قىركۇيەكتىڭ 17 جۇلدىزىندا كوكقايناردا كوڭىلدى دەكولەمدى ءبىر ءىس-شارا ءوتتى. الماتى وبلىسى ىلە اۋدانىنا قاراستى كوكقاينار اۋىلىنىڭ 44 مەكتەبىندە اقىن ادىلەت احمەتۇلىمەن شىعارماشىلىق كەزدەسۋ بولدى. «ءتىل مەن تاۋەلسىزدىك ەگىز ۇعىم» اتتى ايتۋلى شارا قازاقستاندا تىلدەر كۇنىنە بايلانىستى مەكتەپتەردە ءوتىپ جاتقان مادەني شارالاردىڭ جالعاسى ەدى. الاشتىڭ كوشباسشىسى، ۇلت ۇستازى احمەت بايتۇرسىن ۇلىنىڭ تۋعان كۇنى 5-قىركۇيەك ەلىمىز كولەمىندە انا ءتىلدى ارداقتايتىن تىلدەر كۇنى بولىپ بەكىتىلگەننەن بەرى جەر-جەردەگى مەكتەپتەر اتالعان كۇندى نەگىز ەتە وتىرىپ، تۇتاس قىركۇيەك ايىن ءتىل مەن تاۋەلسىزدىككە ارنالعان تاعىلىمدى اي رەتىندە ارداقتاپ كەلەدى.
اتالعان مەكتەپتىڭ ۇلكەن زالىندا وقۋشىلار مەن ۇستازدار قاۋىمى تىڭعىلىقتى دايىندىقپەن قۇرمەتتى قوناقتى كۇتىپ الدى. مەكتەپ ديرەكتورى نۇرمۇحاممەد ومىربەك ۇلى مەن قازاق تىلىمەن ادەبيەت پاندەر بىرلەستىگىنىڭ جەتەكشىسى امانگۇل ەكپىنتاي قىزى اتالعان ءىس-شارانىڭ ماڭىزىنا توقتالىپ كەزدەسۋدىڭ شىمىلدىعىن اشتى.
«اتا جۇرت» اتتى ولەڭىن وقىپ، ساحناعا كوتەرىلگەن ادىلەت احمەت ۇلى ەلدىك، بىرلىك، تاۋەلسىزدىكتىڭ ءقادىر-قىمباتى تۋرالى كوسىلە اڭگىمە شەرتتى. كوكقاينار، اششىبۇلاق اۋىلدارى اتىنداعى «اششى»، «كوك»، «قاينار» سوزدەرىنىڭ ەتيمولوگياسىن بايانداي كەلىپ، كوك تۋدى كوتەرەتىن كوك تۇرىكتىڭ ۇرپاقتارى كوكقاينار مەكتەبىندە وتىر دەپ جاستۇلەكتەردى جەلپىندىردى. ۇلى اقىندار مەن بۇگىنگى شىعارماشىلق كەش يەسىنىڭ ولەڭدەرىن وقىعان وقۋشىلار جان ءسۇيىندىردى. وقۋشىلار اقىنعا قىزىقتى سۇراقتار قويدى، كەش اۆتورى دا تۇشىمدى ءارى قىزىقتى جاۋاپ بەرىپ، ەمەن-جارقىن سىر ءبولىستى. بالا كەزىندەگى قىزىقتى وقيعالاردان تارتىپ، ءوزىنىڭ ونەردەگى ۇستازدارى، اتاقتى تۇعالاردىڭ ءومىرى تۋرالى ايتقان ەستەلىكتەرى قىزۋ قارسى الۋعا بولەندى. پاترويتتىق تاقىرىپتا جازىلعان ولەڭدەرىنەن شاشۋ شاشتى، مەكتەپتىڭ ونەرپاز وقۋشىلارى دا كىلەڭ رۋحتى اندەردى اۋەلەتتى.
مەكتەپ ۇجىمى قۇرمەتتى قوناعىنا وقالى تون جاپسا، ادىلەت احمەت ۇلى دا «ادىلەت» اتتى تۇڭعىش جيناعىن مەكتەپكە تارتۋ ەتتى. ەكى جىل بويى بەتپە-بەت جۇزدەسەتىن كەڭ ساحنانى، مادەني شارالاردى ساعىنىپ قالعان وقۋشىلاردىڭ ىنتاسى مەن ىقىلاسى بولەكشە بولدى.
قىتايدا تۋىلىپ، سول ەدىڭ استاناسى بەيجىڭنەن ءبىلىم الىپ، اتاجۇرتىن اڭساپ جەتكەن ادىلەت اقىننىڭ رۋحتى ولەڭدەرى مەن قىزىقتى ەستەلىكتەرى ارقىلى جاستارىمىزدى وتانشىلدىققا باۋلۋعا، مەملەكەتتىك ءتىلدىڭ قادىر-قاسيەتىن ارتتىرىپ، تاۋەلسىز كۇندى باعالاۋعا شاقىردى.
تەگەۋرىندى، تەكتى ويلى، قىراعى،
تىم تاكاپپار سايىن دالا قىرانى.
«ۇلى دالا» دەيتىن ۇلى ولەڭنىڭ
ءبىر تارماعى كەم سەكىلدى تۇرادى،
ءبىر شۋماعى كەم سەكىلدى تۇرادى.
توپىراعىندا توپ-توپ ەمەن، توپ-توپ شەڭگەل،
توراڭعىسىن جىرعا قوسپاي وتپەڭدەر.
ەي، اقىندار، اۋىر كۇنا سەندەرگە،
ەرلىك جايلى ولەڭ جازباي كەتسەڭدەر.
التى-التىدان قوسار ءمىنىپ عالامات،
التى جىلدا بولا الماسپىن ارالاپ.
ايباتىنان اي جاسىعان بۇل ولكە،
جانارىنان جاۋ جاسىعان بۇل تاۋلار،
كۇلتەگىننەن بىزگە جەتكەن امانات،
ابىلايدان سىزگە جەتكەن امانات، - دەپ جىر ءدۇلد ۇلىنىڭ تىزگىنىن تارتتى اقىن.
اۆتور: سەيتباتقال ارلەن
