ءانشى، سازگەر ەرمانتاي ءنۇسىپ ۇلى

تابيعاتتان تۋىپ، تال بەسىك تەربەتكەن ءتاتتى اۋەن

ءانشى، سازگەر ەرمانتاي ءنۇسىپ ۇلى 1964.2.15 جۇڭگو شىڭجاڭ ولكەسى التاي ايماعى بۋرىلتوعاي اۋدانى قاراماعاي اۋىلىىندا تۋعان. ورتالاۋ مەكتەپ بىتىرگەننەن كەيىن اتا كاسىبى شوپاندىق جولىنا تۇسكەن ەرمانتاي 1986 جىلدان باستاپ، سىرنايلى وزەن، تاۋ سامالىنداي تاماشا اندەرىن شىعارا باستاعان.

اۋىل، اۋدانداردىڭ ءتۇرلى شارالارىنا قاتىناسا ءجۇرىپ، ايماقتىق وبلىستىق اقىندار ايتىسىندا جارىستاردا تۋىندىلارىمەن جۇلدەنى جەڭىپ الىپ، ءانشى، سازگەر اتانعان. بۋىرىلتوعاي اۋداندىق ساياسىي كەڭەس مۇشەسى بولعان.

التاي ايماقتىق بەيزاتتىق مادەني مۇرا قورعاۋ مەكەمەسى جاعىنان قازاق ۇلتىنىڭ حالىق اندەرىنىڭ ۋاكىلدىك مۇراگەرى اتاعىن العان. شىڭجاڭ ولكەسىندەگى قازاق حالىق اندەرىنىڭ بەيزاتتىق مۇراگەرى.

2017 جىلى وتباسىمەن اتا جۇرتقا قونىس اۋدارعان. ءقازىر شىعىس قازاقستان وبىلىسى تارباعاتاي ءۇرجار اۋدانىندا تۇرادى.
ءىنىسى مۇرات ءنۇسىپ ۇلىنىڭ سوزىنە جازىلعان اندەرى: «قازاقتىڭ سول قىزدارى-اي»، «انالار-اي»، «قازاعىمنىڭ اندەرى-اي»، «ىرعايلى ساي»، «قايران جەر»، توقتاعان كوكەي ۇلىنىڭ سوزىنە جازىلعان: «قاراعىم-اي»، «باعىم-اۋ سەنى ىزدەيمىن»، گۇلدەن مۇلىك قىزىنىڭ سوزىنە جازىلعان: «كەلەسىڭ قاشان»، قيناشكەن ءقامزيننىڭ سوزىنە جازىلعان «قۇستار قايتىپ كەلگەندە»، قىمبات تۇتەكە ۇلىنىڭ سوزىنە جازىلعان: «اۋىلدىڭ سىرلى ءانى»، وجەت دالەلحان ۇلىنىڭ سوزىنە جازىلعان «گۇل داۋرەن» قاتارلى 30 نەشە ءان بار.

ەرمانتاي اندەرىن ورىنداپ كەڭ تاراتقان، جۇڭگو قازاعىنان شىققان ايگىلى تەرمەشى مارقۇم اسەمحان عيبادات قىزى بولاتىن. سازگەردىڭ تۋىندىلارى اۋدان، ايماق، وبىلىس، ولكەدەگى ۇلكەن كونسەرت كەشتەرىندە ورىندالىپ اسا كەڭ تاراپ، حالىقتىڭ ىستىق ىقلاسىنا بولەندى.