احمەت ۇيىندە اباي كۇنى

10 تامىز كۇنى الماتى قالاسى مۋزەيلەر بىرلەستىگى احمەت بايتۇرسىن ۇلى مۋزەي-ۇيىندە اباي قۇنانباي ۇلىنىڭ دۇنيەگە كەلگەن كۇنىنە وراي، «قازاقتىڭ باس اقىنى – اباي» اتتى تانىمدىق ءدارىس ءوتتى. شاراعا زيالى قاۋىم، ونەرپازدار جانە الماتى قالاسى مۋزەيلەر بىرلەستىگىنە قاراستى مۋزەيلەردەن كەلگەن قىزمەتكەرلەر قاتىستى. شارا باستالعانعا دەيىن كەلۋشىلەرگە مۋزەي-ۇي جادىگەرلەرى تانىستىرىلدى. تانىستىرۋدى احمەت بايتۇرسىن ۇلى مۋزەي-ۇيىنىڭ ەكسكۋرسوۆودى ماناتجان اشيروۆ جۇرگىزدى.

ساعات 11:00-دە «قازاقتىڭ باس اقىنى – اباي» اتتى تانىمدىق ءدارىس باستالدى. ۇلتتىڭ ۇلى ۇستازىنىڭ ۇيىندە ۇلى تۇلعانىڭ تۋعان كۇنىنە وراي وتكەلى جاتقان شارانىڭ شىمىلدىعىن الماتى قالاسى مۋزەيلەر بىرلەستىگىنىڭ وكىلى تارىبايەۆ قايرات ساعىنعالي ۇلى اشىپ بەردى.

شارانى مۋزەي-ۇيىنىڭ ءبولىم مەڭگەرۋشىسى، اقىن ادىلەت احمەتۇلى جۇرگىزدى. اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان ورتا مەكتەپ-ينتەرناتىنىڭ تۇلەگى، ءال-فارابي اتىنداعى قازۇۋ-دىڭ 2-كۋرس دوكتورانتى، ونەرپاز ابزال جاڭاباي شاكارىمنىڭ «بۇل ءان باسقا اننەن وزگەرەك» اتتى ءانىن ورىنداپ مەرەيلى ءساتتىڭ سالتاناتىن اسىردى. احمەت بايتۇرسىن ۇلى مۋزەي-ۇيىنىڭ جەتەكشىسى، احمەتتانۋشى عالىم رايحان ساحىبەك قىزى «اباي جانە احمەت اراسىنداعى ۇندەستىك» اتتى تانىمدىق ءدارىس وقىدى. دارىستە ر.ساحىبەك قىزى احمەت بايتۇرسىن ۇلى باستاعان الاش زيالىلارى شىعارعان «قازاق» گازەتى كوتەرگەن جۇكتىڭ ماڭىزى مەن ۇلت تاعدىرىنىڭ ىسىنە كەلگەندە ارىستاردىڭ جۇدىرىقتاي جۇمىلا بىلگەنىن، «قازاقتىڭ باس اقىنى – اباي» اتتى تۇراقتى تىركەسكە اينالعان ۇلى سوزگە اباي دانالىعى مەن پاراساتىن تەڭ سىيدىرعان احمەتتىڭ سۇڭعىلالىعىن تىلگە تيەك ەتتى.

بەلگىلى كۇيشى، التاي، ىلە، تارباعاتاي كۇيشىلىك مەكتەبىنىڭ وكىلى، قازاقستان كۇيشىلەر وداعىنىڭ مۇشەسى سارقىتباي قالي ۇلى كۇيشىلىك مەكتەپتىڭ بىرنەشەۋىن قامتىپ كۇيلەر ورىنداپ بەردى. پروفەسسور، مۋزەي-ۇيدىڭ عىلىمي قىزمەتكەرى سۆەتلانا سماعۇلوۆا حاكىم ابايدىڭ قايراتكەرلىك قىرىن تانىستىرىپ ءوتتى. ءسوز تىزگىنىن ۇستاعان ءا. احمەت ۇلى ءوزىنىڭ حاكىم اباي رۋحىنا ارناپ جازعان «جالعىز» اتتى ولەڭىن وقىپ بەردى. ۇلت ۇستازى تاعىلىم مەكتەبىن كورۋگە كەلگەن جەتىساي قالاسى ب.مومىش ۇلى اتىنداعى مەكتەپتىڭ وقۋشىلارى، اعايىندى احىلبەك يسلام مەن احىلبەك نازىم اباي ولەڭدەرىن جاتقا وقىپ، كوپشىلىكتى ءسۇيىندىردى.

ءىسشارانىڭ اسا قۇندى جادىگەرى – ابايدىڭ دومبىراسىن ىقىلاس دۇكەن ۇلى اتىنداعى مۋزىكالىق اسپاپتار مۋزەيى كوپشىلىك كوزايىمىنا اينالدىرىپ، بۇل دومبىرانىڭ تاريحىن اتالعان مۋزەيدىڭ عىلىمي قىزمەتكەرى راۋشان ايبول قىزى تانىستىردى. ال، احمەت دومبىراسىنىڭ تابىلۋ تاريحىن رايحان يماحانبەت ءتۇسىندىرىپ ءوتتى.

جيىن سوڭىندا ونەرپازدارعا الماتى قالاسى مۋزەيلەر بىرلەستىگى دايىنداعان العىس حات جانە كىتاپتار ۇسىنىلدى.