Tulpar minip, tý alyp, týǵan ólke, týǵan halqy úshin, tabany kúrekteı alpys jyl naıza ustap, eline ese teńdik ápergen batyr ári sheshen, ataqty qolbasy ErJánibek babamyzdyń mynadaı 3 úlken erligin, batyr óz aýzymen bylaı baıandapty:
– San jerde qany sýdaı aqqan qandy qyrǵyn urystyń aldynda júrdim. «Urysta aldynda júrgen ólmeıdi, ajaly jetken óledi» degen shyn eken, sonyń bárinen jaratýshy ózi saqtap, arýaq qoldap aman ótip kelemin, urysa bilse erjigitke jaý qıyn emes, san jerde aptyǵy asyp, kózine qan tunǵan jaý sardarynyń talaıynyń basyn aldym, munymdy erligim deı almaımyn. Ómirde 3 erligim boldy dep topshylap júrmin.
Birinshi erligim: Jıyrmaǵa jańa ilingen qyrshyn shaǵym, jylqy baǵyp júrip, tańǵa taıaǵanda kóz ilindirip alaıynshy dep, atymnyń erin almaı, kók shlǵyndy tóskeıge atymnyń shylbyryn jambasyma basyp, túngi salqyn aýaǵa kókiregimdi tósep, jeıdeniń omyraýynyń túımesin aǵytyp, shalqalap jata kettim. Bir kezde oıansam muzdaı sýyq nárse keýdemdi basyp órlep keledi eken, jylan ekenin kórmeı – aq bildim, qozǵalsam shaǵyp alatyn túri bar. Jylan jyljyp basy dál ıegimniń astyna kelgende seskenbeı aýzymdy asha qoıdym, úńgir dep oılasa kerek aýzyma kelip kire berdi. Dál sol shaqta basyn tisimmen qyrshyp túkirip tastadym, tisim muzdaı bolyp ketti. Sońynan osy ýaqıǵany naǵashy atama aıtqanda, ol kisi:
– Jigittiń erligi baısaldyǵy, ózin ustaı bilgendigi ǵoı, - dep meni maqtap otyryp, - ókinerligi, sol jylannyń basyn sol beti jutyp jiberseń jaqsy edi, - dedi.
– Ol qalaı degenińiz dep suraǵanda;
– Ol synǵa jolyqqan jylan eken, basyn jutyp qoısań boıyńdaǵy erlik pen aqyl parasat urpaǵyńnyń urpaǵyna sheıin jalǵasa berer edi, - dedi.
Ekinshi erligim: Bizdiń el anaý Arqalyq, Edireı taýy, Esil ózeni jaǵasy jaqta júrgende, bir jyly kúzde eshki qotyr degen bir dert jabysty, munyń qyshýy dúnıede joq bolady eken, qasynsa odan ary asqynyp ketedi degendi estidim, sodan tisimdi tistep, úsh aı boıy qolymdy tıgizbedim, kóktem bola boıym túlep, sypyrylyp biiraq tústide saýyǵyp kettim, osyǵan qolymnyń ushyn tıgizbegenimdi erligim ǵoı dep oıladym.
Úshinshi erligim: Bir jyldary Qabanbaı, Bógenbaı úsheýmiz Altaıdyń kún betinde bekinip alyp, qazaqtarǵa tynym bermegen bir jońǵar qaraqshysyn joıǵaly jolǵa attandyq. Sol joly jeti qarańǵy túnde aıdaharǵa aınalyp ketken jýandyǵy adam belinen jýan uzyndyǵy 13 kez keletin nar jylannyń basyn shaptym, sonda júregim qoryqqandy qoıyp, búlik etipte qoıǵan joq, osyny úshinshi erligim dep bilemin, - dep baıan etipti.
Eline qorǵan bolǵan batyrlardyń osyndaı erligi arqasynda, jaýdan aman qalyp, urpaqtan-urpaq jalǵap, tynysh zamanda otyrmyz, sol batyr babalarymyzdyń erligi urpaqtardyń júreginde máńgi saqtalady dep bilem!
6alash usyndy
