Dárıǵa súıgen jary Nurǵısa Tilendıev týraly syr shertedi.
– Qazaqtyń jaryq juldyzdarynyń biri Nuraǵańnyń dıdaryn kórip, tildese almasaq ta, jan serigi bolǵan sizben kezdesýdiń nesip bolǵanynyń ózi biz úshin úlken qýanysh. Siz Nuraǵańnyń qasynda 33 kóktem, 33 jazdy uzatsańyz, biz de sol altyn saýsaq Nuraǵańnyń «Aqqýdaı» ásem kúılerin estip eseıdik te, «Kýá bolyn» aıtyp talaı qurby qyzǵa qıyldyq. Ónerde shek-shekara joq degen osy. «Kýá bol» demekshi, «Kýá bol» áni Nuraǵańnyń sizge taqqan syrǵasy deıdi ǵoı?
– Men Nurekeńmen 1968 jyly kınostýdıasynda tanystym. Sol jyldan bastap eseptesek, óziń aıtqandaı, men Nurekeńmen birge 33 kóktem, 33 jazdy attandyryppyn. Bul da bolsa jaratqannyń maǵan bergen syıy, úlken baqyty dep oılaımyn. Men ol kezde «Qazaqfılm» kınostýdıasynyń óndiristik bóliminde jumys istep, bir jaǵynan osy kınostýdıanyń janynan Sháken Aımanov ashqan eki jyldyq akterlik kýrsta oqyp júrgen kezim bolatyn. Bir kúni kádimgideı jumysta otyr edim, rejıser Abdolla Qarsaqbaıev aǵaǵa ilesip, qulaǵy qalqaıǵan, kózinde ot bar bireý kirdi. Abdolla aǵa Berdibek Soqbaqbaıevtiń «Meniń atym Qoja» fılmin túsirip jatqan kezi edi. Menen mashına surap kelipti. Óndiristik bólimde isteıtin bolǵan soń, qyzmetkerlerdi tegin kólikpen qamtamasyz etý bizdiń mindetimiz edi. Sonyń arasynsha álgi qalqan qulaq:
– Qaryndasyńnyń aty kim? - dep surady, Abdolla aǵadan.
– Dárıǵa.
– Aty ádemi eken qaryndasyńnyń, - dep álgi adam jerimdi, rýymdy surady. Az kem tildesken soń ol kisiniń Nurekeń ekenin bildim. Sosyn kóp aılanǵan joq, ekeýi shyǵyp ketti. Mine bul qazaqtyń ónerpaz oǵlany Nurǵısamen tuńǵysh kezdesýim. Budan buryn ánderin estip, keıbir ánderin aıtyp júrsek te, ózin kórmegen Nurkeńmen kezdeskenime men de ishteı qýanyp qaldym. Biraq ol kezde sol «qalqan qulaqtyń» bolashaq jarym bolady degendi kim oılaǵan. Jazymysh solaı sekildi, kóp uzamaı, Nurekeńmen taǵy da júzdestim. Bul kezdesý – meniń ómirimdi jańa bir arnaǵa burǵan kezdesý boldy.
Sol joly «Qazaqfılm» kınostýdıasynyń bir bólim óner adamdaryn qonaq qylyp, dastarqan jaıdy. İshinde akter, rejıserleri, opera ánshileri bar úlken úırme. Meımandardyń qurmetine qala syrtynan Almaty ózeniniń jaǵasyna kıiz úı tigildi. Órik gúl ashyp, jer dúnıe jasyl kóılegin kıgen mamyr aıynyń tamyljyǵan kúni edi.
Ásem Alataýdyń bókteri. Sarqyrap aqqan ózen jaǵasyna jaıylǵan qazaqtyń kól-kósir dastarqany, qonaqtar da shat-shadyman. Ádemi ázil, kóńildi áńgime, án – ánge, kúı – kúıge jalǵasqan tamasha mereke boldy. Júzi bal jaınap, kózi ushqyn atqan Nurekeń sharyq urǵan shabytpen kósiltip kúı tókti. Qaıran Nurekem sol kúngi otyrystyń kórki bolyp edi. Erekshe ónerimen eldiń bárin tánti etip edi. O, dárıǵa, jalǵan, ol da bir dáýren edi ǵoı, shirkin!
Sóıtip tamashamen otyryp, keshti batyrdyq da qaıtaýǵa ázirlendik.
– Dárıǵa, sizder kelesi jolǵy mashınaǵa otyrńyzdar, kúte turyńdar, - dedi meımandardy kútip júrgen uıymdastyrýshy jigitterdiń biri. Oıymda eshteńe joq «jaraıdy» dep qala berdim. Biraq kıgiz úıde Nuraǵań, men jáne shamasy osy úıdiń ıesi bolýy kerek, bir aqsaqal úsheýimiz ǵana qalyppyz. Kólik tosyp áli otyrmyz, áne keledi, mine keledi, joq, túngi saǵat bir boldy. Eki boldy... Keledi degen mashına áli joq. Sosyn oıladym, «Ie, aldyn ala uıymdastyrylǵan jumys boldy ǵoı» dep. Sol kúngi tańdy uıqysyz atyrdyq. Sol jerde ózen jaǵasynda, úlken tastyń qasynda Nurekeń maǵan júrek sózin aıtty. Biraq men sengem joq. Onyń ústine, Nurekeńniń menen 20 neshe jas úlkendigi bar edi. Degenmen Nurekeń qatty tolqyp, alaburtyp, «Saǵan degen mahabbatyma Alataý kýá, anaý-ý jymńdaǵan juldyzdar kýá, appaq aı kýá, kók ózen kýá» dep shubyrtyp kele jatty da, óz-ózimen tildeskendeı bop:
Kýá bol, juldyz,
Kýı bol, aıym,
Kýá bol, Alataýym, - dep sóziniń sońyn buryn estimegen áýenmen jalǵastyryp áketti. Sóıtip, óziniń júrek sózin ánmen bildirgen edi jaryqtyq. Sonyń bári qazir halyq arasynda ańyz bolyp aıtylyp júr. El júregine jol alǵan «Kýá boldyń» áýeni men qaıyrmasy osylaı dúnıege keldi. Nurekeń shyǵarmasyn halyqqa usynýǵa asyqpaıtyn. Ábden ıin qandyryp alǵan soń baryp, tyńdarmandaryna usynatyn. Biz bas quraǵannan keıin 2 jyl ótkende (Nurekeńe turmysqa shyqqanda men 21 jasta edim. Al Nurekeń 44 jasta bolatyn) Nurekeń aqyn Tumanbaı Moldaǵalıevti shaqyryp alyp, ánniń mýzykasyn roıalda oınap, qaıyrmasyn aıtyp, tarıhyn túsindirip, mátin jazýdy ótindi. Tumanbaı kóp aılanǵan joq, aýasha bólmege kirdi de, tez jazyp bitirdi. Qaıyrmasy sol burynǵy qalpynda qala berdi. Keıin bul ándi Roza Jamanova radıoǵa jazǵyzdy... - dep Dárıǵa jeńgemiz qyzǵaldaq ǵumyrynyń umytylmas sátterin keńsirgi ashyp turyp áńgimeledi de, syzyltyp «Kýá bol» ánin aıtty. Syńar aqqýdyń syńsyǵan únindeı áýenine diril aralasyp, sońyn aıta almaı býylyǵyp qalǵan ol az kem únsiz otyryp, áńgimesin ary qaraı jalǵady...
– Nuraǵańnyń kisilik tabıǵaty qandaı edi? Tanymal tulǵanyń jary retinde qandaı artyqshylyǵy bar dep baǵalaısyz? Nuraǵań maıdanǵa qalaı barǵan?
– Turmys bolǵan soń ydys-aıaq syldyrlamaı turama?! Bizdiń ómirimizde qýanysh ta, renish te boldy. Biraq «jaqysynyń ashýy shyt ormal kepkenshe, jamannyń ashýy basy jerge jetkenshe» dep qazaq aıtady ǵoı. Óner adamynyń tabıǵaty bólek bolady ǵoı. Ǵajaıyp talantty bergen táńir olarǵa basqasha tabıǵat syılaıtyn sekildi. Nurekeń de solaı edi. Ol kisi alyp-ushyp, tynsh jaılanyp otyrmaıtyn degbirsiz kisi edi, tipti, mınýt saıyn ózgeredi, bastabynda tań qalatynmyn. Al keıin oǵan da ábden úırenip yńǵaıymen júretinmin. Alǵashqy qosylǵan jyldary renjip qalsam, ashýym basylmaı, júregim aýyryp júretinmin. Al Nurekeń bolsa, ashýyn lezde umytyp, bes mınýtqa jetpeı «Daha, mynaý bylaı ǵoı, anany áıtsek qaıtedi, mynany búıtsek qaıtedi» dep túk bolmaǵandaı sóılep júre beretin. Onyń úlken qasıeti – óte baýyrmal edi. Aqkóńil edi. Onyń ústine, eshqashan jalǵyz júrmeıtin, inileri ylǵı qasynda erip júretin. Sol inlerine kerek kezinde kómek kórsetip júretin kópshil azamat edi. Bizdiń bir ul, bir qyzymyz boldy. Ulymyzdyń aty Danıar, qyzmyzdyń aty Dınara. Dınaranyń shyn aty – Dımzýhra. Dımash aǵamyz ben Zýhra jeńgemizdiń qurmetine qoıǵan edi. Danıar Nurekeń dúnıeden ozǵan soń bir qansha jyldan keıin qaıtys bolyp ketti. Nurekeń óte balajan edi. Qos qulynyn qatty erkeletin.
Nurekeńniń shyǵarma jazý úrdisi ózgeshe bólek bolatyn. Ol óziniń mýzıkalyq týyndylaryn hat sıaqty jazady. Báz bir kompozıtorlarsha roıáldyń mańynan shyqpaı qoımaıtyn. Shyǵarma ábden bitken soń baryp pıanınoǵa otyratyn. Ol da Nurekeńniń bir keremeti desek artyq emes, árıne. Nurekeń meni jaqsylyqqa úıretti. Ónerdi qasterleýdiń úlgisin kórsetti. «Meniń jarym jan-jaqty ónerli bolýy kerek» dep kınoǵa túsýge de ózi ruqsat berdi. Kún ótken saıyn Nurekeńniń sol qasıetteri ystyq tartyp barady. Keıde tipti ersi kórinetin minezderi de... Sonyń bárin saǵynyshpen eske alamyn. Onyń jańa shyǵarmasynyń alǵashqy tyńdaýshysy da, synshysy da men edim. Nurekeń meniń talǵamyma senetin, al keıde mýzıka tún ortasynda týady. Ondaıda Nurekeń meni shyrt uıqydan oıatyp alady.
– Daha, tyńdashy, jańa týyndy keldi dúnıege, - deıdi.
– Qoıyńyzshy, Nureke, uıqyny buzyp, erteń de kún bar ǵoı, - deıtinmin ondaıda kúıip-pysyp. Endi sol qylǵymdy oılasam ókinem. Nege tyńdaı bermedim dep arman etemin. Uıqymdy qısamshy, tyńdasamshy. Shyǵarmashylyq qýanyshtan órekpip turǵan kóńilin túsinsemshi...
Nuraǵań maıdanǵa da barǵan, jaraly bolǵan. Bylaısha aıtqanda, Nurekeń 2 jastyń ıgiligin kórip, 2 jastyń taqsyretin tartqan adam. Munyń barysy bylaı: Nuraǵań ákesinen 5 jasynda qalypty. Sheshesiniń qolynda qazirgi birinshi Almaty vogzalynyń janyndaǵy bir shaǵyn páterde turypty. Kúnderdiń birinde poezden túsken Ahmet Jubanov (ol kezde Lenıngratta oqıtyn) vogzaldyń oń jaǵyndaǵy páterdiń tóbesinde bezildetip dombyra tartyp otyrǵan qulaǵy qalqaıǵan balany kórip ádeıi burylypty. Ol Nurekeńniń 6 jas shamasyndaǵy kezi eken. Buǵan tań-tamasha bolǵan Ahmet Jubanov balany qasyna shaqyryp alyp aty-jónin bilgen soń, balaǵa ilesip, úıge kiripti. Sheshesinen jón surap, Nuraǵańnyń jaǵdaıyn bilgen Ahmet Jubanov «Bul balany mýzyka mektebine berý kerek» degen talapty qoıady. Sonymen Ahmet Jubanovtyń keńesi jáne kómeginde anasy Nuraǵańnyń jasyna 2 jas qosyp almatydaǵy mýzyka mektebine beredi. Nurekeń dál 17 jasqa kelgende soǵys bolady da, Nuraǵańdy jasy tolypty dep maıdanǵa alyp ketedi. Eger sol 2 jas qosylmaǵanda Nuraǵań maıdanǵa barmaıtyn edi. Soǵysta eki-úsh ret jaralandy. Soǵystan qaıtyp kelgen soń mamandyǵy boıynsha Almatyda bilim tolyqtyryp, keıin Moskvadan drıjerlik kásibin oqıdy. Moskvadan kelgennen keıin Qurmanǵazy atyndaǵy orkestrde, opera teatrda drıjerlik isteıdi. Sol opera teatrda Muqan Tólebaevpen tanysady. Ol kisi «Áı qalqan qulaq, sennen birdeńe shyǵady» dep Nuraǵańdy ónerge baýlıdy. Nuraǵań sol shaqtan bastap án jaza bastaıdy. «Ustazym», «Muǵalim», «Keń dalam», «Jan sáýlem» degen ánderi sol mezgilde jazylǵan ánder.
– Nuraǵań aqıyq aqyn Muqaǵalı Maqataevpen shyǵarmashylyq baılanysta bolyp, «Sarjaılaý» sıaqty óresi bıik, desi basym ánder jazǵany málim. Muqaǵalıdyń «Dárıǵa-aı, dombyramdy bershi maǵan» degen óleńi sol kúnderdiń kýási retinde bizge jetti. Endi Nuraǵań men Muqaǵalı jóninde azyraq áńgimelep berseńiz. Qazaqtyń mańdaıyna bitken eki tulǵa bir- birin qalaı baǵalap, qalaı syılaıtyn edi?
– Nuraǵań bir kúni Muqaǵalıdy «Ekeýimiz birge jumys isteıik» dep shaqyryp aldy. Ol Muqaǵalıdyń densaýlyǵy da jaqsy sergek, jigerli kezi edi. Sosyn ekeýi bir aı birge bolyp 32 án jazdy. Birde úıde otyrǵanda Nuraǵań maǵan «Daha, dombyramdy bershi maǵan» dep, dombyrasyn alyp, kúı tartyp berdi Muqaǵalıǵa. Nuraǵań kez kelgen jerde, kez kelgen adamǵa dombyra tarta bermeıtin. Nuraǵańnyń ózi jaqsy kóretin dombyrasynyń aty da «Dárıǵa» edi. «Qyzjibek» fılmindegi kúılerdi de sol dombyramen oryndaǵan. Qazir áli bar, Nuraǵańnyń kózindeı bolyp úıde tur. Muqaǵalı da Nuraǵańnyń kúılerinen keremet shabyt alsa kerek, ertesi kelgende «Dáıǵa, dombyramdy bershi maǵan» degen óleńin roıáldyń ústine qoıyp ketipti. Buǵan Nuraǵań án jazdy. «Saryjaılaý», «Sálem berem Jetisýǵa», «Esińe meni alǵaısyń»... sıaqty ánderdi ánshiler birinen keıin biri radıoda oryndap jatty. Jurt jyly qabyldady bul ánderdi. Nuraǵań men Muqaǵalı birin-biri óte syılap qurmeıtin edi. Sondaǵy jazǵan ánderi sol dostyqtarynyń kýási bolyp áli el aýzynda júr.
– Jańa ǵana bel asqan ótken ǵasyrda qazaqtyń ne bir marqasqa uldary ómir súrdi. Jumbaq aqyn Jumeken, aǵylesker aqyn Maǵjan, Tólegender poeızányń baǵyn jandyrsa, Shámshi, Nurǵısalar án men kúıdiń serkeleri edi. Endigi bilgimiz keletini Shámshi men Nuraǵańnyń shyǵarmashylyq baılanysta bolǵan kezderi joq pa?
– Nurekeń talantty adamdardy asa joǵary baǵalaıtyn. Shámshige de Nurekeń kompozıtor retinde úlken qurmetpen qaraıtyn. Shámshiniń ánderi halyqqa jaǵymdy, jurt tez qabyldaıtyn, júrekke jeńil ánder bolsa, Nurekeńniń ánderiniń melodıasy kúrdeli. Biraq Shámshiniń ánderin halyq aýyzynan tastamaı aıtyp júrgenimen, marqum Shámishini kózi tirisinde jumys basynda otyrǵan aǵalary baǵalaı bilmedi. Shaǵyn bir aýdanda, jupyny úıde turmys keshirip júrdi. Birde Nuraǵań Shámshini shaqyryp alyp, Dımash aǵanyń aldyna bastap baryp, jaǵdaıyn aıtyp, Lenın kóshesinen 3 bólmeli úı alyp bergeni bar. Ol kezde Dımash aǵanyń aldyna kirý degen óte qıyn kez edi. Bir táýiri Nuraǵańnyń ónerin joǵary baǵalaıtyn Dımash aǵa oǵan úlken qurmetpen qarap, inim dep qatty syılaıtyn. Sosyn da Nuraǵań ol kisiniń aldyna erkin kire berýshi edi. Al ondaı múmkinshilik ǵajaıyp talant ıesi Shámshide bolǵan joq. Qaıta eleýsiz júrgen. Muny óz basym Nuraǵańnyń Shámshige jasaǵan qamqorlyǵy dep bilemin. Al biraq Nuraǵań Shámshimen shyǵarmashylyq baılanysta bolyp kórgen joq.
– Nuraǵańnyń kúıleriniń biri, biri bolǵanda biregeıi «Aqqý» ǵoı. Estisem, el aýyzynda «Aqqýdyń» áýelgi saryny Nuraǵańnyń ákesiniki, ony keıin Nuraǵań baıytyp árlegen, degen sóz bar eken ǵoı?
– Nuraǵańnyń ákesi qolynan óner tamǵan adam desedi. Aǵashtan túıin túıetin adam edi deıdi kózin kórgender. Ol kisi de dombyrashy bolǵan kisi. Biraq 5 jasynda ákeden qalǵan bala ol kisiniń kúıin úırenip alýy múmkin emes edi. Demek, «Aqqý» Nuaǵańnyń óz kúıi. Ol Nuraǵańnyń júreginen túbinen tumadaı qaınap, shymyrlap shyqqan shymyr shyǵarmasy. Biraqta Nurekeń óziniń qyzyǵyn kóre almaı ketken ákesin erekshe saǵynatyn, balalyq minezben oǵan úlken boryshtylyq bildiretin. Sosyn ákemniń de aty atalyp júrsinshi dep bir talaı kúılerin ákesiniń atynda jazdy. Nuraǵań 73 jasynda dúnıeden ozdy. Dúnıeden ozar shaǵynan az buryn orkestrde 6 kúı jazdyryp, ákesiniń atynda radıoǵa berdi. Qazirgi «Arman» sıaqty kúıler sol kezde jazylǵan. Demek, tyńdarmannyń shatasyp júrgeni osy jaǵdaılarǵa baılanysty bolsa kerek.
– Nuraǵań qazaq halqynyń rýhanı álemine óte qundy muralar qosty. Sol eńbekteri úshin kózi tirisinde qandaı syı sıapat kórdi?
– Nurekeń óte baqytty kompozıtor, halqynyń súıikti uly deýge laıyq. Nurekeń de «Halqym úshin shyǵarma jazam, ózimde bardy halqyma arnaımyn» degen sózdi boıtumar etti ári solaı istedi. Sosyn da týǵan halqy ony alaqanyna salyp álpeshtedi. Ónerin joǵary baǵalap, aspanǵa kóterdi. Nuraǵańnyń shyǵarmalary ushan teńiz. Ol kisi operada jazdy, balette jazdy, án, kúı janry jaǵynda da eńbektendi, úlken mýzykalyq eńbekter de jazdy. Orkestr qurdy. Qazirgi «Otyrar sazy» Nurekeń kózi tirisinde qurǵan orkestri. Sımfonıalyq orkestrdi de basqardy. 400 den astam án jazdy, munyń kóbi halyqtyq ánderge aınalyp ketti. Nuraǵań «Men qolymnan kelgenniń bárin jazdym» dep aıtyp otyratyn, rasynda da solaı boldy. Ol kisi ataqtan da qur qalǵan joq, «Qazaqstanǵa eńbegi sińgen qaıratker», «Qazaqstannyń halyq artısi», «Qazaqstan memlekettik syılyqtarynyń laýreaty» ataǵyn, «SSSR-dyń halyq artısi» ataǵyn aldy. Dúnıeden ozardan bir aı buryn aýrýhanada jatqanda Qazaqstannyń prezıdenti Nursultan Nazarbaıev aýrýhanaǵa kelip, kóńilin surap, «Halyq qaharmany» ataǵy ordenin taǵyp ketti.
– Nuraǵań dúnıeden ozarda artyna aıyryqsha amanattap ketkeni, ózgeshe ósıeti boldy ma? Nuraǵań óz mańdaı terimen qurǵan «Otyrar sazynyń» qazirgi hal jaıy qalaı? Nuraǵań urpaǵynan ónerdegi izin basqany boldy ma? Nuraǵańnyń shákirtterinen kimderdi ataısyz?
– «Otyrar sazy» 1983 jyly quryldy. Bul da Dımash aǵanyń kómegimen boldy. Nurekeń Dımash aǵanyń tapsyrýymen qurdy bul orkestrdi, ári akademıalyq orkestr óresine deıin damytyp ketti. Qazir oǵan N.Tilendıev atyndaǵy «Otyrar sazy» akademıalyq fólklorlyq-etnografıalyq orkestri dep Nuraǵańnyń aty berildi. Qazir jaǵdaıy jaqsy. Erekshe damyp ketpese de, Nurekeń qaldyrǵan deńgeıde jumys istep jatyr. Marqum Nurekeń «Daha, «Otyrar sazy» meniń qurǵan orkestrim, ony kózińniń qarashyǵyndaı saqta. Men ólsem de «Otyrar sazy» ólmeıdi»,- dep ketip edi. Shúkirshilik, ótkende elbasynyń qabyldaýynda boldym. Elbasy Nurekeńniń ónerdegi perzenti «Otyrar sazy» el qamqorlyǵynda bolatynyn aıtty.
Nurekeń kóz jumar aldynda, densaýlyǵy nasharlaı bastaǵan shaǵynda, ózi de bildi-aý deımin, «Men ólgende jylamańdar. Men qaıtqanda halqym joqtaý aıtpasyn, «Qustar» ánin aıtyp shyǵaryp salsyn» dep, ajaldy da tik turyp, qaımyqpaı qarsy alǵan edi. Endi bir ósıeti – Jambyl atamnyń qasyna jerleńder dedi. Aıtpaqshy, Nuraǵań aýrýhanaǵa kirerden buryn bir derekti fılm jasaǵan. Sol fılmdy jasap jatqan kezinde Jambyl atasynyń basyna baryp «Ata, men seniń qasyńa jatyp, seni kúzetip jataıyn, maǵan bir metr jer bershi» dep ótindi. Keıin bul ótinishin úkimet basyndaǵylarǵa da aıtyp ketti. Keıin tilegi boıynsha Jambyl atasynyń qasyna jantaıdy.
– Nuraǵańnyń artynda murager qaldy ma? - dediń ǵoı, bar, uly eki jyldan keıin qaıtys boldy dedim ǵoı, qyzy bar. Qazir N.Tilendıev atyndaǵy «Otyrar sazy» akademıalyq fólklorlyq-etnografıalyq orkestri drıjory. Buıyrsa sol balam ákesiniń amanatyn ary qaraı jalǵastyrama dep oılaımyn.
– Sózimizdiń sońyn ózińiz jaıly aıtylǵan áńgimemen aıaqtasaq jón sekildi. Nuraǵań dúnıeden ozǵan soń siz de dombyra ustap, kúı shyǵaryp, ánder jazpsyz. Bul tosyn kelgen shabyt pa, joq álde, mýzykaǵa burynnan beıim be edińiz?
– Men mýzyka kásibin oqyǵam joq. Kerek deseń nota da tanymaımyn. Biraq kishkene kezimnen án-kúıge qumar edim. Nurekeńmen bas quraǵan soń mýzykaǵa tipti jaqyn júrdim. Biraq Nurekeńdi qoldaýmen boldym da, shyǵarmashylyqpen shuǵyldanýǵa tym peıildenip ketpedim. Nurekeń qaıtys bolǵan soń 2 jyldan keıin qolyma dombyra aldym. Nurekeńe degen saǵynysh, qazaqtyń ónerli ulyna degen ystyq mahabbat meniń qolyma dombyra alǵyzdy. Nurekeńe arnap «Qaıran meniń Nurekem» degen kúı jazdym, ánder shyǵardym. Nurekeń maǵan 3 án arnasa, men de shamamnyń jetisine ol kisge bir qansha ánder arnadym. Keıde Nurekeńmen ótken kúnderim kóz aldyma elestep jylap otyryp jazǵan ánderim de boldy. 2003 jyly «Nurǵısanyń aq qusy» degen kúıtaspam shyqty.
– Qymbat ýaqtyńyzdy qıyp, bizge Nuraǵań týraly kóp áńgime aıtqanyńyzǵa myń raqymet!
– Ózińe de raqymet, aınalaıyn! Órkeniń ósisin!
Áńgimelesken Qalıakbar ÚSEMHANULY, 2011 jyl, Úrimji.
6alash usynady
