عۇلاما اقىن اقىت ءۇلىمجى ۇلى ءوزىنىڭ ەرجانىبەك اتتى داستانىندا:
جازبادىم مۇنىڭ ءبارىن ءقازىر ماقتاپ،
جازعانىم تەك بىرەۋى ءتاۋىر ناقتاپ.
ول كەزدە سىر دا جۇرگەن كەرەي ەلىن،
كەلىپتى جاكەڭ كەيىن التاي باستاپ.
قازاققا قاپ تاۋىنداي قورعان بولدىڭ،
جاۋىڭا جاسىل تۇسار زوردان بولدىڭ.
شايقاستا تىرەڭدى يمەي، داۋدا بەرمەي،
ەلىڭدى التاي باستاپ وردان كەلدىڭ، - دەدى. بۇل جىردان كەرەي ەلىنىڭ سىر بويىنان ورعا بارعانىن، ودان قايتا شىعىسقا اۋىپ، سارىارقانى باسىپ، التايعا كەلگەنىن اڭعارۋ قيىن ەمەس.
جانىبەك بەرداۋلەت ۇلى ات جالىن تارتىپ ءمىنىپ جورىققا اتتانعاننان كەيىن ءبىر مەزەت سىر بويىندا، ونان سوڭ ور، ىرعىز وزەندەرى اڭعارىندا، ەدىرەي، ارقالىق تاۋلارىندا، نۇر وزەنى بويىدا، كەيىن كوكسالا، باقاناس قاتارلى جەرلەردە جۇرگەنى انىق، ەندەشە ول جەرلەردە جانىبەكتىڭ ەرلىك ىستەرى، ارينە، حالىق اۋزىندا ساقتالىپ كەلە جاتقانى داۋسىز. مىنانى ايتا كەتكەن ارتىق بولمايدى دەپ ويلايمىن.
ۇلى اقىنىمىز اباي قۇنانباي ۇلى تۋعان جەر: جانىبەك باتىردىڭ اكەسى بەرداۋلەتتىڭ ءىنىسى كىرداۋلەتتىڭ بالاسى وگىز بالۋان – «جيدەباي بالۋاننىڭ» اتىنداعى جەر بولسا، ونىڭ ماڭىنداعى بارلىباي-كەرەيدىڭ جانتەكەي رۋىنىڭ ايگىلى باتىرى باراقتىڭ نەمەرەسى، كەيىن كەرەيگە بي بولعان بارلىبايدىڭ اتى ەكەنىن، ارحات تاۋى ارحات بەكتاس ۇلى باتىردىڭ قاۋاۋىل شوقىسى ەكەنىن الىگە دەيىن اڭىز ەتەدى.
ءشامىس قۇمار ۇلى
6alash ۇسىندى
