Uly dalanyń ushan-teńiz rýhanıatynyń bir qıyry shekara syrtyndaǵy qandastar qonystan aımaqtarda ekeni barshaǵa aıan. Ásirese, qazaqtyń kúıshilik mektebiniń asa iri bir butaǵy sanalatyn Altaı-Tarbaǵataı mektebiniń basym kóp sandy ókilderi Shyǵystaǵy kórshimiz QHR-daǵy Altaı, İle, Tarbaǵataı jáne Erenqabyrǵa aımaqtarynda ómir súrgeni belgili. Elimiz táýelsizdigin alǵan otyz jyldan beri atajurtyna oralǵan aǵaıynnyń ónerpaz azamattary atalǵan óner mektebiniń az bolmaǵan muralaryn el qazynasyna ákelip qosty. Bul árıne egemendigimizdiń arqasy.
Respýblıkalyq kúıshiler odaǵy Almaty fılıalynyń «Kúı álemi» atty mádenı sharasy keshe (2021 jyly 21 jeltoqsanda) Mýltmedıalyq dástúrli mýzyka ortalyǵynda ótti. Sharanyń sóz tigziginin belgili kúıshi, shyǵys shertpe kúılerin zertteýshi Muqash Tańǵytuly ustady.
Atalǵan sharada Kúıshiler odaǵyna jańadan múshe bolǵan on ónerpazǵa múshelik kýálik beriledi. Kúıshi, ustaz, Nesipgúl Shákeeva Sharynbaıqyzyna «Qurmanǵazy» tósbelgisimen marapalsa, kúıshi, Qurmanǵazy atyndaǵy ulttyq konservatorıasynyń oqytýshysy Asylbek Keńeıgesovqa «QR Mádenıet salasynyń úzdigi» tósbelgisi berildi. Talasbek Ásemqulov atyndaǵy kúıshiler baıqaýynyń birinshi oryn júldesi Ertaı Barlyqovqa tapsyryldy. Shyǵys kúılerin bir kisideı zerdelegen Muqash Tańǵytulyna «Halyq kúıshisi» tósbelgisi tabys etildi.
Atalǵan ıgi sharanyń eń úlken jańalyǵy – Altaı-Tarbaǵataı kúıshilik mektebiniń negizinde qurylǵan «Shyǵys shertpesi» atty ansámbldiń tuńǵysh ret resmı tusaýy kesildi. «Shyǵys shertpesi» ansámbli Kámal Maqaıulynyń kúıi «Meniń dombyramdy» kúmbirletti.
Keshke atalǵan mektep ókilderi, zertteýshiler jáne ónersúıer kópshilik qatysty. Atalǵan mektep aıasynda qurylǵan ansamblden elimizdiń kúter úmiti kóp. Bul mektep elimizdiń óner jáne rýhanıat salasynda tolyqqandy jalpylassa, myńjyldyq muramyz bolǵan kúı tulparynyń jal-quıryǵy tutasymen tolysa túser edi.
