SOL QOBYZ QAZİR QAIDA EKEN?
Jýyrda áleýmettik jeliniń birin sharlap otyryp, mynandaı derekti kezdestirdik: Qurmanǵazy atyndaǵy ult aspaptar orkestri 1957 jyly Qytaıda konsert qoıǵanda Qytaı Halyq Respýblıkasynyń tóraǵasy Mao Sze Dýnge orkestr jetekshisi, dırıjer Shamǵon Qajyǵalıev Qazaqstan Úkimeti atynan sheber Qamar Qasymov jasaǵan qobyzdy syıǵa tartqan eken.
Bizdi osy syılyqtyń keıingi taǵdyry qyzyqtyrdy. Sol elden kóship kelgen áriptesimizden munyń jaıyn suraǵan edik, bilmeıtin bolyp shyqty. Biraq ótken ǵasyrdyń alpysynshy jyldary Qytaıda bolǵan mádenı tóńkeris kezinde bul qobyzdy qurtyp jiberdi me degen boljam aıtty.
Bir atap óterligi, Qamar Qasymov – túrli halyqaralyq deńgeıdegi kórmelerge qatysqan qazaqtyń tuńǵysh qolóner sheberleriniń biri. Kezinde Sýretshiler odaǵynyń múshesi de atanǵan. Ol órnektep jasaǵan ásem mýzykalyq aspaptar búginde Máskeý, Sankt-Peterbýrg, Almaty, Semeı murajaılarynda saqtaýly tur.
Sheberdiń eńbegi elenip, QazKSR-diń eńbek sińirgen óner qaıratkeri ataǵyna ıe boldy. «Eńbek Qyzyl Tý» ordenimen jáne kóptegen medaldarmen marapattaldy. Shetel ǵalymdary ony «Qazaqtyń Stradıvarıi» ataǵan. Qamar jasaǵan, Qytaı basshysyna syıǵa tartylǵan sol qobyz qazir qaıda eken?
Amanǵalı Qaljanov
