Qunanbaıdyń ómir joldary, qalyptasý kezeńi sóz bolǵanda Keńgirbaı bıden teris bata alýy eske túsedi. Bul týraly Keńgirbaı bı jaıly estelikterde, T.Jurtbaı, M.Janbolatov, B.Isabaev, B.Saparaly, shyǵarmalarynda naqty aıtylady.
"...Qunanbaıdy sheshesi qolynan jetelep, bir toqtysyn soıyp, Keńgirbaı bıden bata alýǵa barady. Birinshi joly bermeıdi. Kelesi jyly taǵy da barady. Bı ata batasyn bermeı qoıady. Úshinshi jyly keledi. Bermeıdi.
- Úsh keldim, batasyn bermedi, - dep Zere jylaıdy. Sonda Kóki báıbishe bıge:
- Úsh keldi, basyńdy kóter, batańdy ber! - deıdi.
Bı basyn kóterip, Kókige:
- Syrtqa shyǵyp, jan-jaqty qara, eshkim kórine me eken? - deıdi.
Kóki shyǵyp kep:
- Eshkim kórinbeıdi, - deıdi.
Sonda bı:
- Paı-paı, bolmas...- depti de:
- Toǵyz ata tolǵansha, túńligińdi eshikim ashpasyn! - dep qolyn teris jaıyp, teris batasyn beripti. Kelini Zere:
- Atam teris batasyn berdi, - dep jylap qaıtady. Kóki:
- Keliniń jylap ketti, teris bata bergeniń ne? - deıdi.
Sonda qasıeti kúshti Keńgirbaı bı:
- Úsh jyldan beri batamdy alar dep tosqanym balalarym edi. Olardyń biri de kelmedi. Al, kelinim men nemere balama oń bata bersem, onda meniń artymda urpaq qalmaıdy. Óziń shyǵyp qarashy, álgilerdiń artynda ne ketip barady eken? - depti.
Kóki syrtqa shyǵyp kep:
- Artynda ıt pe, qasqyr ma, eki kók birdeńe ketip barady, - depti. Sonda bı:
- Meniń tórt kók bórim bar edi, ekeýi sol, - dep jaýabyn tuıyqtapty.
Teris bata estip qaıtqan Zere kelgende Óskenbaı:
- Batasyn berdi me? - dep aldynan shyǵypty.
- Teris batasyn berdi, - depti Zere renjip.
- Qalaı?
- "Toǵyz ata tolǵansha túńligińdi eshkim ashpasyn" dep qolyn teris jaıdy, - deıdi. Sonda Óskenbaı qýanyp:
- Jarap jatyr! - dep, at shaptyryp, toı jasapty.
Keıin Qunanbaı myrza Bı ata dúnıe salǵan soń, "Qaryzy bar" dep malyn shyǵyndap, zırat saldyrady. Zırat kúmbeziniń qabyrǵasyn qyryq jylqynyń qyly men qyryq eshkiniń maıyn, qanyn aralastyryp kótergen eken. (B.Saparaly. «Quanbaı qajy» Almaty. 1995 j. 108 b.)
Kázir Keńgirbaı bıdiń kesenesi áli sol qalpynda saqtaýly. Abaıdyń 150 jyldyq mereıtoıy qarsańynda kúrdeli jóndeýden ótkizilip, syrty aq mármármen qaptaldy.
Jınaqtaǵan: Almahan Muhametqalıqyzy
6alash usynady
