" اپەكەمە "
اپەكەمە
ەكەۋىمىز ءبىر اتانىڭ بالاسى ەدىك،
تاپسىرعان مەنى ساعان انا سەنىپ.
سولاردىڭ جانعان باقىت جۇلدىزى ەدىك،
سولاردىڭ كوزدەرىنىڭ قاراسى ەدىك.
قايىرما:
سەندە اپەكە، سولاردىڭ،
مەن ساعىنعان كوزى بار.
دەمە كەلمەي جوعالدىڭ،
ساعىنىشىم سەزىپ ال.
اپەكە، قاسىڭا ىزدەپ كەلدىم نەشە،
وسى ءانىم ايعاق بولار ەل بىلمەسە.
كەلەدى ساعان عانا قاراي بەرگىم،
ءديدارىن اكەمىزدىڭ كورگىم كەلسە.
اپەكە، ساعىندىڭ با، اڭسادىڭ با،
باتتىڭ سەن دۇنيەدە قانشا مۇڭعا؟ !
سەزىنەم سەن جىلاساڭ اتا-انامىز،
تۇرعانداي بىردەي جىلاپ قارسى الدىمدا.
اپەكە، بار مەرەيىڭ اۋدى ماعان،
جالىققان كەزىڭ بارما باۋلىعاننان؟ !
ارمانىن وقىپ تۇرمىن اتا-انانىڭ،
ءوزىڭنىڭ كوزدەرىڭنەن جاۋدىراعان…
ولەڭى: قۇماربەك ساقارين
مۋزىكاسى: سارقىت ءيىسحان ۇلى
ورىنداعان: اباي تۇرسىنباي ۇلى
" اپەكەمە" ءاننىڭ استارلى تاعدىرى
اق شىنىداي الماي جاتىپ كەتىلگەن،
التى جاستا اكەسى ولگەن جەتىم ەم.
سىنىق كوڭىلىم قايدا بارسا وسپەگەن،
اكە ورنىنا قايعى ءسۇيىپ بەتىمنەن. -دەپ ءوزى جىرلاعانداي، حالقىمىزدىڭ تارپاڭ تالانىتتى اقىنى قۇماربەك ساقارين، التى جاستا اكەسى ساقاريدان، ون ەكى جاسىندا اياۋلى اناسى نۇريادان ايىرىلىپ بۇعاناسى قاتباعان شاعىندا جەتىمدىك قامىتىن كيەدى. قام كوڭىل انا بويىنداعى سىرقاتىنان الاڭداپ: «مەن ولسەم قۇماربەگىم نە بولادى، جالعىز باۋىرىنا پانا بولسىن» دەپ ويلاپ قىزى بوشەندى جول ورتادا وقۋدان شىعارىپ، ىلىك تاۋىپ قۇتتى ورنىنا قوندىرادى. انالارى قايتىس بولعاننان كەيىن، بوشەن جالعىز باۋىرى قۇماربەكتى پاناسىنا الىپ، نە ءبىر ىستىقتى دا، سۋىقتى دا كەشىپ ءجۇرىپ جەتىلدىرەدى. مىنە وسىنداي ماحابباتپەن وزىنە اكە ورنىندا اكە، شەشە ورنىندا شەشە بولا بىلگەن جالعىز اپەكەسىنە قۇماربەك ءۇشىن بۇل دۇنيەدە ەشكىم دە تەڭ كەلمەيتىن، ونىڭ ورنىن ەشكىم دە باسا المايتىن ەدى.
1963-جىلى ىلە وبلسىنىڭ ءشاپشال اۋدانىندا اشىلعان ءمالىم كەن ورىنىنا جۇمىسشى-قىزىمەتكەر تولىقتىرۋ ءۇشىن سول كەزدەگى ۇكىمەت ورىندارى التايدان الپىس وتاۋ سەميانى كوشىرىپ ءاپارادى. مىنە وسى كەزدە قۇماڭنىڭ اپەكە-جەزدەسى دە سوندا بارىپ جۇمىسقا تۇرادى.
1986-جىلى شاپشالعا اپەكە-جەزدەسىن ىزدەپ بارعان قۇماڭ، جالعىز اپەكەسىن كورىپ ساعىنىش باسىلىپ، سارىعى قانعان كۇندەردىڭ بىرىندە اپەكەمە ولەڭىن جازادى.
سول كەزدە مەنىڭ اپەكەم يلا دا كوكتوعاي كەن ورىنىنان اۋىسىپ بارىپ، وسى ءشاپشالدا جۇمىس ىستەپ جاتقان ەدى.
اپەكە-جەزدەمە امانداسىپ بارىپ ءجۇرىپ، ءبىر داستارقان ۇستىندە بۇيىرىقشا قۇماربەك اقىنمەن جۇزدەسىپ قالدىم.
اقىن سونىڭ الدىندا عانا «شينجياڭ راديو ستانسياسىندا» وتكىزىلگەن تۋىندى اندەر جارىسىندا مەنىڭ «جان بالا» دەگەن ءانىمنىڭ ەكىنشى دارەجەلى سىيلىق العانىن، ءاسىلى ءوز ويىندا ءبىرىنشى بولۋعا ءتيىستى ءان ەكەنىن، وعان باسقالاردىڭ پىكىرى جەڭىپ كەتكەنىن ايتىپ اقتارىلدى.
سول كۇنى داستارقان ۇستىندە «اپەكەمە» دەگەن ولەڭىن وقىپ بەرىپ، سەندە دە جالعىز اپەكە، مەندە دە جالعىز
اپەكە، مەندە دە جالعىز اپەكە بار ەكەن. سەن وسى ولەڭگە ءان جاز. اپەكەمىزگە دەگەن ماحابباتىمىزدىڭ ايعاعى بولسىن دەدى. ارينە اقىننىڭ توگىلىپ تۇرعان ولەڭ جولى ماعان دا قاتتى اسەر ەتىپ وتىر ەدى. كوپ كەشىككەن جوق، سول ساپاردا «اپەكەمە» ءانى تۋىندادى،-دەيدى ءانشى، سازگەر سارقىت ءيىسقان ۇلى.
جالعىز اپايىمىز اكەمە قانداي ستىق بولسا ءبىزدىڭ دە ءالى كۇنگە قورمالىمىز، اسقار تاۋىمىز بولىپ كەلەدى. قازىر سەكسەن ءتورت جاسقا كەلدى. قۇلجا قالاسىندا باقىتتى تۇرمىس كەشىرىپ جاتىر. ساعىنعاندا بارىپ سالەمدەسىپ تۇرامىز. ول كسىنى كورسەم اكەمدى كورگەندەي كوزىمە ىستىق جاس ۇيىرىلەدى،-دەيدى ءقازىر كۇيتىن قالاسىندا تۇراتىن بوپەن قۇماربەك قىزى.
حالقىمىزدىڭ رۋحاني قورجىنىنا تۇسكەن وسى ءبىر سازدى ءاننىڭ جۇرت جۇرەگىنە تەرەڭۇيالاعانىنا، انشىلەردىڭ ءسۇيىپ ايتاتىنىنا تالاي جەردە كۋا ءبولدىق. اسەم ءان ولمەسىن، ءاندى سۇيەتىن جۇرەكتەر جۇدەمەسىن!
قاناتبەك ءزايتوللا
6الاش ۇسىندى
