Qaıda barsań da – Qorqyttyń kóri. Joqtyqtyń sheńgeline myqtap bir ilikken kembaǵal-kedeı ne istemek?! Árıne, alasuryp oılanady. Basyn tasqa da soǵady, taýǵa da soǵady. Tipti bolmaǵan soń keıbireýler urlyq jasaıdy. Aldaý-arbaýmen shuǵyldanady. Tipten kisi óltirýge de barady. Aqyndardyń arasynda ondaılar kóp emes. Áıtse de, ókinishke oraı, bar. Ataqty fransýz aqyny Fransýa Vııon sondaı iske aralasqan degen sóz bar. Kim bilgen, solaı bolsa, solaı shyǵar. Áıteýir onyń uzaq jyldar ustatpaı qashyp júrgeni ras. Ádebıetshi-zertteýshilerdiń aıtýlaryna qaraǵanda onyń beıbereket ómir súrgeni anyq. Mastyqtyń kesirinen qantógis tóbeleske aralasyp, qyrsyqqa shalynǵany jáne ony ózi de moıyndaıtyny onyń myna óleńinen belgili:
Fransýa,
Aldaǵy
Júrsin jazań oıyńda:
Myna bókse salmaǵy
Túsedi erteń moıynǵa!
Bul – jaı moıyndaý ǵana emes, ózine ózi úkim shyǵarý.
(Qadyr Myrza Álı)
Serj Meınar «Urymyn, qanishermin, aqynmyn men, men Fransýa Vııonmyn» fılminde aty shýly shaıyrdyń shynaıy beınesin kórsetkisi kelgen.
Adamnyń jarlyǵa aınalǵan kúni tanystarynan ajyraıtynyn, ólimnen eshkimniń qutqara almaıtynyn jazǵan, jańsaq basqan qadamdary úshin muhtajdyǵyn kinálaǵan Fransýa Vııon úmitsizdikten, sharasyzdyqtan sharshaǵan júregin óleńmen jubatty.
Le. Ósıetnama - 1
VI
Qalamasań da Anjerge ketý jalǵanda-aı -
Ólimge súıreý ózińdi.
Kósheni kezdim alańdarymnan aryla almaı,
Taýqymet jutty tózimdi.
Sanamda – soǵys... al, janym - ólgen... tán - tiri,
Ólikteı sulyq jatyrmyn.
Qutqarady eken júrekti kimniń jarqyly,
Qusaǵa boıdy matyrdym.
Sezimniń Uly azabyn tatqan batyrmyn.
Ósıetnama - 2
HVII
Baǵzy zamanda Aleksandrdyń aldyna
Qaharyn tókken keshegi,
Teńizde qaraqshylyq jasaǵan uzaq jyl,
Shynjyryn súırep Dıomed jetken desedi.
Patsha sotynda keýdesin kesip ár suraq,
Tónipti zalym basyna.
Súıekten ótken sózden ý ǵana tamshylap,
Baqytsyzdyq kepti qasyna.
LIV
Men nelikten bostandyqqa qumarmyn,
Erkindigimdi urlaıtyn
mekenderden qashatyndy shyǵardym.
Qoshtasýǵa quqylymyz biz de endi,
batpaý úshin qaıǵyǵa,
Kóńilimizdi kóteretin kúz keldi.
Qushtarlyqqa, mahabbatqa arbalǵan,
Qýanyshty sátterge
Az eken ǵoı bar ǵumyryn arnar jan!
Ótinish
Molaǵa aqshasyz baratynymdy
Barlyǵy bilýi úshin,
Zymyrap ushyńdar,
Bar daýystaryńmen aıqaılap ushyńdar,
Meniń appaq qanatty óleńderim!
Joramal balladasy
Joramaldaımyn,
ótkenge orala almaımyn!
Qaı jannyń qalaı kıinetinin,
Qabaǵy bulttyń qaı kezde túıiletinin,
Tónetinin de qaýiptiń nege,
Pendeniń zárý bolaryn alyp kúnge de,
Tańdaýym ǵana jańalyq ashatynyn da,
Qaı jerge aspan monshaǵyn shashatynyn da,
Naızaǵaılardyń mamyrda oınaıtynyn da,
Tereń jyranyń tamshyǵa toımaıtynyn da,
Bilemin!
Ózim týraly eshteńe bilmeımin, biraq.
Jelge ushqan shaǵymdardy da,
Qamyqqandy da,
saǵynǵandy da,
Sát saıyn ótirik aıtatynymyzdy,
Saýal aýlynan jaýappen qaıtatynymyzdy,
Qimniń dos, kimniń dushpan ekenin,
Qasqyrdyń nendeı nársege qushtar ekenin,
Túski asqa neniń daıyndalǵanyn,
Alystaıtynyn ýaıymnan bári,
Bilemin!
Ózim týraly eshteńe bilmeımin, biraq!
Este joq eski zamanda umytylǵan kún,
taǵdyryn ózgertkendigin uly tulǵamnyń,
Kimniń kóz aldy mastyqtan buldyraǵanyn,
Kimniń quldyraǵanyn,
Shyn mahabbatty sezingen aqymaqtardy,
Zulymdyq múlde joıylǵan atyraptardy,
Talantty baqytsyzdardy,
Bilemin,
Ózim týraly eshteńe bilmeımin, biraq.
Ómirdiń keıde tolqytatynyn,
Ómirdiń keıde qorqytatynyn,
Taýlardyń, kóldiń, qyrattyń kóbin,
Jerdiń betinde jumaqtyń joǵyn,
Báriniń kúıtteıtindigin kóńildiń qamyn,
Báriniń tatatyndyǵyn ólimniń dámin,
Bilemin,
Ózim týraly eshteńe bilmeımin, biraq!
Orys tilinen aýdarǵan Marlen ǴILYMHAN
6alash usynady
