Osydan onshaqty jyl buryn, rýhanı, ádebı erkin suqpat saıttary kóbirek ashylyp, alty qurlyqtyń ár elderinde turatyn qazaqtyń qyz-jigitteri latynsha, krıllshe, tóteshe – úsh jazýda birdeı jumys isteıtin elgezek jeliler arqyly tanysyp, bilisip, pikirles bolyp jatatyn. Qazaq elindegi, Mońǵolıadaǵy jáne Altaı, İle, Tarbaǵataıdaǵy ádebıetsúıgish jastardyń arasy jaqyndaı tústi. Qanshama esil dostar taptyq. Keıin solardyń birsypyrasymen Almatyda, Astanada júzdestik.
Ádilet Ahmetuly Pekınde oqyp júrgen bozbala kúnderinen-aq, áleýmettik jeli arqyly otty jyrlarymen oqyrman qaýymdaryn oılandyrǵan aqyn bolatyn. Beldeýdegi tulpardaı shıyrshyq atyp turatyn aqyn júrekti azamat aqyry Almatyǵa at basyn tiregen. Óleńinen óz qoltańbasy kórinip turatyn Ádiletti Almatydaǵy kezimizde birqansha ret torqaly toı, topty jıyndarda órtteı saǵynyshqa toly óleńderin oqyp turǵan jerinen kórip, qol soǵyp qoldaý bildirgenbiz. Bul budan bes jyl burynǵy ister edi. Keıin men Ulanbatyrǵa qaıtyp kettim de, aqyn jigitti anda-munda áleýmettik jeliden kózim shalyp qalǵany bolmasa, bir júzdesip, arqa-jarqa áńgimelesýge múmkindik týa qoıǵan joq. Bes jyl shyǵarmashylyq adamy úshin qysqa ýaqyt ta emes. Sondyqtan, búgingi tańda aqparat-baspasóz betinde óte sırek qylań berip júrgen Ádilet poezıasy jóninde birdeńe jazǵym kelip, oǵan ǵalamtor arqyly birneshe saýaldar qoıǵan edik...
Jubatgúl Sambýýqyzy
– Siz ben bizdi kezinde arǵy bettegi (QHR) áleýmettik jeli tabystyrǵan edi. Sol kezderde birshama óleńderińizdi oqyp, tanys boldyq. Bizdiń bilýimizshe poezıaǵa tebindi kelgen edińiz. Aqyndar qalasy Almatyǵa qonystanǵanyńyzǵa da biraz jyl boldy. Qazir qaıdasyz, ne istep júrsiz?
– Alasurǵan bozbalalyq, jastyq shabytpen laq etip tógile salǵan óleńderdi ıi qanbaı jatyp-aq, erkin saıttarǵa salyp jiberip oqyrmandardan lebiz kútetin bir dáýrendi de artqa tastadyq. Sizdermen ǵalamtorda «dostyq» ornatyp júrgen kezimde men Beıjińdegi Ortalyq ulttar ýnıversıtetinde stýdent edim. Keıin oqý bitken soń Úrimjide qazaqtyń úlken fólklorlyq jýrnaly «Murada» jumys istedim. Sol jaqtaǵy merzimdi basylymdar men saıttar arqyly azdap tanyla da bastadyq-aý deımin. Sol kúnderdiń birinde aıaq astynan óz tarıhymdaǵy batyl bir sheshimdi qabyldadym da, bas qurap alyp, Altaıdaǵy aǵynan jarylǵan el-jurtqa, kıeli topyraqqa qosh aıtyp, jubaıymnyń qolynan jetelep, Almatyǵa kóship keldim.
Almatyǵa kelgennen keıin eki jyldaı naqty jumysym bolǵan joq. Azdy-kópti qoǵamdyq sharalarǵa qatysyp, qazaq eliniń ómirimen tanysyp júrdim. Kitaphanalar men murajaılardy kórdim. Joǵarylap oqyǵym keldi. Ǵylymǵa kirgim keldi. Sáti túsip, ǵylym ordasy, QR UǴA, Ahmet Baıtursynuly atyndaǵy Til bilimi ınstıtýtyna jumysqa qabyldandym. Qazir sol jerde ǵylymı qyzmetker bolyp jumys istep jatyrmyn. Bir jaǵynan magıstratýrada oqyp júrmin.
– Sizden jańalyq kútken oqyrmandaryńyz sarylyp qalǵan joq pa? Kitaptaryńyz shyqpady ǵoı?
– Mıllıardtarmen salystyrǵanda halqymyz az, jerimiz keń elmiz ǵoı. Solaı bola tursa da qazaqtyń qoǵamy óte úlken. Almaty – men ómir súrgen Beıjińnen de, Úrimjiden de kishkene qala. Biraq, men úshin álemde Almatydan úlken qala joq sıaqty. Sebebi, qazaq az bolsa da kóóóóóp bolyp kórinip júretin halyq. Qazaq rýhanıatynyń osynaý bir qaınaǵan oshaǵynda júrip, myqtynyń myqtysy ǵana jarqyrap shyǵady. Ol da ómirdiń úlken ádileti ǵoı. Sondyqtan, qazaq eline kele sala gazet-jýrnalǵa óleńimdi tyqpalap, aǵalap, kókeleı jónelmedim. Qaıta ómirdi endi bastaǵandaı kúı keship, kóbirek izdenip, óz elimizdiń ishki jan dúnıesine úńilip biraz júrip qaldym.
Arǵy betten jańa kóship kele qalǵan jas otaýmyz. Turaqty kirissiz júrgen kezderdi de bastan ótkizdik. Balalar kishkene. Qazaqtyń kóshpeli ómirin endi Almaty qalasynyń ishinde páterler arasynda jalǵastyryp jatyrmyz.
Degenmen, basylymdarda otyrǵan aǵalar betimnen qaqqan joq. «Úrker», «Tań-SHolpan», «Jalyn», «Juldyz» jýrnaldarynda, «Qazaq ádebıeti», «Jas Alash» qatarly gazetterde anda-munda óleńderim jarıalanyp turdy. Birneshe jyr múshaırasyna qatystym. Bireýinen bas júlde alǵanym bar.
Siz durys aıtasyz. Otyzdan asyp baramyz. Birer jınaq beretin jasqa keldik. Negizi aqyndar jas kezinde jastyq jınaǵyn, oıy tolysqanda salmaqty óleńderin oqyrmanǵa kitap etip shyǵaryp otyrǵany jón eken. Qyryqtan asqan bir aqyn tuńǵysh jınaǵyna on segiz jasynda jazǵan ǵashyq-mashyq óleńin engizse oqyrman oılaýy múmkin ǵoı: «Ádiram qalǵyr, mynaý ne jazǵan?» - dep. Degenmen, aqyn kitap shyǵarǵannyń jóni osy dep, besikten beli shyqpaı jatyp, jyltyńdap qaıta-qaıta kitap shyǵaratyndarǵa da qarsymyn. İriktep, eń tańdaýly shyǵarmasyn usynýy kerek qoı.
Al, óz kitabym jaıyna oralar bolsaq, Qudaı sátin salsa jaqynda tuńǵysh jınaǵym baspadan shyǵady.
– Jalpy poezıaǵa degen ustanymyńyz, ádebıetke degen kózqarasyńyz qandaı?
– Kúlli ádebıet ataýlynyń, rýhanı baılyq ataýlynyń basy – poezıa. Men oǵan óte adal bolýdy qalaımyn. Óleń degen – tunyp turǵan tumsa tazalyqtyń ózi. Aqyndyq - Táńirdiń syıy ǵoı. Ony tap-taza kúıinde beredi. Endi sonshama kıeli dúnıeni jalǵan shyǵarmaǵa aıyrbastaýǵa kimniń batyly barady? Poezıanyń qunyn jalǵandyq túsiredi. Shynaıy shabytpen shyqqan óleń qashan da ómirsheń bolady. Tarıhtan beri bizdiń jadymyzda jattalyp qalǵan óleńder túgeldeı aqyndardyń shalqar shabyty ústinde jazylǵan. Ónerge, kıege adal bolyp ótken aqyndar ǵasyrlar ótse de adamdar sanasynda máńgilik ǵumyr keship jatyr.
– Qazaq poezıasynda kimderdi ustaz tutasyz?
– Osy kúnge deıin moıyndalǵan klasıkterdiń bári bizge ustaz ǵoı. Degenmen, adamnyń ózine jany jaqyn tulǵalar bolady. Men jyraýlardy óleńniń áýlıesi dep, ózime úlgi tutam. Olar poezıany shyńǵa shyǵarǵan. Tunyp turǵan fılosofıa men surapyl rýh sol babalardyń jyrynda jatyr. Al, Abaı árbir óleń jazyp júrgen qazaqtyń danyshpan, jol silteýshisi. Qazaq aqyndary Abaısyz sóz bastamaýy kerek. Abaıdaǵy teńdessiz muńdy, qudaıdyń qudiretimen ashylǵan parasatty, júrek, jan (ózintanymaqtyq) ilimin az da bolsa oı eleginen ótkizbegen kisiden uly aqyndyq kútý de qıyn. «Abaı – qazaqtyń bas aqyny» dep alǵash Abaıdyń anaý-mynaý óleńshi emes, Allanyń hıkmeti arqyly arǵy parasaty ashylǵan adam ekenin tanyǵan, jáne ony alty alash balasyna aıtyp ketken Ahmet Baıtursynulyn ómirlik ustazym dep tanımyn. Abaı aıtqan «tolyq adam» ıdeıasyna bir adam laıyq bolsa, sol Ahmet-aq shyǵar dep oılaımyn.
Odan keıin, bireýdi ustaz tutqan kisi óleńin sol kisiden aınytpaı jazady degen oı bolmaýy kerek. Shyńjańda Omarǵazy Aıtan degen ataqty aqyn ótti. Ózi shashpa (aq) óleń uıqasymen jazatyn. Óleńderi sumdyq endi. Ol kisi poezıada úlken bıikke shyqqan aqyn. Múmkin keleshekte ol kisiniń juldyzy ońynan týady dep oılaımyn. Ol kisini biletin aqyndardyń kóbi ustaz tutady. Biraq, Omaǵańa uqsatyp óleń jazǵan eshkim joq. Muhtar Shahanov kókemizdiń «Dáýir dastandaryn», rýhty óleńderin túgeldeı jattap óstik. Jasyrmaımyn, bir kezde sol kisiniń sorabyna jaqyndap ta ketken kezderim boldy. Al, endi men, jalpy shyǵarmashylyqta, ózime jany jaqyn aǵalarymyzdan Járken Bódeshulyn, Júrsin Ermandy, Ǵalym Jaılybaıdy jáne Murat Shaımarandy poezıadaǵy ustazdarym dep sanaımyn.
– Qandaı kitaptardy kóp oqısyz? Álem ádebıetinen she?
– Buryn talǵaýsyz oqı berýshi edik qoı, qolǵa túskendi. Qazir, aty shyqqan avtorlardy, tańdap, ylǵap oqýdy ádet qylyp júrmin. Sońǵy oqyǵandarymdy aıtaıynshy. Sońǵy jarty jylda shetel ádebıetinen Mo Iannyń áńgimelerin oqydym. Japonıalyq birer jazýshylardyń shyǵarmalaryn oqydym. Al, qazaqtan Tynymbaı aǵamyzdyń áńgimelerin, Táken Álimqulovtyń «Kók qarshyǵasyn», Jaqsylyq Sámıtulynyń «Qaharly Altaıyn» oqydym. Shetel ádebıetin aýdaryp-tóńkerip tastadym deı almaımyn. A.V.Chehov áńgimelerin sumdyq jaqsy kóremin. Basqa da biraz klasıkterdi el qatarly oqydyq. Eger, múmkindik bolsa, til bilgen kisi ataqty shyǵarmalardy túpnusqadan oqysa tipten jaqsy ǵoı. Bizge tilden tilge aýdarylyp baryp keletin shyǵarmalar bar. Prozalyq shyǵarmalardy solaı oqýǵa bolady. Degenmen, avtor alǵash ózi jazǵan tildegideı deńgeıde bolmaıdy. Aýdarmanyń aty – aýdarma ǵoı. Onda ulttyq dúnıe tanym sińirilgen. Al, ekinshi tildegi aýdarmashynyń sanasyndaǵy dúnıetanym men ómirge kózqaras uqsamaǵandyqtan, báribir azdy-kópti aıyrmashylyq bolady. Mysaly, Abaı, Muqaǵalı óleńderiniń qytaıshasyn oqyp kórdik. Tushshyna almaısyń. Keıde túpnusqa birneshe tilden ótip, qazaq tiline kelgende kejimdelgen júırikteı qulpyryp ketedi eken. Jaryqtyq Farıza apamyz aýdarǵan chılı aqyny Pablo Nerýdanyń «Ólim» degen óleńi bar. Kókeıimnen ketpeıdi:
Men talaı tirilgenmin,
Ádildigin pash etip jumyr jerdiń.
Endi ólemin, aınalam topyraqqa,
Estimeımin birin de dúbirlerdiń.
Estimeımin kúlkisin súıiktimniń,
Estimeımin ysqyrǵan únin jeldiń.
Estimeımin ústinde qabirimniń,
Tolqyn ba, álde adam ba, júgirgen kim?
Qarańyzshy, bul endi qandaı keremet jetkizý. Avtordyń oıyna adal bola otyryp, qazaqy kórkem oıdy, sulý sózben tize salǵan. Bul endi túpnusqany basyp túspese, kem túsip turǵan joq.
Menimen, kóp aqyn kelispeıtinin bilemin. Biraq, qazaq poezıasymen ıyq tiresetin túse alatyn poezıa bar shyǵar. Degenmen, qazaqtan asyp ketetin aqyn el joq. Al, bul álem aqyndaryn oqymaımyn degen emes. Aqyn degen birazdan soń, ultqa, memleketke bólinbeıtin qubylys qoı. Bir-birine jaý eki halyqtyń aqyndary dos bolǵan oqıǵalar tarıhtan qylań beredi.
– Negizinen sizdiń óleńderińizden qazaq dalasynyń, qazaqy ómirdiń ıisi ańqyp turady. Eldi, jerdi, topyraqty únemi jyrlaısyz.
– Árıne, adamzat úshin topyraqtan uly dúnıe joq. Adam topyraqtan jaraldy. Adamdardyń tazalyǵy topyraqqa degen adaldyqtan bastalady. Kim óz topyraǵyn súımese, ol jel aıdaǵan qańbaqtaı, myna jasyl shardyń ústinen meken taba almaıdy. Týǵan jer, kindik qany tamǵan jer degen – teńdesi joq uǵym. Adamnyń kindik qany tamǵan topyraqqa belgisiz bir kúsh óle-ólgenshe tartyp turady. Týǵan jerden, qazaq topyraǵynan taǵdyr aıdap alys ketken eldiń báriniń muń-zary basqa emes, tek týǵan jerge bir oralý bolǵan. Oǵan mysaldar tolyp jatyr. Kindik qandy aıtaıyqshy. Kindik degen náreste men bala joldasyn jalǵap turatyn zat qoı. Kindik keskennen keıin qazaqtar ul balanyń kindigin alty qyrqanyń arǵy jaǵyna kómetin bolǵan. Nege? Sol alty qyrqadan bergi tóńirekti týǵan jeri retinde sezinsin, alty alashtyń uly bolsyn. Alty alash meken etken topyraqta ónip, sol topyraqtyn dámi tartyp, sol jerge jerlensin degen uly fılosofıa jatyr. Osy hıkmet teorıany jadynda saqtaǵan kóshpeli jurttyń sońy kúni keshe ǵana attan tústi. Bir bólimi áli qys qystaý, jaz jaılaý kóship-qonyp júr. Biz Altaıda mynaý jalǵan dúnıede balamasy joq kóshpeli ómirdi kórgen sońǵy urpaqpyz. Kóshkende kebejege otyrǵan, qozy-laqtardyń tońǵaǵyn shımen arshyǵan, kıiz úıde, qosta, ıtarqada ómir keshken balalarmyz. Shańyraqtan aspandaǵy juldyzdardy kórip, oılanyp jatyp uıqyǵa ketetinbiz. Kóshpeli eldiń balasy bir jylda tórt geografıalyq beldeýdi, tórt túrli jer bederin, tórt túrli tabıǵı ortany kóimen kóredi. Tabıǵatpen etene-egiz ǵumyr keshedi. Sýdyń mynaý álemde basqa halyqqa buıyrmaǵan tazasyn ishedi. Baqqan maly da basqa malǵa buıyrmaǵan eń taza shópti jeıdi. Minekı, osylaısha kúlli qazaq kúni búginge deıin aqsúıek ǵumyr keshti. Kúlli dúnıeniń baılyǵyn tabıǵattan emin-erkin paıdalandy. Tabıǵat keń bolsa qazaq ta keń boldy. minez-qulqy qandaı keremet edi. ishken-jegen tamaq taza, jutqan aýa, jutym sý taza bolǵan jerden adam boıyndaǵy, ult boıyndaǵy tazalyq qalyptasady. Al, boıy taza, qany, oıy kirshiksiz adamdardyń mahabbaty taza bolady. taza mahabbattan esti urpaq týady. Jaratqannyń, uly tabıǵattyń keńdigin, meıimirin kórgen halyq ózi de meıirimdi, jomart boldy. Sol saf degdarlyq, irilik, sulýlyq, mynaý jalǵan dúnıeniń naqty aqıqatyn meńgergen jany jaısań adamdar arasyndaǵy syılastyq kúni búginge deıin jalǵasýda. Osynyń báriniń arjaǵynda mıllıon jyldar boıy izgilik uıalaǵan uly topyraq jatyr. Qazaq tarıhta eshbir elden jamandyǵymen utylǵan joq. Aqkóńil adaldyǵymen, zymıan jurttan aılasyn asyra almady.
Al, endi osyndaı teńdessiz hıkmet ómirdiń qupıasyn bile tura týǵan jer týraly, el týraly, erlik, órlik, tazalyq týraly jyr jazbaýǵa aqynnyń amaly bar ma? Qysqasy, bárimiz eń aldymen topyraqqa qaryzdarmyz.
– Bir aqyndar bar, óleńderiniń kóbinde sezim, mahabbatty jyrlaǵan. Al, sizdiń óleńderińizdiń kóbi týǵan jerdi jyrlaýda. Endi, týǵan jerdi jyrlaý degen atam zamannan bar dúnıe. Búgingi tańda poezıa bolsyn, búkil dúnıe jańashylyqqa ótken kezeń. Sonda siz poezıada kenje qalyp baramyn dep oılamaısyz ba? Jańa úrdisine talpynbadyńyz ba?
– Mahabbat – dúnıeni ustap turǵan ǵalamat nárse ǵoı. Shyn mahabatty, uly mahabbatty tek tekti, uly adamdar jasaı alady. Mahabbat týraly jyrlar da siz aıtqan týǵan jer taqyryby sıaqty máńgilik taqyryp. Ekeýi de birimen biri egiz dúnıeler. Álmısaqtan beri jazylyp keledi. Taǵy da jazyla beredi. «Sen kúlgende kók táńirisi de kúldi» dep jyrlanǵan mahabbatnama jyry eske túsedi. Mahabbat joǵalǵan jerde qoǵam súreńsizdenedi. Mynaý álemniń sulýlyǵy da sol mahabbatpen kómkerilgen. Al, mahabbat týraly óleńderim barshylyq. Kóp jarıalaı bermeımin. Tórt tóńiregimiz tutasymen óleń ǵoı, baıqaı bilgen aqynǵa. Sezim qanshama móldir bolsa, lırıka da móltildep tógilip turady. birli-jarym adam aıtyp ta qalǵan jaıy bar, jańasha úrdiske ótken jón dep. Ótkender óte bersin. Qarsylyǵym joq. Árkim óziniń oń jambasyna keletin taqyrypty jazady ǵoı. Jubatjan, men joǵaryda aıttym ǵoı. Qazaqtyń ǵana emes, álemdik eki uly órkenıettiń biri bolǵan kóshpeli ómirdiń hıkmetin sońǵy ret kózimen kórip, júregimen sezingen jastar biz edik dep. Endeshe, endi sol bir ushy-qıyry joq uly dúnıeni qoparyp jazyp tastaǵandaı, men endi álem ádebıetinde jańa shyǵyp kele jatqan aǵymdardyń sorabyna túse ketýim kerek pe? Qazaqtyń ıisi burqyraǵan óleńdi qazaqqa adal júrekpen biz jazbaǵanda kim jazady. Árıne, jańa zamandar jetken saıyn poezıada da ishki-syrtqy jaqtardan belgili jańalyq qosyp alyp otyrady. Iaǵnı bárimiz de ómirdi búgingi qazaqtyń logıkasymen poezıaǵa aınaldyrýshylar ǵanamyz.
– Búgingi tańda qazaq poezıasynda ózińizben úzeńgiles júrgen jastardyń shyǵarmashylyǵyna kóńilińiz tola ma? Jas aqyndarǵa qandaı izdenis kerek dep oılaısyz?
– Men aqyndardyń sumdyq kóbeıip ketkeninen qorqamyn. Óleńdetip, kólemdetip, qara kóbeıtip júrgender de barshylyq. Ony ýaqyt irikteıdi deı salamyz ǵoı. Degenmen, kórkem poezıanyń súrepetin osy kóp shóp-shalań óleńder ketirip-aq jiberedi. Bizdiń úzeńgilesterge aǵa býyndar baǵa bergeni durys. Al, qudaı ǵumyr berse, bizden keıingilerdiń poezıasyna baǵany biz aıtarmyz. Aǵa býyn demekshi, keıbir úlkenderdiń suhbatynan kózim shalyp qalǵan sátterim bar, «haltrýshıkter qaptady» dep. Árıne, aǵalardyń aıtqany ras. Almatyda tas laqtyrsań, aqynǵa tıedi. Arǵy betińizde de, Ólgeıde de tipten solaı. El óleńshi men aqynyn aıyra almaı qaldy desek bola ma?
Al endi, kóńil tolmady degenmen, myna kisiniń kóńili tolmaıdy eken dep, óleńshi qaýym óleń jazǵanyn qoıa salmaıdy. Qoǵamda shynaıy syn-pikir joq. Óleńge súzgi jáne sezgi kerek bolyp tur. Shópti de, shógirdi de óleńdete berýden jurt jalyqty. Negizi aǵa býyndar burqyratyp syn jazyp, bizdi anda-sanda bir shyqpyrtyp alsa bolar edi. Beıbereket ketip bara jatqan jaǵdaı barshylyq. Bulaı kete bersek, ónerdiń kıesi urady.
Solaı bola tursa da, ózderiniń dara joldarymen qoltańbalaryn aıqyndap kele jatqan zamandastarymyz bar. Biz olarǵa tilekshimiz. Al, keıingilerdiń ishinde de kóńil toǵaıtar qyz-jigitter barshylyq. Endi, qazirshe eshkimge aqyl aıta almaımyn. bir-eki jınaqty oqyrmanǵa usynyp, baǵasyn alaıyq. Onyń ústine óleń degen nárse bireýdiń aqylymen jazylmaıdy. Óleń negizi ózi keledi ǵoı. Aqyndar sezim jeteginde otyryp aǵattyq jiberip almasa boldy. Jalǵyz ǵana aıtarym shyn talantty kisige saqtyq kerek.
– Arǵy bette júrip-aq atamekendi jyrlap, ańsap kelgen rýhty uldyń birisiz. Elge kelgeli qandaı jumystar jasap jatyrsyz? Ańsap kelgen atamekenińizge azdy-kópti eńbek ete aldyńyz ba?
– Shúkirshilik. Qazaqstanda turaqty túrde jumysta bolǵanyma endi ǵana úsh-aq jyl tolady. Kóp nárse berip úlgerdim deı almaımyn. Ǵylymnyń, ásirese til ǵylymynyń ortasyna kirdim. Jan jubatar, anda-sanda maqtanyp ta alar jalǵyz jumysym bar. Alash muralaryna tildik turǵydan úńilý múmkindigin alyp, jolbasshy aǵalar men jetekshi ustazdarymnyń bastamasymen, buǵan deıin ǵylymı aınalymǵa túspegen birneshe kitaptardyń baspadan shyǵýyna atsalystym. Ataqty Eldes Omaruly men Abaıdyń uly Turaǵul eńbekterin tuńǵysh ret kitap etip bastyrdyq. Osyndaı irgeli, tyń jumystarda bir azamat retinde eńbegim sińgenine baqytty sezinemin. Al, alash muralary degenińiz – ushan-teńiz dúnıe. Onda bizdiń biregeı el bolýymyzǵa baǵdar beretin uly tujyrymdar bar. Til bilimi ınstıtýty qazaq tiliniń qara shańyraǵy. Sondaı úlken orynda, irgeli eńbegi bar ǵalymdardyń qasynda, kóringen taýdyń alystyǵy joq dep, shamasha úırenip, izdenis jasaǵan bolyp jatyrmyz. Ǵylym saparymen eki ret shetelge jiberdi. Onda alǵan áser, kórgen bilgenderimizdi jazyp jarıaladyq. Qazaqta biz isteýge tıisti jumystarǵa san jetpeıdi. Qazaq tarıhyn, óz halqymyzdyń ulylyǵyn zertteýge kúsh salsaq, myqty el bolar edik.
– Áńgimeleskenińizge rahmet! Shyǵarmashylyq tabys tileımin!
Áńgimelesken Jubatgúl Sambýýqyzy
