ۇلت رۋحانياتىنا جاناشىر كاسىپكەرلەردىڭ قولداۋىمەن دۇنيەجۇزى قازاقتارىنىڭ قاۋىمداستىعى، «وتانداستار قورى» كەاق-ىنىڭ «Alash-CUP» قايىرىمدىلىق قورىنىڭ بىرلەسىپ ۇيىمداستىرۋىمەن ەلىمىزدىڭ تاۋەلسىزدىك مەرەكەسى اياسىندا قازاق پوەزياسىنا بۇرىلىس جاساعان قۇبىلىس اقىن، ساعىنىشتىڭ سيمۆولىنا اينالعان شايىر-جىراۋ، «الاش» ادەبي سىيلىعىنىڭ يەگەرى جاركەن بودەش ۇلىنىڭ شىعارماشىلىعىنا ارنالعان «سارىكوبەلەك ساعىنىش» اتتى حالىقارالىق جازبا اقىندار ءمۇشايراسىن جاريالايدى.
ماقساتى:
ەلباسى، نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا: ادام بالاسى شەكسىز زەردەنىڭ عانا ەمەس، عاجايىپ سەزىمنىڭ يەسى. تۋعان جەر – اركىمنىڭ شىر ەتىپ جەرگە تۇسكەن، باۋىرىندا ەڭبەكتەپ، قاز باسقان قاسيەتتى مەكەنى. تالاي جاننىڭ ءومىر-باقي تۇراتىن ولكەسى. ونى قايدا جۇرسە دە جۇرەگىنىڭ تۇبىندە الديلەپ وتپەيتىن جان بالاسى بولمايدى، – دەپ اتاپ وتكەنىندەي تۋعان جەرگە ساعىنىش ەت جۇرەكتى پەندەنىڭ جۇرەك تۇكپىرىندەگى ءلۇپىلى. ال، ونىڭ اقىندار ساناسىن بۇلقىندىرىپ، جىر بولىپ ورىلمەۋى مۇمكىن ەمەس. سول تۇرعىدان قاراعاندا شەتەلدەن كەلگەن، تۋعان جەرى جاتتىڭ مەنشىگىندە قالعان قازاق اقىندارىنىڭ جان سەزىمى ايتپاسادا تۇسىنىكتى. تۋعان جەرىن جارتى عاسىر جىرلاعان جاركەن اقىننىڭ «جاۋىر بولعان» ساعىنىش دەرتى جىرقۇمار تالاي جاستىڭ جۇرەگىن شىمشىلاعان عاجايىپ سەزىمگە ۇلاسقانى انىق. جاس ۇرپاقتىڭ ساناسىنا جاركەن بودەش ۇلىنىڭ شىعارماشىلعىن ناسيحاتتاۋ، جاستار شىعارماشىلىعىن قولداۋ كورسەتۋ بۇل شارانىڭ باستى ماقساتى بولىپ تابىلادى.
ءمۇشايرانىڭ شارتى:
40 جاسقا دەيىنگى اقىندار 2 ولەڭىمەن قاتىسا الادى.
ءبىرىنشى ولەڭى اقىن جاركەن بودەش ۇلىنىڭ شىعارماشىلىعىنا، اقىندىق بولىمىسىنا، تۇلعالىق كەلبەتىنە ارنالۋى مىندەتتى.
ەكىنشى ولەڭ ساعىنىش، تۋعان جەر تاقىرىبىندا.
شىعارمالار 1-جەلتوقسانعا (01.12.2020ج) دەيىن [email protected] ەلەكتروندى پوچتاسى ارقىلى قابىلدانىپ، قازىلار القىسىنىڭ شەشىمىمەن تاۋەلسىزدىك كۇنى قارساڭىندا (ناقتى وتەتىن ۋاقىتى قوسىمشا حابارلانادى) قورىتىندى شىعارىلىپ، جەڭىمپازداردى سالتاناتتى ماراپاتتاۋ ءراسىمى وتكىزىلەدى.
