Germanıanyń kez kelgen jerinen kitap oqyp otyrǵan adamdy kóresiń. Olardy tek mektep aýlasynan ǵana emes, alań, aıaldama, kofehana men saıabaqtarda da kezdestirýge bolady. Qashanda árbir germanıalyqtyń sómkesinen bir-eki kitap túspeıdi. Áredik ýaqyt shyǵa qalsa kitaptaryn alyp oqı otyrady.
Budan bólek, germanıalyqtar kitap oqý memlekettiń bolashaǵyna áser etedi dep túsinedi, únemi kóp kitap oqý jastar men jasóspirimderdiń bilim alý sheberligin arttyryp, qabyldaý men oılaý qabiletin joǵarylatady dep qaraıdy. Sondyqtan ata-ana men mekteptiń qadaǵalaýynan syrt, úkimet te balalardy kitap oqýǵa shabyttandyryp otyratyn qoǵamdyq is-sharalar asa mán beredi. Tipti besinshi synyp oqýshysyna da oqyrman bıletin berip, kitaphanadan kitap alyp oqýyna ruqsat beredi.
Germanıada jubaılar balasy dúnıege kele sala kitapqa áýestenýge tárbıeleıdi. Onda balanyń tuńǵysh oıynshyǵy kitap bolady. Áke-sheshesi ár kúni uıyqtar aldyna balasyna kitap oqyp beredi nemese balasymen birge kitap oqıdy.
Germanıanyń bastaýysh mektep oqýshylary sabaqty negizinen túske deıin ǵana oqıdy. Al kitaphana sabaqtan bosaǵan ýaqytty paıdalanyp oqýshylarǵa alýan túrli mánerlep kitap oqý is-sharalaryn jıi uıymdastyrady. Muǵalimder orta mektep oqýshylaryna taqyryptyq tapsyrmalardy berý arqyly soǵan qatysty kóptegen kitapty oqýyn talap etedi.
Germanıada ár otbasynda kitap sóresi, kitap oqý bólmesi jobalanyp qana qoımaı, tipti, qonaq úıine de kitap qoıady. Ondaǵy kitaptardy úı ıeleri tolyǵymen oqyp shyǵady. Kitap sóresi ejelden úı bezendirýdiń mańyzdy bir bólegine aınalǵan. Germanıanyń árbir otbasynda 300-den astam kitap saqtalyp, shamamen adam basyna 100 den astam kitap týra keledi eken. Sondyqtan da germanıalyqtar «Kitapsyz otbasyn – terezesiz úı» dep sanaıdy.
6alash usynady
