“Qurbyjannyń” avtory, aqyıyq aqyn – Raıhan İbinqyzy
"Qulaqtan kirip boıdy alar, ásem án men táttá kúı" degendeı, men tuńǵysh tyńdap, tylsym syrlaryna tańdanǵan, rýhanı álem esigin endi ǵana ashqan “Qurbyjan” mátini ústimizdegi jyly 34 jasqa tolypty. Ánniń balapan qanaty alǵash qaǵylǵanda, Qytadyń astanasy Beıjiıńde ótken az sandy ulttardyń án fıstıvalinde memlekettik birinshi dárejeli syılyqqa ıe bolyp, “Qurbyjannyń” avtory, aqyıyq aqyn – Raıhan İbinqyzy jarqyraǵan altyn medalmen jáne aqshalaı syılanypty. Mýzykasyn valıst yrǵaǵynda jazǵan daryndy kompozıtor Záıtuna Abdyqadyrqyzy (uıǵur) men ándi hanzý tilinde tamyljyta shyrqaǵan talantty jas ánshi Gúlnár Abdollaqyzy tıesili syılyqtarǵa kenelip, qýanyshtary qoıyndaryna syımaǵan sátter bolǵan eken. Sonan beri ásem ánniń mátini qulaǵymnan múlde keter emes! Lırıkalyq nazy kókiregime uıalaǵany sonsha, ondaǵy lazzatqa bólerlik sulý kórinister quddy kógildir kóktemniń gúlzar saǵymyndaı kóz aldymnan shýyryp ótip jatqandaı bolady da turady. Keıde eriksiz oı keshem. Sol shırek ǵasyrdan beri talaı ánder sahanalarda, radıo, tele arnalarynda aıtylyp, jurt qulaǵyna jetkenimen, júrekterinen jol taba almaı ómirsheńdikterinen aıyrylyp jatty. Al, “Qurbyjan” áni nelikten saıyn saharalarda, taý asyp, tas basqan kóshpendi halyq arasynda, úlkendi-kishili qalalarda sahynadan bir túspeı, talǵampaz jurttyń berile tyńdap, yntyǵa aıtatyn súıikti ánine aınalyp júr?! Muny tek mátindegi naǵyz qazaqqa ǵana tán óshpes ómir órnekterinen tanı alamyz. Sózimniń betashary retinde bul aıtýly mátin jáne onyń bir kórýdi ańsap júrgen avtorymen qalaı tanysqanyma shamaly aıaldaı keteıin.
1987 jyldyń qyrkúıek aıy. Saýan aýdandyq radıo stansıasynda jýrnanıst kezim. İle Qazaq Avtonomıaly Oblystyń organy – “İle gazeti” mekemesi Kúıtiń qalasynda turatyn, Altaı, Tarbaǵataı aımaqtaryndaǵy 4 qala men 11 aýdanǵa jaýapty menshikti tilshi etip aýystyryp aldy. Gazettiń jańa qurylǵan bólimshesi – “İle halyq baspasy” ǵımaratynyń 2-qabatyna irge tepti. Otbasymyzben kóship bardyq. Jubaıym Gúlzıra Aıymqyzy óz mamandyǵy boıynsha buhǵalterlik jumysqa turdy.
Qalaǵa, baspaǵa, joǵary, orta oqý oryndaryna shoǵyrlanǵan qazaq zıalylarynyń denimen jaqyn tanysyp úlgerdim. Shyǵarmashylyq sheptegi tanymal qalamgerlermen de etene jaqyn óttim. Keńseleri men úıleri kórshi bola qalǵan aqyn Mansur Ábdikeruly jáne ol kisiniń aıaýly jary, Juńgo qazaqtaryndaǵy aqyn qyzdardyń tuńǵyshy ári buıdageri Raıhan İbinqyzy ápekemizben tanysý oraıy osylaı týyldy. Bir úıdegi qos emendeı qatar turǵan jdaǵatty da qaısar jandarmen tonnyń ishki baýyndaı qoıý aralastyq. “Jaqsydan sharapat, jamannan kesapat” degen. Sol qymbat kúnderde olardy ádebıettegi sanaly ustazdarym sanasam, boılaryndaǵy tegeýrindi tektilikterin ónege tuttym. Baspa sóz redaqtorlyǵyndaǵy óskeleń jaýapkershilikterine, adamdar ara qarym-qatynas, syılastyqtaryna, azamattyq móral, adamgershilikterine, qundylyqtarymyzdan bastaý alatyn ishki mádenıetterine qyzyǵa eliktedim. Estı bastaǵannan tántilep kelgen “Qurbyjandy” ánge qumar jubaıym G. Aıymqyzy óz daýsy jetkenshe qyzyǵa shyrqasa, men mátinin jattap, ondaǵy mánerli de tereń maǵynaǵa ǵajaptanýmen boldym...
Qosaǵymen qosa aǵarǵan
Seksenniń seńgirine órlegen bir otbasyndaǵy qos aqyn bul kúnderi Qazaqstannyń Nur-Sultan men Almaty syndy sulý da nán qalalaryna irge kómgen jintikti uldary men kórgendi qyzdaryna únemi kelip ketip turady. Osynaý baqytty kúnderdiń seıil-serýeninen sergek sezimderine oralǵan súbeli jyrlaryn da qoıyn dápterlerine túrtip otyrǵan. El aralap, tanys-bilis, týys-týǵan, quda-jegjattarynyń hoshametterine bólense, shejireli áńgimelerin shertisip, darqan kóńilderin kótergen. Sondaı berekeli dastarqandarda jalyndy jyrlar oqylyp, “Qurbyjan” áni shyǵandap jatatyn-dy. Jurt júregine erte uıalap, taban 34 jyldan beri sezim sazyna aınalǵan bul ánge tebirenbegen jan kemde-kem desek artyq aıtqandyq bolmas?! Bir týar ándi halyqtyń qundy rýhanı qazynasy sanaǵan Shyńjańdaǵy avtorlar arasynan án jaıli tolǵamdy maqalalar jazyp, syndarly oılaryn tebirene aqtarysqandar az bolǵan joq. Demek, “Qurbyjan” ánindegi mátinniń halyq aýyz ádebıeti jaýharlaryndaı kún sanap jarqyraı túsýiniń qudireti sirá nede eken? Bul saýal kópten mazalady. Aqyry tún uıqymdy tórt bólgen osy mátindi butarlaı borshalap, ár detalyn oı súzgimnen ótkize zerdelep, tabıǵaty men ishki qupıa syrlaryna úńildim. Shúlen de tereń shúńetterine boılap, qaýqarym jetkenshe yntyǵa yńǵyrýlaı tústim.
Aq jańbyry jaılaýdyń siberlegen,
Balaýsasy mal barsa jibermegen.
Qoı qaıyryp keleıin, qoı qaıyryp,
Atyń qaıda, qurbyjan, shiderlegen?
Boıamasyz ómirdiń tól týyndysy. Aqynnyń kir jýyp, kindik kesken ata mekeni – Tarbaǵataıdyń qysynda qaharly borany arakidik doldansa, jazynda qońyrqaı bulttary jasyl taýlaryn búrkep, aq jańbyryn jumalap siberleıtin Jaıir jaılaýy. Tulymy jelpildegen bolashaq aqynnyń baldyrǵan balaýsa shaǵy sol kıeli ataqonystyń ystyq ta, jarqyn qushaǵynda ótken. Kóz jaýyn alatyn kerimsal dala kartınasy meniń de kóz aldymda. Shalǵyndy kúreńsesine shaǵaladaı aq boz úılerin tigip tastap, ısi keńsirikti qabatyn sary qymyzdaryn sapyra quıatyn naǵashylarymnyń aýylynda bolǵam. Quddy “sar qymyzyn sapyryp, tamsandyrǵan aýylym” degendeı edi. Sóıtip, kórkine tuńǵysh tańyrqaı kózaıym bolǵanym bar. Keıin de tilshilik saparmen júrip talaı tamashaladym. Jomart eldiń sulý tábıǵaty osylaısha kókeıime shoqtaı basylǵan-dy. Avtor órbitken bala kezgi áńgimesindeı, ol kezdegi búlinbegen tý tabıǵat búgingisine múlde uqsamaıtyn. Jaılaýdyń aq jańbyry damylsyz siberleıtin de turatyn. Jaıiliske barǵan maldy bal tatyr balaýsa jibermeı túnetip te qalatyn. Erikken aýyl balalary balaqtaryn, etekterin túrinip alyp, jalań aıaq órli-qyrly jarysyp, qozy-lau pen qoılardyń ústindegi jańbyrdan jınalǵan sýlardy shýashqa ezip shý shyǵaratyn. Qoı ústindegi kóbirshikterdi júnderimen qosa julyp oınaıtyn. Malmandaı sý bolǵandaryn da elemeı altybaqan tebetin. Aýyl qonǵan jasańynan tuıaq qaǵar tas ta tabylmaıtyn jattyq. Tońazytar salqyn samaly da shoqtaı janǵan balalarǵa darymaıtyn. Jańbyrdan azamattardyń qoldary jumysqa barmaıtyn. Mal da saýylmaıtyn. Qarttar syrbaz etin jep, qymyzdaryn simire otyryp arǵy-bergi tarıhtan áńgime qozǵaıtyn. Sol qyzyqty ómir qarshadaı Raıhannyń kóz aldyna kóp isterdi keltiretin. Ákesi İbin malsaqtyǵynan tys, ysylǵan ańshy, tomaǵaly qyranyn tuǵyrynda “pishtáktatqan” maıtalman quspegi bolsa, anasy Nurbaǵıla Turarqyzy kóneshe de jańasha da bilim alǵan tolyq saýatty, suńǵyla jan edi. Ol ertek, ańyz, jumbaq aıtystyń alýan túrlerin aıtqanda aýzyna qaratatyn. Sonymen birge on saýsaǵynan óner tamǵan simerligimen de rýly elge ataǵy shyqqan. Ol qısa-dastandardy jaǵymdy mahammen jatqa aıtqanda tyńdaýshylaryn aıransha uıytatyn. Oǵan bar yntasymen qulaq túre eliktegen Raıhan bastaǵan balalar tynysh túnniń bir ýaǵyna deıin qyzyqqannan shydastyq berse de, týyrlyqtarǵa tynymsyz túsken jańbyrtyrsyldary terbetkendeı aqyry tátti uıqyǵa shomatyn. Keıde jaınaǵan jastar shoǵyrlanyp án shyrqap, kúı tartsa, áriptester ara aıtystyń tamasha dodasyn qyzdyratyn. Kirbeńsiz jaırańdasyp ázildesetin, tatýlyq uıtqysynan bastalǵan ińkarlyqtyń romantıkalalaryna bólenetin...
Sazger Zaıtýna Ábidihadyr
Bilikti ákeniń iskerligin kórse, asyl ananyń salt-sanasynan túlegen aqyn júreginen óshpeıtin sol ómir máıegi jyrynyń uıtqysy spetti. Jasyl jaılaý, balaýsa, saıkúligin sabyltqan azamattar, túngi qoı kúzeti, qylyqty qyz bár-bári joǵarydaǵy shýmaǵynan bastalyp tur. Qazaqtyń sahara tirshiliginiń tábıǵatpen úndesýi – irkilissiz, qıyndyqsyz, aǵyl-tegil quıylyp jatqan mátinniń altyn arqaýy, berik qalanǵan irgetasy. Mátinniń lırıkalyq keıipkeri – qazaqy qundylyqtardy boıyna sińirgen, uıań ári ójet, ádep-ıbaly, namysty, kórgendi qyz ekeni birden baıqalady. Ol ishteı unatatyn qurbysyna da júrek qalaýynyń bula bulqynysyn tike sezdire almaıdy. Tek, “qoı qaıtaryp keleıin, qoı qaıtaryp, atyń qaıda, qurbyjan shiderlegen?” degen eki tarmaqqa ǵana jasyrynyp jatqan kirshiksiz, taza lúpilin ańǵartqandaı bolady, aıparadaı ashpaǵanymen. Osy sátte oǵan mańaılaı almaı júrgen julymyr jylqyshy qurbysynyń qyzdan mundaı jyly sózdi tosyn estigende esi ketip, “óńim be, túsim be?” dep jerden altyn tapqandaı úmitti janary aıtpasada jalyndaı qalǵan shyǵar-aý?! Onyń sol tusta abdyrap, “atym daıyn, qazir ákelem!” dep júzine kúlki úıirilip qozǵalaqtaǵany kóz aldyǵa kelmeı qalmaıdy! Bul – ómir shyndyǵynyń lırıkadaǵy syrly da til jetpeıtin tustary. Dańsaly avtor kinamshil qyz tabıǵatyndaǵy náziktikti qandaı sheberlikpen kestelegen deshi?!
Aıdap salsań jylqyńdy teriskeıge,
Órlemese, kóp sańlaq eńisteı me?!
Serik bolyp túngi qoı kúzetine,
Óziń kelseń qurbyjan, kelispe me?!
Qýsań – jeter, qashsań – qutylar, jeseń – et, ishseń – qymyz, minseń – kólik bolar kıeli jel qanat jylqy janýar kóbinde jaılaýdaǵy sirigi bitik teriskeıine jaıylatyn ádeti. Óıtkeni, kúnqaqty, qaǵyrlaý kúngeılerdiń oty da sirileý keletinin jaqsy biledi. Kúngeıge qansha aıdasań da daǵdyly teriskeıine qashady. Onyń ústine qanyna bitken tektiligi men órshildiginen bolar, eńistemeı, órge tarta sony qýatyny. Jylqynyń kóp adam bile bermeıtin osy qasıetterin avtor erte ańǵarǵan. Sondyqtan da:
Aıdap salsań jylqyńdy teriskeıge,
Órlemese kóp sańlaq eńisteı me?!” degeni jylqy túliginiń zańdylyqtaryna saı qurylǵan qunarly tarmaqtar. Lırıkanyń bul tustary talaı toptyń talqysyn qyzdyrǵany bar. Kúıtińde qazaqtan tys, Mákoskı, Pýshkın, Lermontov, Rasýl Ǵamzatov t.b álemdik aqyndardyń óleńderin jatqa oqyp jelpindiretin Zulqarnaıyn Malgajuly degen pedagog, aqyn aǵa bar edi. Ol kisiniń birde: “R. İbinqyzy jylqy balasynyń eńistemeı, órleı óristeıtinin biledi eken-aý, dóp basyp aıtypty?!” dep qaıran qalýy da tegin emes-ti.
Ánshi Arzygúl Tursyn
Al, aqyldy qyzdar boıjetken soń oraı týa qalsa qurbylaryn adam tappas syltaýlarmen sózge tartatyny – tábıǵı qýlyqtary. Sonan-aq sózi shıraqy, isi jınaqy da jintikti, ózi ornyqty da bilimdi me, shógel de, tekti me, joq pa dep ishteı jasyryn synap ta úlgeredi. “Qurbyjan” lırıkalyq mátinindegi kórgendi boıjetken kóńili tartqan qurbysyna ádep-ıbaly jaqyndyq baıqatady. Syrlasqysy keletin syńaı tanytady. Munan qazirgi kınolar men tele serıalarda kezdesip qalatyn qyz keıipkerlerimizdiń jygitterge taısalmastan “seni súıem!”, “saǵan turmysqa shyqqym keledi”, “azamattyq nekede turaıyq” degen sıaqty ar-namystan qymsynbaı attaı salatyn keleńsizdikterdiń kóleńkesin de taba almaısyń. Óıtkeni, qylyqty qyzdarymyz saqtaıtyn qundylyqtar – óskeleń urpaq tárbıesindegi alǵy sharttardyń biregeıi.
Al, kórsetilgen shýmaqtyń sońǵy eki tarmaǵy:
Serik bolyp túngi qoı kúzetine,
Óziń kelseń qurbyjan, kelispeı me?!
Munda keıipkerimiz qaljyńǵa súıegen bop qurbysynyń márttigi men kisiligin synamaq ta sıaqty. Onyń ústine syrttaı ózine kóz qyryn kóp salatyn sol qurbysyn ishteı unatsa da til aıqastyrarlyq oraı týylmaı dyǵdyrǵan syńaıly. “Túngi qoı kúzetinde” júrgende, jurt kózinen tasada, jaılaýdyń juldyzdy salqyn túninde órekpigen yntyzyr kóńilderin emen-erkin aqtaryspaq kórinedi. Múmkin keıipkerimiz aıdyndy áje, ardaqty ana shekpeninen shyqqan tekti qyz. Tipti, ony arshyldyq pen talǵampazdyqqa, jigitterdiń ishki jan-dúnıesi men jigerine, arman-tilegine jdaǵatpen úńile alatyn psıholog pe dep te qalasyń. Sahara qyzdaryna ǵana tán quryq boılamas túkpishtikteriniń bir sheti qyltıyp kórinetin tárizdi. Qyz qupıalyqtaryndaǵy mundaı syrlar men náziktikteri basym keletin qatparly tustaryn er aqyndar jetkize de almaıtyn shyǵar-aý?! Bul tek qyzǵaldaqtaı qyz dáýrendi bastan keshken, baıyby men mańyzyna qanyq qaǵylez R. İbinqyzy syndy aqyıyq aqyn analardyń ǵana qolynan keler-aý demekpiz!
Aıdyn-shalqar kóńilim tunyq kóldeı,
Sen degende tolqıdy tynyp bermeı.
Jazylmastaı janymdy jaralaısyń,
Alystasań, qurbyjan, jýyq kelmeı!
Bul shýmaq qazaq ádebıetiniń qara shańyraǵy bolǵan aıtys óneri men ushan-teńiz aýyz ádebıetiniń ǵashyqtyq jyrlaryn elestetetin ulttyq bógenaıy tym bólekshe ári qoıý lırıkanyń bir parasyn alǵa tartqandaı. Onyń ústine baǵanaǵy názik jandy ıbaly qyzymyzdyń qurbysyn jete túsinip, óz taǵdyryn oǵan bar senimmen tapsyrýǵa kózi jetip, senim artqan soń baryp romantıkalyq sezimderge erkin bólengen tusy sıaqty. Jastardyń berik te adal mahabattary sándi jaılaýdaǵy báısheshekterdeı ker samalymen baıaý yrǵala bastaǵandaı. Iá, aıaýly keıipkerimizdiń tasyǵan kóńili “aıdyn-shalqar” kóldeı, kók buıra tolqyndary jaǵany urǵylap alasatatyn muhıttardaı ór sharpyǵany aıan. Eger jylqyshy “qurbyjany” ózinen záýdeǵalam alystasa, janyn “jazylmastaı” jaralaǵanmen teń bolmaq. Lırıkalyq keıipker bul arada búkpesiz jarqyn ún qatyp tur. Naǵyz qaltqysyz mahabbat saltanat qurǵandaı. Osy shýmaqta jyltyraq boıama tilder men ekiushty oı baıqalmaıdy. Birin-biri tolyqtap tórt taǵany teń túsken. Qazaq jastarynyń mahabbat syndy eń qadirli de qymbat baqyttaryn pir sanap, erek qasterleıtindigi eriksiz oı keshtiredi!
Qaıyrmasyn kórelik:
Jaılaýdyń móldir bulaǵy,
Jaıqalǵan jasyl quraǵy.
Jylqyshy jigit – qurbyjan,
Qurbyjan, qurbyjan,
Ózińde kóńil turaǵy!
Eń taza ári móldir bulaqtar asqar taýlar men jannattaı qulpyrǵan tór jaılaýlarda ǵana bolady. Sezimge shabyt, janǵa qýat beretini de sol kirshiksizdigi, zárýligi. Onyń quramyndaǵy aǵzaǵa paıdaly menaraldaryn qazekeń erte baıqaǵan. Sulýlyq ta, náziktik te,kirshiksizdik te sodan ótpes-aý! Móldir bulaq, salqyn samaldyń mápeleýinde sary tańǵa kirpik ilmeı qoı kúzetip, kóńilindegi qurbysymen ázildesip, syrlasyp otyrý qandaı ǵanıbet deseńshi! “Ózińde kóńil turaǵy”. Osy bir qysqa da nusqa tolǵamdy oıdy súıikti qyzdyń aýzynan shyǵarǵan qandaı qudiretti kúsh boldy eken deshi?!
Qazaqta “súıgenińdi alma, súıgendi al” degen mahabatqa tán aqlıalyq danalyq bar. Máni – qyz jigitti onsha unatpasa da, jigittiń ǵashyqtyqtan aýyra jazdap, “ony almaı qoımaımyn!” dep, óz sezimine ǵana berilip ózelenýiniń sońynda baıany az. Kerisinshe, qyz jigitti qulaı súıse, jigit sonymen baqytty bolmaq. Saralanǵan mátinniń ózeginen osy fılosofıalyq nárdiń arqaýyn oıly kózben tápteshtesek kórýimizge bolady. Aıaýly keıipkerimiz qurbysyn shynaıy unatqanyn “ózińde kóńil turaǵy” degen jylylyqpen kómkerilgen sypaıy balamasymen bildirdi emes pe?! Osy tusta avtordyń qazaqqa ǵana tıesili dúnıe tanym men qundylyqtarǵa bala jastan sýsyndap ósken ortaımas bilimine eriksiz moıynsal bolasyz!
“Qurbyjan” mátininen sulý sahara tósindegi arly jastardyń sútten aq, sýdan tunyq kóńil toǵystary sýrettelgen, tartymdy sıýjetke qurylǵan áserli mahabbatyn tamsana tamashalaǵandaı bolamyz. Tekti qyzdyń:
“Qoı qaıyryp keleıin, qoı qaıyryp,
Atyń qaıda, qurbyjan, shiderlegen?” dep sóz bastaýynan lırıkalyk ishki kóńil-kúı birtindep ystyq yqylasqa, adam balasynyń eń qymbat baılyǵy – mahabbat shyrynyna ulasady. Munda sol qyz basty roldy tábıǵı somdap tur. Onyń janyńdy súıindire otyryp qurbysyn ózine tartqan sózderinen jarqyn obrazy elesteıdi. Sonymen birge “Qurbyjan” bolǵan azamattyń bir toǵa, adal, aq peıil, jyly júzdi, qyz minezdi syr-sıpaty da anyq ańǵarǵandaı bolady. Qazaqy erekshelikterimen daralanatyn “Qozykórpesh Baıan sulý” hısasy men “Qyzjibek” fılimindegi ǵajap syrshyl da názik kórinisterdi kóz aldyǵa keltiredi...
Ar aldyndaǵy yntyzyrlyqtyń tutas bir dáýirin qysqa da, nusqa shıratqan “Qurbyjan” mátini qazaq jastarynyń rýhanı sımolyndaı mundalaıdy. Osynaý bir týar mátinniń tartymdy tulǵasy asqar Altaıdyń jupar aýasyna, Qyran men Ertistiń tunyǵyna qanyqqan seter sezimdi talǵampaz kompozıtor Z. Abdyqadyrqyzynyń analyq pak júregin tolqytypty. Sóıtipti de ózegin jara týlap shyqqan áýenmen jańaǵy mátin qaýysha ketipti.Tilimiz ben zeıinimiz jete bermeıtin qubylys dersiń! Al, “Qurbyjan ” ánin alǵash hanzý tilinde tamyljytyp bas júlde alǵan ánshi Gúlnar Abdollaqyzy da baqytty eken! Ánniń shırek ǵasyryndaǵy ómirsheńdigi máńgilik qazyna ekenin dáleldedi.
Áıgili dúldúl ánshi Arzygúl Tursynqyzynyń “Qurbyjandy” qubylta quıqyljytýy – janyńdy jadyratyp saraıyńdy ashsa, kóńilińdi tolqytyp, kókeıińe qona ketedi, júrekterdi jaýlaıdy. Ǵajaby – ánshi qyzdardyń, ásirese A.Tursynqyzynyń ándi eren sheberlik, talǵmady óner, asqan qurmet, qulshynyspen, tereń mahabatpen berile oryndaýy kllassıkalyq órege erkin jetkizdi. Qazaqtan tys, ózge ulttar da osy kóterińki, oınaqy, sazdy, lırıkaly tátti ánmen birge terbelip keledi... Sóıtip, aqyndyq, kompozıtorlyq, ánshilik óner daryǵan mańdaıǵa basar qyzdarymyzdyń ortaq rýhanı tolǵatýynan dúnıege kelgen “Qurbyjan” álemdi áldılegen án áleminde qanatyn erkin qaǵýda. Ónerde shek-shekara bolmaq emes. Án kúlli adamzatqa ortaqtyǵyn tábıǵı sıpatymen rastaýda. Ony álemdik deńgeıde aspandatqan altyn dińgek – qaıtalanbas mátin. Mine bul – “Qurbyjannyń” biz uzaq izdegen qudireti!
R.İbinqyzy zerdeli anasynyń aq sútinen bastap halqtyń asa baı folkllorynan erkin sýsyndaǵan. Ómir qubylystaryna, tabıǵat zańdylyqtaryna zer sala oı júgirtken. Sóıtip, aqyndyǵynyń kemel tapqan aqperen shaǵynda “Qurbyjandaı” óshpes mátin usyndy demekshimiz.
Qarttyqtyq pen aqyndyqtyń ózi shyqqan bıiginde otyrǵan, jany jaısań, rýhy asqaq sarqylmas arshyl sezimniń ıesi, kıeli otbasynyń tuǵyry bolǵan aqyn R.İbinqyzyna myqty densaýlyq, baıandy baqyt, shyǵyrmashylyq tabys tileımiz!
Bolat Qurmanǵajyuly Ákejanov
06.08.2020 j.
6alash usynady
