ماقاتان ءشارىپحان ۇلى كوگەداي
جۇڭگو قازاق ادەبيەتىنىڭ كورنەكتى ۋاكىلدەرىنىڭ ءبىرى، جۇڭگو جازۋشىلار قوعامىنىڭ مۇشەسى، اقىن، جازۋشى، دراماتۋرگ، جۋرناليست ماقاتان ءشارىپحان ۇلى كوگەداي 1932 جىلى كۇزدە ءۇرىمجى اۋدانىنداعى قاراتاۋدا تۋعان. 1940-1949 جىلدارى جەمەنەي مەن التاي اۋدانىندا باستاۋىش، ورتا مەكتەپتەردە وقىعان. 1952-1954 جىلدارى شينجياڭ ينيستيتوتىنىڭ تاريح ـ جاعراپيا فاكۋلتەتىنە تۇسكەن. «شۇعىلا» جۋرنالىنىڭ العاشقى شىعارۋشىلارى قاتارىندا قىزمەتكە ورنالاسادى.
1955-1956 جىلدارى «جاڭا جىل كەشىندە»، «جايلاۋداعى جاڭا اۋىل»، «قىزعالداق»، «اقىن دوسىم» باستاتقان ليريكالارى ولەڭ تابيعاتىنا نەداۋىر بويلاعانىن اڭعارتادى. 1957-1965 جىلدارى ول وقىرمانعا تانىلا باستادى، وسى جىلدارى دراماتۋگيا، پروزا، پوەزيا، شالقىما جانرىندا قاتار ەڭبەكتەندى. 1960 جىلدارى «ساليقا-سامەن»، «ەرتىس جۇلدىزى» سەنەريالارىن جازدى. ول كىسىنىڭ «شىڭگىل سىلەمدەرى» قاتارلى تۋىندىلارى وقۋلىققا ەندى. پروزدان كولەمدى شىعارماسى «ءولارا» رومانىن جازدى.
ولەڭ ـ داستاندارى «جىر جولىندا» (1980) كىتاپ بولىپ شىقتى. وكىنىشكە وراي ول كىسى جەمىستى دۇنيەلەر بەرەتىن كەزىندە، 1983 جىلدىڭ 25 قىركۇيەگى بىزبەن ماڭگى قوشتاستى.
تۋعان جەر ءانى
ءسوزى: ماقاتان ءشارىپحان ۇلى
ءانى: دولدا كەنەش ۇلى
ورىنداعان: نۇرلىبەك قىزىرحان ۇلى
(ءاننىڭ تولىق ءماتىنى)
شارىقتاتقان قىران قۇستاي قيالدى،
شىركىن مىناۋ «قىزىلقايىڭ»، «تۇماندى».
ءبىزدىڭ بالا شاقتارىمىز ءبىر كەزدە،
كويلەك الىپ كوبەلەكتى قۋعان-دى.
قايىرماسى:
سالەم ساعان تۋعان جەر،
مەنىڭ ءانىم ــ ساعىنىشىم، تىڭداي بەر.
ۋا، سۇيىكتى تۋعان جەر.
جەر جەتە مە «ساۋىر»، «نارىن»، «قاراعا»،
«مۇز تاۋ» ءبىزدىڭ شىلاۋىشتى قارت انا.
تۋعان ەلدى، تۋعان جەردى، ءداريعا-اي،
مىڭ ايلانسام قۇمارىم ءبىر قانار ما.
6alash ۇسىنادى
