ەكى جىلدىڭ الدىندا شەتەلدەگى قازاق دياسپوراسى ءۇشىن ەلەڭ ەتەرلىك ەرەكشە وقيعا ورىن الدى. ماسەلەنىڭ ءمانىسىن اشالاپ ايتار بولساق: ۇلان-باتىر قالاسىنداعى ءبىر قازاق وتباسىنىڭ قىزدارى، ءاپالى-سىڭىلى جەڭىسگۇل مەن انارگۇل اسكەري سالاداعى ۇزدىك قىزمەتتەرى ءۇشىن پولكوۆنيك شەنىنە يە بولدى. «ءبىر شاڭىراق استىندا ءوسىپ-ونىپ، بىلدەي شەنگە بىردەي قول جەتكىزگەن اعايىندى قىزدار شىڭعىس حان جۇرتىنىڭ تاريحىندا بۇرىن-سوڭدى بولماعان» دەپ، جازىپ جاتىر موڭعوليالىق اقپارات قۇرالدارى.
پولكوۆنيكتەردىڭ اكەسى مۇساباي ۇلى قاۋسىلعازى پەدوگوگيكا عىلىمدارىنىڭ دوكتورى، عالىم ادام. جازعان ەڭبەكتەرى ءدال ءقازىر قۇرلىق اسىپ، سوناۋ امەريكا مەكتەپتەرىندە وقىتىلىپ ءجۇر. اناسىنىڭ ەسىمى – قايىرنيسا جالەل قىزى. وتباسىندا – ءتورت ۇل، ەكى قىز.
ءۇيدىڭ ۇلكەنى – انارگۇل قاۋسىلقازى قىزى 70-جىلداردىڭ سوڭىندا پەتەربورداعى س.م. كيروۆ اتىنداعى اسكەري-مەديسينا اكادەمياسىن بىتىرگەن ەكەن. ماماندىعى اسكەري دارىگەر. ۇزاق جىل اسكەري مەديسينا سالاسىندا قىزمەت اتقارىپ، 1987 جىلى ءوزى وقىعان اكادەميادا كانديداتتىق ديسسەرتاسياسىن قورعاپ، سوڭىنان ۇلان-باتىرداعى قورعانىس ۋنيۆەرسيتەتىندە مەديسينا عىلىمدارىنىڭ دوكتورى عىلىمي اتاعىن الىپتى. سونىمەن قاتار وتكەن جىلى قارىنداسىمىزعا «ەڭبەك سىڭىرگەن دارىگەر» اتاعى دا بەرىلگەن ەكەن.
ال، ەكىنشى پولكوۆنيك انارگۇلدىڭ تۋعان ءسىڭىلىسى جەڭىسگۇل 1966 جىلى 10 ساۋىردە تۋعان. ۇلان-باتىردا كەڭەس وداعى وفيسەرلەرىنىڭ بالالارى وقيتىن №8 ورىس ورتا مەكتەبىن بىتىرگەن. جيىرما جاسىندا موڭعوليا ىشكى ىستەر مينيسترلىگىنىڭ قاتارداعى بولىمىنە حاتشىلىق قىزمەتكە تۇياعى ىلىككەن قىز ءۇش جىل ىشىندە وفيسەرلىك قۇرامعا ءوتىپ، «حاتشىلىقتان باستاپ پولكوۆنيككە جەتكەن» اڭىز ادام رەتىندە تاريحتا اتى قالدى.
جەڭىسگۇل 1998 جىلى رەسەي فەدەراسياسىنىڭ بايىرعى وقۋ ورىندارىنىڭ ءبىرى – رەسەي ىشكى ىستەر مينيسترلىگىنە قاراستى پەتەربور ۋنيۆەرسيتەتىندە دوكتورلىق ديسسەرتاسيا قورعاپتى. ج.قاۋسىلعازى قىزى ءوزى قىزمەت ەتكەن سالانىڭ جەدەل تەرگەۋ-تەكسەرۋ ءىسى بويىنشا ۇزاق جىل ابىرويلى ەڭبەك ەتىپ، سوڭعى جىلدارى قازاقتار شوعىر قونىستانعان باي-ولكە ايماقتىق ىشكى ىستەر باسقارماسىن باسقاردى. ءقازىر زەينەت دەمالىسىندا.
بەكەن قايرا ۇلى
