Kıizine júni ketken myń qoıdyń,

Shańyraǵy qaıyńynan kúngeıdiń.

Ári berik, ári yńǵaıly, ári ásem,

Deı almaımyn aǵashyna min qoıdym.

Saıyn dala onyń meken-turaǵy;

Birde kórseń, teristikte turady.

Sarbazdarmen birge kóship saǵymdaı,

Bir qarasań, tústik jaqtan shyǵady.

Shym jibekten myqty jelbaý baılaǵan,

Qozǵalta alsyn qandaı daýyl, qaı boran?

Kirseń jyly ishi qyz-qyz qaınaǵan,

Kókjıekteı dóp-dóńgelek aınalań.

Taýqymettiń kórip edim talaıyn,

Bul kıiz úı boldy meniń saraıym.

Aıly túngi kóleńkesi-aı kólbegen,

Qysta osymen birge ótedi san aıym.

Týyrlyqtyń syrtyn qyraý shalsa da,

Yzǵar ótpes soqsyn boran qanshama.

Sán-saltanat ishi kirseń shyqqysyz,

Kórgen pende tańdaı qaǵar tamsana.

Jyrshy tórde bulbul qustaı saıraıdy,

Baqsy bılep ot basynda oınaıdy.

Baldaı qymyz balbyratyp deneńdi,

Alpys eki tamyryńdy boılaıdy.

Qoıý túnniń qushaǵynda aýnaǵan,

Qandaı ǵajap jalyndy oshaq laýlaǵan.

Ot sáýlesi aımalaıdy irgeni,

Dirildegen qyzyl gúlden aýmaǵan.

Keń ashylyp túngi aýanyń qushaǵy,

Qasıetti tútin kólbep ushady.

Sál sóılese, kenet kóktem sýyndaı

Tasqyndaǵan óleń kópti qushady.

Munda otyrǵan janda qandaı bar qaıǵy,

Ujymaqqa shaqyrsa da barmaıdy.

Shóp kúrkede kún keshkender kúıbeńmen,

Maı tońǵysyz qysta-daǵy jaýraıdy.

Qaıyrshy da kıiz úıdi armandap,

Alypsatar qaryzdanar qalbandap.

Men osynda urpaǵymdy órbitip,

Dám-tuzymdy jaıam kelgen janǵa arnap.

Saltanatty saraıyna patsha mas,

Saraı barlyq úmitińdi aqtamas.

Kıiz úıdiń qudiretińe joq talas,

Saraıyńa bermeımin men baspa-bas!