الماتىدا اقىن اينۇر ورازباي قىزىنىڭ "پەرىشتە جىرىما سەنەمىن" اتتى تۇڭعىش جىر جيناعىنىڭ تۇساۋى كەسىلىپ، ولەڭ سۇيەر وقىرمانعا جول تارتتى. انتون چەحوۆ اتتىنداعى قالالىق ورتالىق كىتاپحاناداعى تۇساۋكەسەر شاراسىنا قازاق پوەزياسىنىڭ شوقتىعى بيىك وكىلدەرى عالىم جايلىباي، داۋلەتبەك بايتۇرسىن ۇلى باستاعان اقىندار مەن قوسا شەرتپە كۇيدىڭ سەركەسى، كۇيشى مۇقاش تاڭعىت جانە جىر سۇيەر جاستار قاتىستى.
ءسوز تىزگىنىن ۇستاعان اقىن ادىلەت احمەت ۇلى جىراۋلار پوەزياسىنىڭ التىن دىڭگەكتەرى اباي، مۇقاعالي جانە دە بۇگىنى كەشتىڭ يەسى اينۇر ورازباي قىزىنىڭ ءمولدىر جىرلارىن مىسالعا كەلتىرە كەلىپ:
جات جەردى جاستانعاندا جازاتايىم،
قانىمەن جازدى مۇمكىن اعاتايىم.
قاسيەتىڭنەن قارا ولەڭ اينالايىن،
قازاقتىڭ ءدال وزىندەي قاراپايىم.
ءۇزىندىسىن تىزىلگەن تاسپادايىم،
تاسپامەن قامشى ورەمىن باسپادايىن.
قالاماساڭ قامشىمدى اۋلاق جۇرگىن،
قاراشا ءۇيدىڭ ەسىگىن اشپا اعايىن،- ارى قاراي ساباقتادى.
تەرەكتىڭ تامىرىنداي تارامدالىپ، ەمەننىڭ بۇتاعىنداي بۇتارلانىپ كەتكەن پوەزيا ارعى بەتتەگى ءور التايعا بارىپ ءونىپ، قاسيەتتى الاتاۋعا كەلىپ بۇرشىك اتىپ ولەڭ ولكەسىندە كەر مارالداي كەرىلدى. دەي كەلىپ، سول كەرمارالداي كوسىلگەن، كەرىم سامال كەشتىڭ كەيىپكەرى اقىن اينۇر ورازبايقىزىن ساحانا تورىنە شاقىردى.
كەشتىڭ باسى ولەڭمەن ورىلمەي قايتا كۇمبىرلەگەن قارا دومبىرانى قارۋ ەتكەن كۇيشى مۇقاش تاڭعىت التى الاشقا اتتى ءماشقۇر بەيسەنبى دونەنتاي ۇلىنىڭ «كەڭەس» اتتى كۇيىمەن كەش شىمىلدىعىن اشىپ بەردى.
كۇمبىرلەگەن كۇيدەن كەيىن ءسوز العان قازاقتىڭ بەلگىلى اقىنى عالىم جايلىباي اقىن جايلى ءسوز ايتا كەلىپ:" مىناۋ كىتاپتىڭ قۋانىشى دەگەن ءوزى ايتىپ تۇرعانداي «پەرىشتە جىرىما سەنەمىن» كەز كەلگەن اقىنىڭ جۇرەگىنىڭ ءدۇرسىلى بار، سەزىمىنىڭ سىڭعىرى بار، ەندى اينۇر ورازبايقىزىن جاس اقىن دەپ ايتۋعا بولمايدى، تولىسىپ پوەزياعا كەلگەن تاعدىر كورگەن، وسى كىتاپتى وقىپ وتىرىپ تالاي دۇنيە كوز الدىمنان ءوتتى. اينۇردىڭ ەڭ ۇلكەن قاسيەتى، قالامعا دەگەن سونشالىقتى ادالدىعى بار ەكەن، وبراز بەرىپ سويلەۋ، كوركەمدىككە ۇمتىلۋ وسىنداي اقىنعا ءتان دۇنيەلەردىڭ ءبىرازى وسى كىتاپتان تابىلادى.
كوكتەم، انا تۋرالى ولەڭدەرىڭ ماڭگىلىك تاقىرىپ، ساعان قىز بولۋ، انا بولۋ، اقىن بولۋ باقىتىن تىلەيمىن." – دەدى.
بۇدان كەيىن كەزەگىمەن ءسوز العان اقىن دالەتبەك بايتۇرسىن ۇلى:" ولەڭ دەگەن شىركىن دە فورما جاقتان ۇلتتىق ولشەم بولعانىمەن، وي قيال جاعىنان قۇيىپ قويعان قالىبى جوق، قالاي تارتساڭ سولاي سوزىلاتىن رەزينكە سەكىلدى، بالا كەزىمىزدە دوڭگەلەكتىڭ كامەراسىن تاسپالاپ ءتىلىپ، اشاعاشقا بەكىتىپ راگەتكا جاساپ قۇستاردى اتىپ وينايتىن ەدىك. تىم قاتتى سوزىپ جىبەرسەڭ ۇزىلەدى، بوس تارتساڭ الاقانىڭداعى تۇمالاقتاي تاستا تۇكىرىپ عانا تاستاي سالادى، ال، قۇلاشىڭدى سوزا مولشەرلى جەرگە جەتكىزىپ تارتىپ تۇرىپ جىبەرىپ قالساڭ كوزدەگەن جەرىڭە ەكپىندەي جەتىپ دىڭ ەتە تۇسەدى، سوزىلعان رەزينكە سەنىڭ وي قيالىڭا ۇقسايدى، الاقانىڭداعى تاس نىساناعا تيەتىن جىر شۋماقتارى سەكىلدى ەكەنى انىق." – دەدى.
اعا بۋىن اقىندار اينۇر ورازباي قىزىنىڭ "العاشقى جىر جيناعىنا بەرىلگەن باعا مەن پىكىرلەردىڭ ءبارى دە ۇمىت-تىلەكتەردى وتەۋ الداعى ۋاقىتتىڭ ەنشىسىندە ەكەنىن ايتىپ، جىر ساپارىنا اق باتاسىن بەردى. تۇساۋ كەسەر اياسىندا اۆتوردىڭ قۇربىلاس ونەر وكىلدەرى جانە سىڭىلىلەرى اننەن شاشۋ شاشتى.
شارانىڭ سوڭى "پەرىشتە جىرىما سەنەمىن" جىر جيناعىنىڭ تۇساۋكەسەرىنە ارنالعان سالتاناتتى داستارحانعا ۇلاستى.
اقجول قادىلبەك ۇلى
6alash ۇسىنادى
