9-maýsym kúni Almatydaǵy Qazaqstan jazýshylar kitaphanasynda Murat Kálapulynyń «Japyraq kóńil» atty óleńder jınaǵynyń tusaýkeseri ótti. Tusaýkeserge qalamgerler: Jádı Shákenuly, Bolat Qurmanǵajyuly, Ábdil Táýekeluly bastaǵan zıaly qaýym ókilderi, belgili kúıshi, Altaı, İle, Tarbaǵataı kúıshilik mektebiniń beldi ókili Arshyn Kásimbaıuly, ánshi, qolóner sheberi Qýanyshbek Rahmanuly bastaǵan ónerpazdar, til zertteýshi jas maman Talǵat Ramazanov, «Álimsaq» jýrnalynyń bas redaktory, fılologıa ǵylymdarynyń kandıdaty Nurlan Kóbegenuly jáne aqynnyń dos-jarandary, týys-týǵandary qatysty. Shyǵarmashylyq basqosýdyń tizginin aqyn, Ahmet Baıtursynuly mýzeı-úıiniń meńgerýshisi Ádilet Ahmetuly ustady.
Tusaýkeser aıasynda avtordyń óleńderi oqylyp, ánderi shyrqaldy. Aqsaqaldar bata berip, analar aq shashý shashty. Sóz kezegin alǵan aǵabýyn aqyn-jazýshylar qysqa ǵana ǵumyr keship, baqıylyq bolǵan aqynnyń mura bolyp qalǵan eńbegin joǵary baǵalap, urpaqtaryna izgi tilek bildirdi. «Japyraq kóńil» kitaby Almaty qalasy ortalyqtandyrylǵan kitaphanalar júıesine qarasty 28 kitaphanamen qosa, Qazaqstan ǵylym akademıasynyń kitaphanasyna tabys etildi. Shyǵarmashylyq jıynnyń sońynda jınalǵan qaýym marqumǵa quran baǵyshtap, as berdi.
Murat Kálapuly 1986 jyly QHR, Altaı qalasynda týǵan. Balalyq shaǵy Altaı aımaǵy, Býryltoǵaı aýdany, Qaramaǵaı aýylynda ótti. 2006 jyly Atamekenge oralyp, 2006-2011 jyldar aralyǵynda Qoja Ahmet Iasaýı ýnıversıteti jáne Qazaq Ulttyq Agrarlyq ýnıversıtetinde bilim alǵan. Ýnıversıtettik, qalalyq, respýblıkalyq deńgeıdegi túrli mádenı, ádebı qımyldarǵa belsene qatysqan. Ýnıversıtette ótken «Jigit sultany» baıqaýyna eki márte qatysyp, 1 jáne 2 oryn ıegeri bolǵan.
Ádebıetke bala kúninen áýes bolyp ósken Murat Kálapulynyń alǵashqy týyndylary 2007 jyly stýdent jastardyń «Poezıa búrshigi» atty jınaǵynda jaryq kórgen. 2021 jyly «Talantqa taǵyzym» ádebıet áýeskerleri tobyndaǵy aqyn-jazýshylardyń shyǵarmalarynan quralǵan «Kósege» atty jyr jınaǵynda birqatar óleńderi engzilse, 2022 jyly sáýirde «Ǵasyr jyry» atty antologıaǵa aqynnyń týyndylary basyldy. Qoıdan qońyr, jylqydan tory kisilikti minezimen óz ortasyna sıymdy, jaqyn-jekjatpen sılasymdy Murat Kálapulynyń kóptegen shyǵarmalary áleýmettik jeliler arqyly oqyrmandarynyń ystyq yqylasyna bólengen. Birneshe óleńine kómpozıtorlar án shyǵardy. Taldyqorǵan qalasynda óz mamandyǵy boıynsha sút ónimderi zaýytynda taban aýdarmaı qyzmet etti.
Alashtyń aımańdaı azamaty 2022 jyly mamyrdyń 17 jańasynda shuǵyl naýqastan jaryq dúnıege qosh aıtty. Minezdi azamattyń mezgilsiz qazasy kim-kimniń de qabyrǵasyn qaıystyrdy. Aqynnyń artynda aıaýly jary, jas balalary jáne ómir estelikterindeı bolǵan óleń-jyrlary qaldy. Upaqtary men oqyrmandaryna mura bolyp qalǵan Murat Kálapulynyń óleńderi tuńǵysh ret toptastyrylyp kitap bolyp shyǵyp otyr.
