Mońǵolıanyń Halyq ártisi Baqyshqyzy Qaıjamal apa 97 jasqa qaraǵan shaǵynda baqılyq boldy.
Baıan-Ólgıı aımaǵy irgetasyn qalaǵan 1940 jyldan bastap, ulttyq aımaqtyń mádenıeti men óneriniń kóshin bastaǵan aıaýly ana, óner juldyzy Qaıjekeń shet júrgen qazaq dıasporasy tarıhynyń kýágeri, Baıan-Ólgıı óner oshaǵynyń janashyry, shyraqshysy edi.
Mońǵolıanyń mádenıet, óneriniń altyn kezeńiniń jaryq juldyzdary – Qıbatdolda Jumapıuly, Samjıd Rıımed, Mońǵolhan Arǵynbaıuly, Qusaıyn Dúısenbaıuly, Tóleýhan Jaqsylyquly, Dúısenbi Tasbatyruly, Bekzada Qarmoldauly, Qabikeı Aqymeruly, Ahmetbek Álpekuly, Kálek Qumaqaıuly, Músáıif Qusaıynuly, Núskeı Satypaldyuly, Qadý Jákeıqyzy, Serkeshhan Omarqajyqyzy qatarly qaıratkerlerdiń qasıetti sapynda birge bolǵan ájetaı da qaıtty bu dúnıeden.
Qurmanhan Muqamádıulynyń – «Kezeń ústinde», «Jasyl dóń», Aqtan Babıulynyń – «Ermalaıy» pesalaryndaǵy basty rólderdi somdap, Uly Ǵabıt Músirepovtyń – «Qyz Jibek», «Aqanseri – Aqtoqty» jáne «Qalqaman – Mamyr», Shyńǵys Aıtmatovtyń – «Ana – jer Ana»-laryndaǵy klasıkalyq rólderdi somdaǵan óren talant Qaıjamal Baqyshqyzy 1966 jyly Mońǵolıanyń «Eńbek sińirgen ártisi» ataǵymen, 2014 jyly 90 jasynda Monǵolıa memeleketiniń «Halyq ártisi» ataǵymen syılanǵan.
Qaıjekeń 1966-1974 jyldar arasynda aımaqtyq MDT-yn basqardy.
Marqum asyl qaıratkerdiń urpaq-juraǵatyna kóńil aıtamyz!
Topyraǵy torqa bolsyn!
Suraǵan RAHMETULY
Mońǵolıanyń "Halyq ártisi" Baqyshqyzy Qaıjamal
Baqyshqyzy Qaıjamal 1924 jyly Bulǵyn sumynynyń "Qabyrǵa Bulaq" degen jerinde dúnıege kelgen. Rýy Jántekeı-Sekel urpaǵy.
1938 jyly 14 jasynda Ýlaanbaatar qalasynda sol kezdegi kórkem óner mektebine (qazirgi Mýzyka-Bı akademıasy) oqýǵa túsip, 1940 jyly osy mektepti ozat bitirip Aımaqtyq klýbke alǵashqy on kásibı artısiń biri bolyp qabyldanady. 1953 jylǵa deıin aımaqtyq klýbta artıs, 1953-1959 jyl aralyǵynda Baı-Ólke aımaqtyq áıelder keńesiniń bastyǵy, 1966-1974 jyldary Mýzykalyq Drama Teatrynyń bastyǵy qyzymetin atqarǵan.
Baqyshqyzy Qaıjamal qoǵamdyq salada da kóp qyzmet atqarǵan adam. Halyq Uly Quryltaıyna bir ret, Aımaqtyq halyq quryltaıyna 6 ret depýtattyqqa saılanǵan. Aımaqtyq MHRP-nyń komıtetiniń búra múshesi, pleným múshesine álde neshe ret saılanyp, MHRP-nyń 12, MRJO-nyń 11-sezine delagat bolyp saılanǵan. 41 jyl qoǵamǵa eńbek etip 1981 jyly zeınet demalysyna shyqqan. Qaıjamal apanyń qoǵam aldynda, óner salasynda atqarǵan qyrýar eńbegin úkimet partıa joǵary baǵalap:
- 1966 jyly Mońǵolıanyń «Eńbek Sińirgen ártisi»;
- 2014 jyly Monǵolıa memeleketiniń «Halyq Ártisi»;
- Mońǵolıa mádenıetiniń ozat qyzmetkeri «Altyn Juldyz» ordeni;
- «Eńbek qurmet» medalimen 2 ret, (1947, 1950);
- Halyq tóńkerisiniń 50, 60, 70, 80, 90 jyldyq merekelik medaldarymen qatar kóptegen merekelik medaldarymen marapattalǵan.
2017 jyly Aımaqtyq MDT-nyń 60 jyldyq mereıtoıynda Mońǵol eliniń «Qurmetti azamaty» mártebesine ıe bolǵan Byqyshqyzy Qaıjamal apa 2 ul, 4 qyz ósirip, ulyn uıaǵa, qyzyn qıaǵa qondyrǵan ardaqty ana, aıaýly áje edi. 2020 jyly Baıan-Ólgıı aımaǵynda 97 jasynda ómirden ótti.
6alash usynady
