Almatyda «Kókjıekte kún sáýle» atty óleńder jınaǵy jaryq kórdi.
Arǵy bet Qumyl aımaǵy Aratúrik jerinde týyp-ósip, óz ortasyna shyǵarmalary arqyly tanys bolǵan Áserbaı Baıtollauly táýelsiz atamekenine kelgennen keıin, erkin eldiń aýasymen tynystaı júrip, kókeıdegi óleń joldaryn kitap etip oqyrmanǵa usynyp otyr.
Kitap kópshilik qaýymǵa arnalǵan. Alǵy sózin Saǵatbek Aqymetqajıuly jazǵan bul jınaq «Úshqıan» baspasy arqyly oqyrmanǵa jol tartýda. Aqyn óleńderinde:
Ómir qaıda bir teride azapsyz,
Namysy ór máńgúrttikten azatpyz.
Kók baıraqty Sary arqanyń tósinde,
Tulǵasy taý, tuǵyry tas qazaqpyz.
Jyr deıtuǵyn ǵashyǵymen órtengen,
Shejiremdi shemen bolǵan shertem men.
Abylaı men Abaı týǵan qazaqtan,
Úlken úmit kútip júrmin erteńnen.
Qazaq emes ór namysy erte ólgen, - dep kósilse, al birde:
Qashanda ultqa degen tilek tunyq,
Jettik áıteý otanǵa bilek túrip.
Óz elińde ultaraq bolǵan abzal,
Týǵan jerge tý tigý – júrektilik! – dep Ana otan, týǵan jer aldyndaǵy paryzyn beıneleıdi.
Aıta ketelik, Áserbaı Baıtollauly 1959 jyly qarashanyń 21 juldyzy QHR, Qumyl aımaǵy, Aratúrik aýdanynyń Narynkir degen jerinde dúnıege kelgen. Ańsap jetken Atajurtynda qalamyn erkin siltegen aqyn, 2018-2022 jyldary Almaty oblysynyń Memlekettik arhıvinde jumys istegen. Ótken ǵasyr basyndaǵy qundy qujattar men tarıhı muralardy búgingi jazýǵa túsirip, ǵylymı aınalymǵa engizýge bir kisilik úles qosýda.
Á. Baıtollauly qazir Almaty oblysy, Qarasaı aýdany, Jambyl aýylynda turady.
«Kókjıekte kún sáýle» – avtordyń oqyrmandarǵa usynǵan tuńǵysh jyr jınaǵy.
Mıras Altaı
