ارقادا قار جاۋىپ تۇر
ساكەن ريزابەك ۇلى
ارقادا قار جاۋىپتۇر قاپالاقتاپ،
اقمامىق قۇس جۇنىمە؟!
ماقتاما ءاپپاق.
قابادى قارىس تۇسكەن كوبىك قاردى ،
استىمدا اقتۇلپارىم اشقاراقتاپ .
ات جاراۋ، ارقا جازىق ، كەلەم جورتىپ .
جاتقانداي ءاپپاق الەم، عالام كوشىپ.
سۋىققا بوي الدىرماس اتتى قازاق ،
قازىسىن تۋ بيەنىڭ جەگەن كەرتىپ.
اق بۇرقاق جالى ويناپ جوتالاردىڭ ،
اساۋداي اۋا رايى وسى ارانىڭ .
«ات ءۇستى اۋليە» – دەپ، ايتۋشى ەدى،
اقىلگوي ابىزدارىم اتالارىم.
اسپانمەن ايمالاسىپ جەر ءوبىستى،
وياندى ماحاباتىم وڭىرگە وسى.
دالادا اقپاراقتاي قالعان ءىزىم ،
سەكىلدى بايتۇرسنوۆ ەمىلەسى .
ويناعان كوز قارلىعار اقشىل ساعىم،
دىرىلدەيت اق مۇرتتارى تال-شىرشانىڭ.
اتىمنان اۋدارىلىپ ءتۇستىم ءبىر ءسات،
سەبەبى ات بۋسانىپ، مەن ءشارشادىم.
ۇلپىلدەك ۇكىسىندەي قامىس قىزدىڭ ،
بارادى قالىڭداتىپ قار ۇشقىنىن .
جازۋعا جۇرەك ءسوزىن ءاپپاق قارعا ،
جىپ-جىلى ساۋساعىمدى مالىپ تۇردىم.
* * *
ارقادا قار جاۋىپ تۇر اقنەسىبە ،
كەلتىرىپ تىرشىلىكتى تاۋبەسىنە .
ءۇيىرىپ تورعايباستاپ وڭدى-سولدى،
التايدا جاۋعان قاردى سالدى ەسىمە.
تۇسەدى اق ءشاشۋلار ساۋلاپ كوكتەن ،
اعاشتار توسىپاپتۇر اۋماقتا وسكەن.
اق بۇلتتار اق اجەمدەي اق ماتامەن ،
ءويپاڭ-دوڭ جەر جىرتىعىن جاماپ كەتكەن ،
قاراتپاس قىس اشۋى قال كۇيىڭە ،
قارايدى جاس كەلىنشەكتەي تالدا يىلە.
جەلدىرمە جەل ازىناپ تارتادى كۇي ،
قوبىزىن كەلتىرىپاپ زار كۇيىنە .
جۇلدىزداي قار ۇشقىنى جامىراعان،
قايتارىپ نەسىبەسىن جاز ۇرلاعان.
بۇلت كەتىپ باراجاتىر قارا قوشقىل،
ساۋىلداپ كۇمىس تەڭگە بالاعىننان.
ءالجۋاز جىلىمىقتىڭ مىسىن باسىپ ،
اشۋشاڭ اياز كەلەر ءتىسىن باسىپ.
ارقادا قار جاۋىپتۇر قاراشادا،
اققاردى كەتىپ بارام سىقىرلاتىپ .
2022-جىلى 17-قاراشا
