Shyǵys Qazaqstan oblysy Kókpekti aýdany Tassaı aýylynyń janyndaǵy Omby-Maıqapshaǵaı tas jolynyń boıynda batyr Qazybek Sámenbetuly Súıinbaı nemeresine arnap eskertkish ornatyldy.
Tuńǵysh Prezıdent – Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda: «Bizdiń babalarymyz ǵasyrlar boıy ushqan qustyń qanaty talyp, júgirgen ańnyń tuıaǵy tozatyn ulan-ǵaıyr aýmaqty ǵana qorǵaǵan joq. Olar ulttyń bolashaǵyn, keler urpaǵyn, bizdi qorǵady. San taraptan suqtanǵan jat jurtqa Atamekenniń qarys qadamyn da bermeı, urpaǵyna mıras etti. Týǵan jerdiń árbir saıy men qyrqasy, taýy men ózeni tarıhtan syr shertedi. Árbir jer ataýynyń tórkini týraly talaı-talaı ańyzdar men áńgimeler bar. Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis», degeni bar. Sondaı uly tulǵalardyń biriniń aty óshpesteı bolyp hatta qalyp, urpaq sanasynda kúni búginge deıin jattalsa, keıiniń erligi men etken eńbegi úrkin-qorqynmen birge umyt bolǵany da jasyryn emes.
Sondaı babalardyń biri – XVIII ǵasyrdaǵy Qazaq halqynyń Jońǵar shapqynshylyǵyna qarsy Otan qorǵaý soǵysynda qazaq qolynyń myńdyǵyn basqarǵan naızager batyr, qarý-jaraq jasaýdyń has sheberi, Abylaı hannyń mór-júzigin soqqan zerger, 1757 jyldan bastalǵan qazaqtardyń Ejen handyǵymen (Manjý-Sın ımperıasy) aradaǵy «Jylqyǵa jibek» saýdasynyń neshe márte kerýenbasy bolǵan Qazybek Sámenbetuly Súıinbaı nemeresi.
Búginde Abaq Kereıdiń beldi rýlarynyń biriniń aty bolyp, urpaqtary Altaıdan Anadolyǵa deıin taraǵan Qazybek batyrdyń murasyn ǵylymı zertteý jumystary eki jyl buryn bastalǵan bolatyn. Nátıjesinde, shań basqan arhıvterden Qazybektiń erligi men dıplomatıalyq qarym-qatynastaǵy sheberligi, t.b. jaıly derekter tabylyp, tarıhshylar men zertteýshilerdiń buqaralyq aqparat quraldarynda kóptegen ǵylymı maqalalary jaryq kórdi. Zertteýlerge súıene otyryp batyrdyń mazary da tabyldy. Urpaqtary tarapynan batyr baba basyna qoıylǵan 6,6 metr bıiktiktegi záýlim eskertkish osy jumystardyń bir kórinisi. Aldaǵy ýaqytta Qazybek Sámenbetulyna arnalǵan zertteý eńbekteri kitap bolyp basylyp, jas urpaqqa batyrdyń erligi men sheberligin uǵyndyrý maqsatynda ǵylymı-praktıkalyq konferensıa ótkizý josparlanǵan kórinedi.
Maıgúl Sultanqyzy
6alash usynady
