتان، قالىپتان تىس تويىنا تاماقتانۋ بۇيرەككە كۇش تۇسىرەتىنى انىق.
- اراقتىڭ ارتىنان ءشاي ءىشۋ. كەيبىرەۋلەر اراق ىشكەننەن كەيىن، ءشاي ءىشۋ ماستىقتان ايىقتىرادى دەپ قارايدى. شىن مانىسىندە بۇلاي ىستەۋ مۇلدە ءونىمسىز بولۋىمەن بىرگە بۇيرەكتى اۋىر دارەجەدە زاقىمدايدى. ماماندار ءشاي جاپىراعىنداعى ءشاي نەگىزى بۇيرەككە ءبىرشاما تەز اسەر ەتۋ ارقىلى نەسەپ ايداۋ ءرولىن اتقاراتىندىقتان، وسى كەزدە سپيرت قايتالاي ىدىراۋعا ۇلگەرمەي بۇيرەكتەن ىعىستىرىپ، بۇيرەكتىڭ كەيبىر ءالسىز جۇيەلەرىن جانسىزداندىرادى. سونىمەن بۇيرەك زاقىمدالادى ەكەن.
- تۇزدى ازىقتى تۇتىنۋ. ازىقتاردىڭ قۇرامىنداعى تۇز مولشەرىنىڭ اسا جوعارى بولۋى قان قىسىمىن جوعارىلاتادى. جۇرەك پەن بۇيرەك قاننىڭ قالىپتى اينالىمىن ساقتاماۋىنان بۇيرەك تۇرلىشە سوزىلمالى اۋرۋلارعا جولىعۋى ابدەن مۇمكىن.
- سۋدى از ءىشۋ. ادام ەگەر ۇزاق ۋاقىت سۋ ىشپەسە، دەنەدە نەسەپ مولشەرى ازايادى. نەسەپتەگى كەرەكسىز زاتتار مەن ۋلى زاتتاردىڭ قويۋلىعى ارتادى. كلينيكادا ۇنەمى كەزدەسەتىن بۇيرەككە تاس بايلانۋ، بۇيرەككە سۋ جينالۋ قاتارلىلاردىڭ بارلىعى ۇزاق ۋاقىت سۋسىزدانۋدىڭ كەسىرىنەن تۋىندايدى.
- بۇدان سىرت بۇيرەكتى زاقىمدايتىن قالىپسىز تۇرمىس ادەتتەرى كوپ. مۇنىڭ ىشىندە ۇنەمى دارەتكە قىسىلۋدىڭ دا زاردابى تىم اۋىر. سوندىقتان ءار ءىس ءوز ۋاقىتىمەن، ءوز كەزەگىمەن قالىپتى وتكەنى ءجون. سوندىقتان ەڭ باستى بايلىق دەنساۋلىق ەكەنىن ۇمىتپاعانىمىز ءجون.
massaget.kz پورتالىنان
