Almatyda aqyn Uljalǵas Jákibaevanyń «Ómir-aı» atty óleńder jnaǵy baspadan shyqty.
Aqyn Uljalǵas Jákibaeva Arǵy bettiń jyrsúıer oqyrmandaryna erteden tanys qalamger. Shynjańdaǵy túrli merzimdi basylymdar arqyly jurtqa belgili avtor beınetti ómirdiń zeınetin Atamekeni Qazaq elinde kórgen. Seksen jasynda jaryq dúnıege qosh aıtqan qalam ıesiniń sońynda qalǵan jyr murasyn urpaqtary «Ómir-aı» atty jınaq retinde oqyrman qaýymǵa usynyp otyr.
Ǵumyrynda ystyq-sýyqty kóp kórgen avtordyń alýan taqyrypta órbitken óleńderi oqyrmanyn san alýan oıǵa jeteleıdi. Jınaqqa aqynnyń ár kezeńderde jazylǵan óleńderi toptastyrylǵan.
Kitap óleńsúıer jalpy kópshilik qaýymǵa arnalǵan.
Uljalǵas Saparbekqyzy Jákibaeva 1942 jyly Qytaı Halyq Respýblıkasy, Qulja aýdany, Kókqamyrda dúnıege kelgen. 1965 jyly Shynjań Medısına ýnıversıtetin bitirgen. 1980 jyldan 1997 jylǵa deıin İle oblystyq «Dostyq» emhanasynda ishki aýrýlar mamany retinde qyzmet atqarǵan. Atamekenge oralǵan 2000 jyldan beri Almaty qalasynda da turdy. 2022 jyly shildeniń 23 kúni baqıǵa attandy.
Aqyn 13 jasynan bastap óleń jaza bastaǵan. 1991 jyldan beri QHR Shynjań jazýshylar odaǵynyń múshesi. Qytaıdaǵy túrli basylymdarda 400-ge jýyq óleń, dastan, tolǵaý jáne ádebı syn eńbekteri jaryq kórgen. Óz mamandyǵy boıynsha Gonkongta basylǵan «Áıgili adamdar» atty kitapqa esimi engen.
2002 jyly «Otanǵa oralǵanda» atty óleńi elimizdiń baspasózinde jarıalandy. «Jas tamshylary» atty óleńder jınaǵy jaryq kórgen.
Ádilet Ahmetuly
