ۇزىنمىلتىق باھادۇر
(ۇزىنمىلتىق شەرۋشى ۇلىنىڭ 368 جىلدىعىنا!)
جالىن اتقان جۇرەگىنىڭ ىنتىعى،
رۋلى ەلى قورعان تۇتقان مىقتىنى.
كەمەلىنە كەلگەن شاعى دەسەدى،
شەرۋشىنىڭ باتىر ۇزىنمىلتىعى.
جانىبەككە ۇلگى بولعان ەرلىگى،
توبىلعى تور جاراسقانداي - كەرىگى.
شويىن تۇلعا، قابا ساقال، ەڭسەگەي،
تاڭ قالدىرعان "بەس قارۋعا" بەرىگى!
"باتىر بولسىن، تاسي بەرسىن قۇتىم!" دەپ،
اكە قويعان ءوز اتى ەكەن - قۇتىمبەت.
قولىن باستاپ جاۋعا شاپسا سول بالا،
قارت باتاسىن دەپ بەرىپتى: "تۇقىمدى ەت!".
شايقاستاردا باتىرعا اللا ب ا ق بەرسە،
قاۋمالاپ جۇرت جەڭىسىمەن اپ كەلسە -
"ۇزىنمىلتىق اتا كەلدى!" دەيدى ەكەن،
الاقايلاپ كەلىندەر ات تەرگەسە.
"ۇزىنمىلتىق" اتى سولاي شىعىپتى،
ەل كورىپتى تەرەك بولعان شىبىقتى.
ايباتىنان اي جاسقانىپ كوكتەگى،
جاۋى جاسىپ جالاۋلارىن جىعىپتى.
جۇمىر تۇياق، بەلدەمەسى قاناتتى،
توبىلعى تور اسىراتىن ساناتتى.
ارپالىستا دەيدى جاۋىن جانۋار،
جۇلىپ الىپ، تىستەپ، تارپىپ تاستاپتى.
نايزالاردى، دارىتپاي جەبەلەردى،
ىرقىنا ۇزەكەڭنىڭ كونە بەردى.
دەپ جۇرتى اڭىز قىلدى جانۋاردى،
سوگىلىپ جاۋلارىنىڭ كوبەلەرى.
باتىرعا اسقاق ەدى الىس ارمان،
مىلتىق اپ اڭ اۋلايتىن، قايىس ارقان.
اۋىل ءماز كوك سۇبەلى اڭ ەتىنە،
نار بەلى شىداس بەرىپ قايىساردان.
قارا تاس بەس جىگىتكە قوزعالمادى،
مۇنى ەستىپ ۇزەكەڭنىڭ قوزدانعانى!
قاپسىرا قۇشاقتاۋمەن كەۋدەگە الىپ،
اپاردى اۋدەم جەرگە وزعان باعى!
"تاس شوقپار" سىلتەگەنى جاۋ جاپىرا،
كەتكەندەي گۇرسىلىنەن تاۋ جارىلا!
وكىنىپ ويرات سوندا ويران بولدى،
وكىرىپ اتتارىنان اۋدارىلا.
بىلتەگە وت تامىزسا قورعاسىن وق،
اجالدى ىسقىرتاتىن سورلارىن ۇق!
سيراقتى ءشيتى قويماس بەكىنىستە،
ۇزەكەڭ جاتسا جالعىز جولداسى جوق.
باسىم كۇش شۋ اساۋدى شالمالاسا،
جۇگەن - نوقتا سالماي - اق امالداسا -
باتىردىڭ جايداق مىنگەن تاقىمىنان،
جۋاسىر ءوزىن اساۋ شامالاسا!
كىسى ەدى ار - نامىستى، ءجوندى بىلەر،
قامشىسى دىراۋ تيسە كوندى تىلەر.
جاۋ شاپسا، قارۋسىزدا، قاپىلىستا،
قامشىدان ءتىرى ويراتتار كوزىن ىلەر!
ءادىل بي قارا قىلدى قاق جاراتىن،
قاق جارىپ، قارالىقتى قاڭتاراتىن.
جەر داۋىن، جەسىر داۋىن، قۇن داۋلارىن،
شەشكەندە جۇرتى شۇلعىپ ماقتاناتىن.
قاناتى "اقتاباننان"، "سۇلامادان"،
قالدىرماي جاۋدان كەتكەن، قۇلامادان -
وتىز ەكى جاستا ءولىپ توبىلعى تور،
باتىر كوزگە جاس الدى، جىلاماعان!
قورلاتار اپەستىكتى مايقانداپتى،
ءار ىسىنەن مەنمەندىك بايقالماپتى.
"ەلىنە ەڭىرەگەن ەر بولسىن!" دەپ،
باۋلىپتى بەيىمبەتتى، بايتايلاقتى.
بايتايلاق ۇران بولدى رۋىنا،
جوڭعارعا قارسى قاقپان قۇرۋىنا.
ۇزەكەڭ قارت قىرانداي قوناقتادى،
الاڭسىز سەنىم ارتىپ تۇعىرىنا.
كىندىگى كوكتوعايدا كەسىلمەگى،
باقىت قوي بالالىق شاق ەسىندەگى!
كەرەيدىڭ باتىر ۇلى ءوتتى ومىردەن،
توقسان جەتى جاساۋمەن ەسىل ەرى!
بۇيىرىپ زايسان كولدەن توپىراعى،
داستانىن جازىپ ەلى وتىرادى.
وعلانى ەلدىڭ بۇگىن جۇرەگىندە،
پاراعىن تاريحتىڭ تولتىرادى!
ەل - جۇرتىڭ اسىن بەردى، اسقان باعى،
باھادۇر، رۋحىڭ عاجاپ اسپاندادى.
وزىڭمەن اسقاقتايدى ءور ەڭسەمىز،
ءجون بە ەدى ازات قازاق جاسقانباعى؟!
بولات قۇرمانعاجى ۇلى اكەجان
01.06.2021 ج.
6alash ۇسىنادى
